Արմատակա՞ն, թե վերահսկվող ընդդիմություն է լինելու Սեյրան Օհանյանը

Երեկ վերջապես պաշտպանության նախկին նախարար Սեյրան Օհանյանը քաղաքականություն մտնելու եւ 2017 թվականի խորհրդարանական ընտրություններին մասնակցելու վերաբերյալ հայտարարություն արեց:

Ավելի քան երկու ամիս է, ինչ նա հրաժեշտ է տվել իր պաշտոնին, եւ այդ ընթացքում չեն դադարում շրջանառվել տարատեսակ տեղեկություններն այն մասին, որ նա նեղացել է իշխանություններից, մուտք է գործելու ակտիվ քաղաքականություն, համագործակցելու է Վիկտոր Դալլաքյանի «Երրորդ հանրապետություն» կուսակցության հետ, հանդես է գալու ընդդիմադիր դաշտում եւ մասնակցելու է առաջիկա ընտրություններին: Սեյրան Օհանյանը, սակայն, երեկվա իր հայտարարության մեջ չի նշել Վիկտոր Դալլաքյանի ու նրա կուսակցության հետ համագործակցելու մասին, ինչին սպասում էր ՀՀ քաղաքական դաշտը:

Միգուցե նա առայժմ չի ցանկանում քարտերը միանգամից բացել՝ այդպիսով թեժ պահելով իր նկատմամբ հետաքրքրությունը: Չի բացառվում նաեւ այն վարկածը, որ Օհանյանն, այնուամենայնիվ, Դալլաքյանի հետ չի համագործակցի: Վերջին շրջանում քիչ չէին նաեւ նման կարծիքները: Այնուամենայնիվ, հետաքրքիր զարգացումներ են տեղի ունենում պաշտպանության նախկին նախարարի շուրջ: Երեկ Օհանյանի հայտարարությունից անմիջապես հետո նրան անվերապահորեն սատարելու վերաբերյալ հայտարարություն տարածեց նաեւ «Միացյալ Հայաստան» շարժման ղեկավար Արթուր Ալեքսանյանը՝ ամերիկահայ գործարար Վահագն Հովնանյանի փեսա Ամարասի Արթուրը:

Արդյոք այդ շարժումն այդպիսով համագործակցելո՞ւ է նաեւ Վիկտոր Դալլաքյանի ու նրա կուսակցության հետ: «Միացյալ Հայաստանի» խորհրդի անդամ Արամ Ավետիսյանը երեկ մեզ հետ զրույցում շեշտեց, որ իրենք ոչ թե որեւէ դաշինքի, այլ Սեյրան Օհանյանին են սատարելու: «Մեր հայտարարությունը բացառապես վերաբերում է Սեյրան Օհանյանին, քաղաքական աջակցություն Սեյրան Օհանյան գործչին: Վերջ: Հիմա Վիկտոր Դալլաքյանն էլ նրա հետ կլինի, թե էլ ուրիշ մեկը, չեմ կարող ասել: Այդ առումով որեւէ մեկի հետ որեւէ գործընկերային հարաբերություն չունենք»,- ասաց նա:

Նշենք, որ «Միացյալ Հայաստան» շարժման խորհրդի անդամ են նաեւ Ազատ Արշակյանն ու Հրանտ Թոխատյանը: Կարո՞ղ են այս գործիչները ու հատկապես Հրանտ Թոխատյանը արմատական ընդդիմություն լինել: Ազատ Արշակյանը մեզ հետ զրույցում ասաց, թե Սեյրան Օհանյանին սատարելու վերաբերյալ իրենց հայտարարությանը չեն միացրել Հրանտ Թոխատյանին, քանի որ նա արտիստ է, ու նրան չեն ցանկանում ներքաշել քաղաքականության մեջ: Արշակյանը հավելեց, որ իրեն դուր է եկել Դալլաքյանի այն հայտարարությունը, որ ընդունում է խորհրդարանում երկրորդ պալատ ձեւավորելու իրենց գաղափարը: «Մենք համագործակցում ենք, Սեյրան Օհանյանի հայտարարությունը կոչ է համագործակցության: Կարծում եմ՝ Դալլաքյանի կուսակցությունը նույնպես համագործակցելու է: Սեյրան Օհանյանը կլինի այդ շարժման ղեկավարը: Մենք փորձում ենք ստեղծել մի շարժում, որի լիդերը կլինի Սեյրան Օհանյանը»,- հավելեց Ազատ Արշակյանը:

Վերջինիս հետ զրուցեցինք նաեւ այդ համագործակցությանն այլ հայտնի գործիչների կամ ուժերի ներգրավելու հարցերի շուրջ, ինչի մասին նախօրեին հայտարարել էր նաեւ Վիկտոր Դալլաքյանը:

- Պարոն Արշակյան, Վարդան Օսկանյանի ստեղծած «Համախմբումը» նո՞ւյնպես կլինի այդ համագործակցության մեջ:

- Տեղեկություն չունեմ, կոնկրետ մենք նման հարց չենք քննարկել: Իսկ ով բարեփոխումների կողմնակից է, դեմ է լճացմանը, քրեաօլիգարխիկ համակարգին, ես նրան համարում եմ յուրային:

- Բայց Սեյրան Օհանյանը ձեր ասած քրեաօլիգարխիկ համակարգում է եղել ոչ վաղ անցյալում:

- Նախկինն առանձին խնդիր է: Քրեաօլիգարխիկ համակարգն ամբողջ Հայաստանը չէ, դրանք անձնավորություններ են, որոնք քրեական նկարագիր եւ անցյալ ունեն, թալանչի են, ապօրինի թալանել են ՀՀ քաղաքացիներին: Օրինակ, ԱԺ որոշ պատգամավորներ քրեաօլիգարխիկ չեն, թեեւ քրեաօլիգարխիկ ԱԺ ունենք:

- Հնարավո՞ր է Գագիկ Ծառուկյանն էլ միանա այդ համագործակցությանը, չէ՞ որ նա էլ կարծես թե քաղաքականություն վերադառնալու ցանկություն ունի:

- Չգիտեմ: Բոլոր նրանք, ովքեր ուզում են փոխել համակարգը, ես նրանց համարում եմ բարեփոխիչ: Եթե Սեյրան Օհանյանն առաջարկում է ակտիվորեն բարեփոխումներ անցկացնել, ես կողմ եմ համագործակցելու բարեփոխիչների եւ ինքնաբարեփոխվողների հետ:

- Ընդամենը մի քանի ամիս առաջ Սեյրան Օհանյանին ի՞նչն էր խանգարում ինքնաբարեփոխվել:

- Մեկը շուտ է այդ գաղափարին հասնում, մեկը՝ մի քիչ ուշ: Մարդ կա երիտասարդ տարիքում է այդ գաղափարին հասնում, մարդ կա՝ հասուն: Տա Աստված, որ բոլորն էլ ինչ-որ տարիքում գիտակցեն, որ լավ Հայաստանը բոլորի համար է լավ:

- Երբեմն նաեւ կարծիքներ են հնչում, որ նոր ստեղծվող այսպիսի քաղաքական նախագծերին աջակցում է նաեւ Ռոբերտ Քոչարյանը:

- Չեմ կարծում, նա չի երեւում: Բայց եթե Ռոբերտ Քոչարյանը բարեփոխումների մեջ մասնակցություն ունի, դա արդեն լավ է, դատավարության ժամանակ դա արդեն հաշվի կառնվի որպես մեղմացուցիչ հանգամանք, եթե դատավարություն լինի: