Մաղթանք. բարի երթ քեզ, «Արդարություն»

Տպագրվել է «Հայկական Ժամանակ» օրաթերթի՝ 2004 թվականի մարտի 24-ի համարում

Փետրվարի 2-ին մեկնարկած ԱԺ գարնանային նստաշրջանի  առաջին եռօրյան նշանավորվեց «Արդարություն» դաշինքի եւ «Ազգային միաբանության» համատեղ հայտարարությամբ՝ խորհրդարանի աշխատանքները բոյկոտելու մասին: Դրանից հետո արդեն, ի հեճուկս իշխանությունների կանխատեսումների, թե՝ ընդդիմության երկու թեւերի մեղրամիսը երկար չի տեւի, խորհրդարանական ընդդիմությանը հաջողվում էր մինչեւ վերջերս որեւէ կարեւորագույն խնդրի շուրջ տարաձայնություններ չունենալ եւ իրար վրա ցեխ չշպրտել՝ ինչը որ արվում էր 2003-ի նախագահական ընտրությունների ողջ ընթացքում: Սակայն, «Արդարություն» դաշինքի եւ «Ազգային միաբանության» հարաբերությունները դարձյալ դեմ են առել հերթական հիմնաքարին՝ ե՞րբ անել հեղափոխություն:

«Արդարություն» դաշինքը հայտարարում է, որ մինչեւ ապրիլի 12-ը ժողովուրդն արդեն դիրքավորված պետք է լինի Բաղրամյան պողոտայի մատույցներում, իսկ «Ազգային միաբանությունը» կողմ է մայիսյան հեղափոխությանը: «Արդարության» ներկայացուցիչ, «Հանրապետություն» կուսակցության նախագահ Ալբերտ Բազեյանը մեզ հետ զրույցում պնդում էր, որ ժողովուրդն արդեն պատրաստ է փողոց դուրս գալ, եւ ժամանակ ձգելը կարող է հերթական անգամ կոտրել համաժողովրդական շարժումը, իսկ «Ազգային միաբանության» նախագահ Արտաշես Գեղամյանն այն կարծիքին է, որ դեռ անհրաժեշտություն կա Երեւանում ուժերի ստուգատես անցկացնելու: «Մեր կուսակցությունը 46 հազար անդամ ունի, որոնք համատեղ մշակել են մեր ռազմավարությունը՝ նպատակ ունենալով անցնցում իշխանափոխություն իրականացնել առաջիկա մեկ-երկու ամսվա ընթացքում:

Մենք մինչեւ ապրիլի 10-ը Երեւանում կանցկացնենք ուժերի ստուգատես՝ պարզելու համար մեր էլեկտորատի ուժն ու հնարավորությունը, որից հետո արդեն հստակ կնշենք այն կոնկրետ ժամկետը, երբ կոչով կդիմենք ժողովրդին»,-երեկ մեզ հետ զրույցում ասաց «ԱՄ» նախագահ Արտաշես Գեղամյանը: Ըստ «Ազգային միաբանության» նախագահի, իրենք մինչեւ ապրիլի 28-ը կսպասեն՝ իշխանություններին վերջին շանսը տալով հանգիստ եւ անցնում լքելու իշխանությունը: Իսկ ապրիլի 27-ին մի վերջին անգամ, խորհրդարանական հայտարարությունների օրը, «Ազգային միաբանությունը» սթափվելու եւ հրաժարական տալու ամենավերջին ուլտիմատումով կդիմի Քոչարյանին եւ Սերժ Սարգսյանին: Եւ եթե մինչեւ ապրիլի 28-ը իշխանությունները չսթափվեն, եւ Ռոբերտ Քոչարյանն ու Սերժ Սարգսյանը հրաժարական չտան, «ԱՄ»-ն ժողովրդին կհանի փողոց:

Ահա սա է, ըստ Գեղամյանի, իրենց ռազմավարությունը, որից շեղվել իրենք չեն ցանկանում: Իսկ եթե «Արդարություն» դաշինքը ժամկետների հարցում տարաձայնություններ ունի իրենց հետ, ապա Գեղամյանին մնում է ընդամենը մեկ բան՝ բարի երթ ցանկանալ «Արդարություն» դաշինքի իրենց գործընկերներին: Այդուհանդերձ, ըստ որոշ վերլուծաբանների, Արտաշես Գեղամյանի ծրագիրը՝  համաժողովրդական շարժումն ապրիլից մայիս տեղափոխելու, երկու խնդիր է լուծում. նախ՝ մայիսի 25-ին լրանում է խորհրդարանական ընտրությունների մեկ տարին, եւ նախագահն արդեն իրավունք ունի լուծարելու խորհրդարանը: Իսկ դա, ըստ մեր զրուցակից մի քաղաքագետի, Արտաշես Գեղամյանի համար շանս է՝ ստանալու վարչապետի պաշտոնը:

«Բացի այդ, ակնհայտ է, որ մայիսից սկսվում են գյուղատնտեսական, հողագործական աշխատանքները, եւ հիմնական բողոքական էլեկտորատը, որ մարզերի բնակիչներն են, չեն թողնելու իրենց վարուցանքը եւ գան հանրահավաքի: Գեղամյանին պետք է շարժումը կասեցնել մինչեւ մայիսի 25-ը, որից հետո արդեն կսկսի գործել նրա սցենարը. լուծարել խորհրդարանը եւ գնալ նոր ընտրությունների՝ Գեղամյան-վարչապետ կարգախոսով»,- ասում է մեր զրուցակից քաղաքագետը: Երեկ մենք պարոն Գեղամյանին ներկայացրինք նաեւ այս տեսակետները: «Ես չեմ կարծում, որ մենք գնում ենք գյուղացիական հեղափոխության, որը պետք է կապել հողագործական աշխատանքների հետ: Իսկ ինչ վերաբերում է որոշ քաղաքագետների վերլուծություններին, ապա անգամ հարկ չեմ համարում դրանց անդրադառնալ»,- ասում է «Ազգային միաբանության» նախագահը: 

Ինչեւէ, չնայած «Արդարություն» դաշինքը դեռ մտադիր է առաջիկա օրերին  շարունակել բանակցությունները «Ազգային միաբանության» հետ, սակայն պարոն Գեղամյանի տեսակետը վերջնական էր. իրենք մայիսից շուտ փողոց դուրս եկողը չեն: Երեկ «Արդարություն» դաշինքի ներկայացուցիչ Ալբերտ Բազեյանը մեզ տեղեկացրեց, որ իրենք մեկ անգամ եւս կբանակցեն  Գեղամյանի հետ, որից հետո արդեն «Արդարություն» դաշինքը, հավատարիմ մնալով մինչեւ ապրիլի 12-ը համաժողովրդական շարժում սկսելու իր ծրագրին, ժողովրդին դուրս կհանի փողոց: Իսկ «Արդարություն» դաշինքի մի ներկայացուցիչ էլ Գեղամյանի հետ բանակցությունների անհրաժեշտությունը պայմանավորեց նրանով, որ իրենց պետք է Գեղամյանից երաշխիքներ ստանալ, որ եթե անգամ իրենց չեն միանալու՝ գոնե թիկունքից չեն հարվածի եւ չեն փորձի համաժողովրդական շարժումը խափանել:

«Եթե նա մեզ չի միանում, մեզ երաշխիքներ են պետք, որ նա այլեւայլ հայտարարություններով կամ գործողություններով չի շեղի շարժումը նախանշված ուղուց եւ թիկունքից հարված չի հասցնի: Մենք պարտավոր ենք նրա հետ ճշտել խաղի կանոնները»,-ասում է դաշինքի ներկայացուցիչը: Այսպիսով, ե՞րբ անել հեղափոխություն՝ ապրիլի՞ն, թե՞ մայիսին. ընդդիմության երկու թեւերի համար էլ հարցը, ըստ էության, փակված է: «Արդարություն» դաշինքը կողմ է ապրիլյան հեղափոխության եւ ժողովրդին փողոց դուրս գալու կոչով ժողովրդին դիմելու է մարտի 31-ին, իսկ «ԱՄ»-ն կողմ է մայիսյան հեղափոխության եւ, ըստ Գեղամյանի, ժողովրդին հեղափոխական կոչով իրենք կդիմեն ապրիլի 27-ին: Եթե, իհարկե, մինչ այդ «Արդարություն» դաշինքն արդեն իշխանափոխություն իրականացրած չլինի:

Նաիրա Զոհրաբյան