ՀՀԿ-ն ի՞նչ ազդեցությունն ունի Գագիկ Ծառուկյանի մարզպետ փեսայի վրա

ԱԺ տնտեսական հարցերի մշտական հանձնաժողովի նախագահ Վարդան Այվազյանը բնապահպանության մեկ այլ նախկին նախարար Արամ Հարությունյանի հետ ՀՀԿ-ից ռեյտինգային ընտրակարգով առաջադրվել է Կոտայքի մարզի թիվ 10 ընտրատարածքում:

Կոտայքից եկող նախընտրական տեղեկությունների համաձայն՝ այս երկու թեկնածուներն էլ ընտրողներին ընտրակաշառք են խոստանում: Վարդան Այվազյանը երեկ պատասխանել է մեր հարցերին:

- Պարոն Այվազյան, կարծիք կա, որ լարվածություն կա ձեր եւ պարոն Հարությունյանի միջեւ, քանի որ Կոտայքի մարզում դուք եք ՀՀԿ-ի առավել ընդգծված թեկնածուները, եւ յուրաքանչյուրդ աշխատում եք, որ հենց դուք առավելագույն ձայները տանեք:

- Կոտայքի մարզում մենք էլի թեկնածուներ ունենք, որոնք բոլորն ընդգծված են: Իսկ մեր միջեւ բացարձակապես լարվածություն չկա, որովհետեւ Արամ Հարությունյանն ապրել ու գործել է հիմնականում Եղվարդի տարածաշրջանում, ես՝ Չարենցավանում: Մեզանից յուրաքանչյուրը բացի այն, որ ունի հանրային ճանաչելիության որոշակի աստիճան, այդ տարածքներում նախկինում եղել ենք մեծամասնական ընտրակարգով ընտրված պատգամավոր:

- Բայց հիմա նման բաժանում չկա, կա մեկ ընդհանուր Կոտայքի մարզի թիվ 10 ընտրատարածք, որտեղ երկուսդ եւս 10 այլ թեկնածուների հետ միասին առաջադրվել եք:

- Բնականաբար իմ՝ որպես մարդու, անհատականության եւ ոչ միայն որպես քաղաքական գործչի, ընկերների շրջանակը շատ ավելի մեծ է Չարենցավանում, քան թե նույն Եղվարդում կամ Կոտայքի մեկ այլ շրջանում: Նույնն էլ Արամ Հարությունյանին է վերաբերում: Բայց ինձ, օրինակ, Եղվարդում էլ են ճանաչում:

- Դուք Եղվարդում Արամ Հարությունյանի շտաբի հարեւանությամբ շտաբ բացե՞լ եք, ինչպես դա տեղի է ունեցել Մասիսում ձեր կուսակից Մուրադ Մուրադյանի եւ Արայիկ Գրիգորյանի դեպքում:

- ՀՀԿ-ն ՀՀ բոլոր տարածքներում էլ շտաբներ ունի: Ես եթե Եղվարդ եմ գնում, գնում՝ տեսնում եմ իմ ընկեր Արամ Հարությունյանին, մենք նաեւ միասնական հանդիպումների կգնանք: Բայց ինձ ավելի շատ Չարենցավանում են ճանաչում: Իմ դպրոցական ընկերները, իմ նախկին կոլեկտիվը, աշխատանքային ընկերները Չարենցավանում են: Հուսով եմ, մեր ընտրատարածքում նման միջադեպ չի լինի: Մենք թեկնածուներով շաբաթ օրը հանդիպել ենք, բոլորս էլ նորմալ հարաբերությունների մեջ ենք: Կարող է, երիտասարդները մի փոքր ամբիցիոզ են: Սա կուսակցական ռեյտինգային ընտրություն է, եւ դա է կարեւորը: Սա կուսակցությանն առավելագույն քվեներ բերելու խնդիրն է:

- Որպես ռեյտինգային ընտրակարգով առաջադրված թեկնածու, չե՞ք կարծում, որ դա խնդրահարույց ընտրակարգ է: Հատկապես որ այդ լարվածությունը հենց ՀՀԿ-ի թեկնածուների միջեւ է առաջանում:

- Նայած թե որ տեսանկյունից ես դիտարկում: Եթե դու դրան մոտենում ես որպես անհատների միջեւ մրցակցության, բնականաբար խնդիր կա, եթե դիտարկում ես որպես կուսակցական պայքար՝ առավելագույն ձայն հավաքելու առումով, չկա խնդիր: Թեկնածուները պետք է ջանքեր ներդնեն, որ ստանան ժողովրդի առավելագույն վստահությունը, բայց այդտեղ շահելու է ընդհանուր թիմը:

- Կոտայքի մարզպետ Կարապետ Գուլոյանը Գագիկ Ծառուկյանի փեսան է: Մտավախություն չունե՞ք, որ նա մարզում ունեցած իր ազդեցությունը կօգտագործի Ծառուկյան դաշինքի եւ ոչ թե ՀՀԿ-ի օգտին:

- Եթե այդ տրամաբանությամբ գնանք, ՀՀԿ-ն էլ իր ազդեցությունն ունի նույն մարզպետի վրա: Բայց չեմ կարծում, որ պարոն Գուլոյանն այդ քայլին գնա: Մենք հանդիպում ենք, քննարկում ենք, ճշգրտում ենք որոշ հարցեր, եւ իմ տպավորությունն այն է, որ մարզպետը փորձում է այնպես անել, որ նորմալ ընտրություններ տեղի ունենան:

- Կոտայքի մարզը ավանդաբար համարվել է Գագիկ Ծառուկյանի ազդեցությունը կրող տարածք: 2012թ. խորհրդարանական ընտրություններին մարզի երեք մեծամասնական ընտրատարածքներից ընտրված պատգամավորները ԲՀԿ անդամ են: Չե՞ք կարծում, որ ՀՀԿ-ն այնտեղ խնդիրներ է ունենալու:

- Խնդիր ցանկացած պարագայում լինելու է, որովհետեւ մենք ընտրության ենք գնում: Իսկ հանրային ազդեցությունը ենթադրում է բիզնես ազդեցություն, հեղինակության եւ կատարած կամ կատարելիք աշխատանքի ազդեցություն: Ես համաձայն եմ, որ նախկին խորհրդարանական ընտրությունների ժամանակ ՀՀԿ-ն Կոտայքի մարզում ստացել է 50 հազար ձայն, ԲՀԿ-ն՝ 68 հազար ձայն: Բնականաբար, ԲՀԿ-ն այնտեղ պետք է շատ ձայն ունենա, բայց մենք պետք է ջանքեր գործադրենք ու փորձենք ժողովրդին համոզել, որ մենք ոչ թե նրանց ջգրու, այլ հօգուտ մեզ ձայներ ստանանք: Բայց չկա մի այնպիսի տարածք, որտեղ խնդիրներ չլինեն:

- Արդեն տարբեր մարզերից ՀՀԿ-ի կողմից ընտրակաշառքներ բաժանելու մասին տեղեկություններ են գալիս: Կարծիք կա, որ ՀՀԿ-ն Կոտայքի մարզում էլ է բաժանելու:

- Ինձ թվում է, որ դա հավասարաչափ կարող է տարածվել ընտրություններին մասնակցող ցանկացած ուժի վրա:

- Ցանկացածը չունի այդքան ռեսուրս: ՀՀԿ-ն ու ԲՀԿ-ն մեծ ռեսուրսներ ունեն:

- Մյուսներն էլ ասում են, հենց ընտրվեցի, ձեզ 100 հազար դրամ թոշակ եմ տալու: Դա էլ ընտրակաշառքի մեկ այլ տարբերակ է: Ես ոչինչ չեմ բացառում: Բայց մենք տեսնում ենք, թե ընտրակաշառքի ազդեցությունը որքան է: Եթե միայն ընտրակաշառքի ազդեցությունը լինի, բոլորին անհայտ մեկին բերեք, ռեյտինգային ընտրակարգով առաջադրեք, եւ նա թող ընտրակաշառք բաժանի: Տեսնենք կընտրվի՞:

- Այսինքն, ընտրակաշառքը կգործի միայն այն դեպքում, եթե բաժանող թեկնածուն այդ ընտրատարածքում հայտնի՞ է:

- Ոչ, այդ հայտնի մարդը քվե ստանալու հնարավորություն ունի, բայց ես չեմ ուզում բախտագուշակի տպավորություն թողնել ու ասել, թե ինչպես են աշխատելու ռեյտինգային թեկնածուները: Մենք այսօր մարդկանց հետ ենք հանդիպում, մեր արած ու չարած գործերն ենք ներկայացնում, խոսում անելիքների մասին: