Լեռնանիստի փլուզումից մահացածներից մեկը խանութի տիրոջ կինն է, մյուսը՝ հաճախորդ

17.00 Դեպքի վայրում փրկարարները հինգ ժամ է, ինչ աշխատում էին, նրանք փորձում էին այն պանելները, որոնք վտանգ էին ներկայացնում, հանել. երբ վերամբարձ կռունկի միջոցով պանելները փորձում էին հանել, խանութի պատերը շարժվում էին, մի մասը փլուզվում ընկնում:

Մեր զրույցում դեպքի վայրում աշխատող ԱԻՆ Կոտայքի մարզային փրկարարական վարչության պետ, գնդապետ Ավետիս Մանուկյանն ասաց, որ խանութի տանիքն ամբողջությամբ փլուզվել է (200-250 քառակուսի տարածք): «Երկու քաղաքացիները, ովքեր մահացել են, գտնվել են փլուզման հիմնական մասում՝ վաճառասրահում, պանելներն իջել են հենց իրենց վրա: Սովետական կարգի խանութ է, հին շինության պատերի մեջ ոչ մի արմատուրա չկա: Կարող եմ ասել, որ արտաքին զննությամբ՝ կավով է սարքված եղել, ոչ թե ցեմենտով»,- ասաց փրկարար ծառայության գնդապետը:

14.00 Այս պահին մեր նկարահանող խումբը դեպքի վայրում է եւ քիչ անց նոր մանրամասներ կհաղորդենք:

13.48 Կոտայքի մարզի Լեռնանիստ գյուղում այսօր փլուզված մթերային խանութը պատկանում է նույն գյուղի բնակիչ Գագիկ Ալոյանին, ում որդին՝ 1986 թվականին ծնված Սարգիս Գագիկի Ալոյանը, ի դեպ, փլուզման պահին այնտեղ է եղել եւ վնասվածքներով տեղափոխվել նախ Հրազդանի բժշկական կենտրոն, ապա՝ Երեւան: Այս մասին armtimes.com-ի թղթակցին հայտնեց Լեռնանիստի համայնքապետ Արտյոմ Հայրապետյանը:

Զոհերից մեկը՝ դրամարկղում աշխատող 50-ամյա կինը, Արմիդա Ալոյանն է՝ ընտանիքի մայրը, իսկ 32-ամյա զոհը՝ Անուշ Սարգսյանը, այդ պահին խանութ մտած հաճախորդ:

«Իրականում պայթյուն տեղի չի ունեցել, տանիքն է փլուզվել: Հավանաբար, այդքան էլ ամուր չի եղել: 180 ք/մ ընդհանուր տարածքով մեծ խանութ է, գործում է 1966 թվականից, սեփականատիրոջ կողմից նորոգվել եւ աշխատեցվում էր: Նրա մի որդու մոտ համամետաբար թեթեւ վնասվածքներ են, իսկ ահա մյուսին՝ Սարգսին, կոտրվածքներով տեղափոխել են հիվանդանոց»,- տեղեկացրեց մեր զրուցակիցը:

13.00 Այսօր Լեռնանիստ գյուղում տեղի ունեցած պայթյունի հետեւանքով Հրազդանի բժշկական կենտրոն տեղափոխված 2 քաղաքացիների վիճակը կայուն ծանր է:

Ինչպես armtimes.com-ի թղթակցին հայտնեցին բժշկական կենտրոնից, տուժածներից մեկը 1986 թվականին ծնված Սարգիս Գագիկի Ալոյանն է, մյուսը՝ 1993 թվականին ծնված Տաթեւիկ Գվիդոնի Սարգսյանը: Վերջինիս կոնքոսկրի կոտրվածք ունի, իսկ ահա երիտասարդի մոտ առկա է ազդրոսկրի վերին երրորդ, կոնքոսկրի կոտրվածք, ինչպես նաեւ այրվածք՝ դեմքի շրջանում: Չի բացառվում, որ Սարգիսը նաեւ ողնաշարի վնասվածք ունենա:

«Տուժածները գիտակից վիճակում են: Համակարգչային տոմոգրաֆիա իրականացնելու նպատակով նրանց տեղափոխել են Երեւան, Սարգսին՝ «Մուրացան» բժշկական կենտրոն, Տաթեւիկին կամ Մասիվի, կամ Թիվ 1 համալսարանական կլինիկա»,- փոխանցեց «Հրազդան» բժշկական կենտրոնի ընդունարանի աշխատակցուհին:

11.40 Կոտայքի մարզի Լեռնանիստ գյուղի մթերային խանութում այսօր տեղի ունեցած պայթյունի հետեւանքով մահացել է 2 քաղաքացի, «Հրազդանի բժշկական կենտրոն տեղափոխվել է 2 տուժած: Ինչպես armtimes.com-ին տեղեկացրեցին ԱԻՆ լրատվական ծառայությունից, նախնական տվյալներով՝ զոհվածներից մեկը 50 տարեկան մի կին է՝ խանութի դրամարկղի աշխատակցուհին, մյուսը՝ 32 տարեկան երիտասարդ կին:

«Տվյալները նախնական են, հնարավոր է՝ փլատակների տակից այլ մարմիններ եւս հանվեն: Տեղում համապատասխան տեխնիկա է աշխատում, փլատակները մաքրվում են: Զոհերի եւ վիրավորների անուններն այս պահին հայտնի չեն, անձնական տվյալներն այս պահին ճշտվում են»,- փոխանցեցին մեզ գերատեսչությունից:

Տուժածների մասին տեղեկություն ստանալու նպատակով կապ հաստատեցինք նաեւ Հրազդանի բժշկական կենտրոնի հետ, սակայն այնտեղից առայժմ հրաժարվեցին որևէ բան ասել: Տեղեկատվություն ստանալուն պես այն կներկայացնենք մեր ընթերցողի ուշադրությանը:

Հիշեցնենք, որ փետրվարի 14-ին, ժամը 10:15-ին ԱԻՆ-ում ահազանգ է ստացվել, որ Կոտայքի մարզի Լեռնանիստ գյուղում՝ մթերային խանութում, տեղի է ունեցել պայթյուն: Ըստ նախնական տվյալների` կա երկու զոհ և երկու տուժած:

Դեպքի վայր են մեկնել մեկ մարտական հաշվարկ, հատուկ նշանակության փրկարարական աշխատանքներ իրականացնող կենտրոնի փրկարարական ջոկատը, ՃԿԱԿ արտակարգ իրավիճակներին արձագանքման և օպերատիվ խմբերը և հոգեբանական խորհրդատվական գծով հրահանգիչը:

Կտրվի լրացուցիչ տեղեկություն: