Արարատի մարզում ՀՀԿ-ի և Հովիկ Աբրահամյանի ու Գագիկ Ծառուկյանի բախումը դաժան է լինելու

Արարատի մարզը խորհրդարանական ընտրություններին թերեւս ամենաթեժ ընտրատարածքներից մեկն է լինելու: Այստեղ բախվելու են հին ու նոր կրքեր:

Մեծ է հավանականությունը, որ մարզում «Բարգավաճ Հայաստան» կուսակցության ռեյտինգային ցուցակով առաջադրվելու է Հովիկ Աբրահամյանի որդին՝ Գագիկ Ծառուկյանի փեսա, Արտաշատի քաղաքապետ Արգամ Աբրահամյանը: Այդ պարագայում Աբրահամյանները, Ծառուկյանն ու ԲՀԿ-ն, բնականաբար, ամեն ինչ անելու են, որ Արգամ Աբրահամյանն առավելագույն ձայներ ստանա: Այդ մարզում ընդհանրապես բախվելու են Աբրահամյանների, ԲՀԿ-ի ու իշխող Հանրապետական կուսակցության շահերը: ԲՀԿ-ն ու Արգամ Աբրահամյանն ամեն ինչ անելու են ՀՀԿ-ին ու ՀՀԿ-ի թեկնածուներին հաղթելու համար: ԲՀԿ-ն Ա. Աբրահամյանից զատ այդ մարզում այլ թեկնածուներ էլ է առաջադրելու: ՀՀԿ-ի թեկնածուներից են մարզպետ Արամայիս Գրիգորյանը, նախկին ոստիկանապետ, ՀՀԿ-ի մարզային կառույցի ղեկավար Ալիկ Սարգսյանը, պատգամավոր Մուրադ Մուրադյանն ու այլք:

Հ. Աբրահամյանը, հեռանալով ՀՀԿ-ից, դժգոհություն ու բարդույթներ է կուտակել այդ կուսակցության նկատմամբ: Հիմա նա դրանք հաղթահարելու համար պետք է օգտագործի այս ընտրությունները: Նա Արարատում պետք է ապացուցի, որ ինքն է այդտեղ տերն ու տիրակալը: Իսկ Արարատում Աբրահամյանների ու Ծառուկյանի լծակները բավական մեծ են: Տարիներ շարունակ նրանք մարզային ամենատարբեր՝ պետական ու մասնավոր կառույցներում, հիվանդանոցներում, դպրոցներում եւ այլուր հատկապես ղեկավար պոստերում իրենց մարդկանց են ընդգրկել: Եվ ՀՀԿ-ում մտահոգություն կա, որ մինչեւ ընտրություններ չեն հասցնի այդ լծակները կամ գոնե դրանց մի մասը վերցնել:

Ծառուկյանի ու Արգամ Աբրահամյանի միայն Արարատի ցեմենտի գործարանը մոտ 1500 աշխատող ունի: Բացի այդ, խնամիներով մարզում ունեն ձկնաբուծական ընկերություններ, հսկայական հեկտարներով հողեր, որտեղ գարնանը՝ հենց նախընտրական շրջանում բազում մարդիկ են աշխատում: Ունեն այլ գործարաններ, խանութներ, բենզալցակայաններ եւ այլ բիզնեսներ: Այդ ընկերություններում աշխատում են հազարավոր արարատցիներ: Միջինացված թիվ կա, որ ընտրությունների ժամանակ այդ աշխատակիցներից յուրաքանչյուրն իր հետ իր ընտանիքի եւս երկու անդամի է տանում: Այդպիսով, ՀՀԿ-ին դժվար կլինի մասնատել ու տիրել Աբրահամյանների ունեցած հնարավորությունները:

Իշխանությունն այդ մարզում նրանց դեմ է հանել Արամայիս Գրիգորյանին, Ալիկ Սարգսյանին եւ Մուրադ Մուրադյանին, ովքեր տարիներ շարունակ գրեթե թշնամական հարաբերություններ են ունեցել Աբրահամյանների հետ: Մարզում ազդեցություն ունենալու կամ ազդեցությունները չկիսելու հողի վրա նրանք երբեմն բախվել են: Եվ վերջին տարիներին Հ. Աբրահամյանին հաջողվել է գերակա դիրքեր ունենալ: ՀՀԿ-ից նրա հեռանալուց հետո այս պաշտոնյաները գործուղվեցին Արարատ եւ հիմա փորձում են Հ. Աբրահամյանի ազդեցությունը նվազեցնել: Ահա այս հին ու նոր թշնամությունների բախմանն էլ ականատես կլինենք սպասվող ընտրական գործընթացներում: Երկու բեւեռների բախման մասին երեկ զրուցեցինք Ալիկ Սարգսյանի հետ:

- Պարոն Սարգսյան, ՀՀԿ-ի համար Արարատի մարզում դժվար չի՞ լինելու պայքարել Աբրահամյանների ու ԲՀԿ-ի դեմ:

- Ես իմ հաջողության համար չեմ կասկածել: Ուրեմն իզուր եմ այսքան տարի ապրել, աշխատել, որ հիմա էլ գոնե չհասկանամ, թե իմ աշխատանքն արդյոք արդյունք կունենա, թե ոչ: Ես որեւէ անձի հետ խնդիր չունեմ, ես իմ ժողովրդի հետ եմ եւ ակնկալում եմ, որ ժողովուրդը պետք է ինձ հասկանա ու հավատա:

- Խոսքը ոչ այնքան ձեր մասին է, որքան մարզում նրանց ունեցած ազդեցության մասին:

- Ես իրենց դեմ չեմ աշխատում, ես աշխատում եմ հանուն մեր գործի, հանուն մեր կուսակցության: Եվ ես հավատացած եմ, որ մեր գործը հաջողությամբ կպսակվի: Ես որեւէ մեկի դեմ պայքարելու հանձնարարական ունեմ: Ես եկել եմ մարզ՝ իմ այսքան տարիների ստեղծածը, հարգանքը, պատիվը, հնարավորությունները կիսեմ իմ ժողովրդի հետ: Ես զբաղված եմ մեր գործերով, եւ ինձ չի հետաքրքրում, թե ով որտեղ ինչ ռեյտինգ ունի:

- Դուք ասում եք՝ դեմ չեք աշխատելու, բայց նույն Արտաշատում, որտեղ դուք եք փորձելու աշխատել, կարող է առաջադրվել նաեւ Արգամ Աբրահամյանը: Ուզած, թե չուզած, պիտի իրար դեմ աշխատեք:

- Ես ՀՀԿ մարզային խորհրդի ղեկավարն եմ եւ աշխատում եմ ՀՀԿ-ի համար, անգամ ոչ այնքան ինձ համար: Դուք թյուր կարծիք ունեք, թե ես Հովիկ Արգամիչի կամ Արտաշատի քաղաքապետի դեմ եմ աշխատելու: Ով ինչքան ստանա, իր ու իր կուսակցության ձայներն են: Ես դեմի խնդիր չունեմ, ես հանունի խնդիր ունեմ:

- Դուք համոզվա՞ծ եք, որ մարզում ՀՀԿ-ն է հաղթելու եւ ոչ թե ԲՀԿ-ն:

- Իհարկե, համոզված եմ, բա էլ ինչի՞ համար եմ հասել այստեղ:

- Բայց դուք վերջին տարիներին հեռու եք եղել մարզից, պետք է, որ ձեր ազդեցությունը նվազած լինի:

- Ճիշտ է, արհեստական մեկուսացում եղել է ինչ-որ մարդկանց կողմից, ես դա չեմ հերքում, բայց դա ինձ վրա այնքան էլ չի ազդում: Ժողովրդի հիշողության մեջ ես եղել եմ եւ հիմա էլ այն լավով թարմանում է: Այնպես որ, այդ ժամանակավոր, արհեստածին մեկուսացումը թող 10-20 տոկոսով արծարծվեր իմ վրա, բայց ոչ ամբողջությամբ:

- Հովիկ Աբրահամյա՞նն է ձեզ մարզից մեկուսացրել:

- Ես անուններ չեմ տալիս: Իհարկե, ես գիտեմ, թե ով, բայց չեմ ուզում բարձրաձայնել:

- Կարծիք կա, որ այդ ազդեցությունների պայքարի արդյունքում մարզում լարվածություն է առաջացել: Անգամ մեկնաբանություններ կան, թե լարվածությունն այն աստիճանի է հասել, որ դրանից օրերս մահացել է ՀՀԿ Արարատի մարզային կառույցում ձեր տեղակալ Գագիկ Բեգլարյանը:

- Ես չգիտեմ, ինչպես ձեւակերպել, բայց դա ամենաանբարոյական, ամենաայլանդակ զառանցանքն է, որ փորձել են կապել ինձ հետ: Բեգլարյան Գագիկն իմ ամենահարազատ մարդն է եղել, իմ ընկերն ու զինակիցն է եղել բոլոր հարցերում: Այդ մարդը երեւի ամենանվիրական ՀՀԿ-ականն է եղել, որը ՀՀԿ-ի ակունքներում է եղել ու մինչեւ վերջ անդավաճան ՀՀԿ-ի կողքին կանգնած է եղել: Ինչպես կարելի է նման կեղտոտ հերյուրանք տարածել: