Սեյրան Օհանյանը հետապնդման մեջ է. Րաֆֆի Հովհաննիսյան

Երեկ Օհանյան-Րաֆֆի-Օսկանյան դաշինքի առաջնորդները բավական վճռական կեցվածք ունեին:

Նրանց մոտ չկար այլեւս նախօրեի այն շփոթվածությունը, որի մեջ ընկել էին ԼՂՀ պաշտպանության բանակի նախկին հրամանատար Սամվել Բաբայանի ձերբակալությունից հետո: Վերջինս ՕՐՕ դաշինքի եւ նախընտրական շտաբի փաստացի ղեկավարն էր եւ ողջ նախընտրական գործընթացներն ինքն էր կարգավորում: Երեկ երեկոյան «Հոգեւոր Հայաստանի» համաժողովում Սեյրան Օհանյանն ու Րաֆֆի Հովհաննիսյանը հայտարարեցին, թե Ս. Բաբայանի իրավունքները պաշտպանելու համար դաշինքը գնալու է մինչեւ վերջ: «Չենք թողնելու, որ այս իշխանություններն իրենց շինծու գործերով հասնեն իրենց ուզածին»,- հայտարարեց Ս. Օհանյանը:

Հիշեցնենք, որ Ս. Բաբայանը մարտի 22-ին ձերբակալվել է Ազգային անվտանգության ծառայության կողմից Վրաստանից Հայաստան անօրինական կերպով «Իգլա» տեսակի զենիթահրթիռային համակարգ ձեռք բերելու եւ տեղափոխելու կասկածանքով: Նա այժմ գտնվում է ԱԱԾ մեկուսարանում: Երեկ Բաբայանի ղեկավարած ՕՐՕ-ն հրավիրված էր «Հոգեւոր Հայաստան» նախաձեռնության համաժողովին, որտեղ դաշինքի ղեկավար Սեյրան Օհանյանը բավական կոշտ ելույթ ունեցավ: Ըստ Օհանյանի` տարիներ ի վեր մարդիկ գործել ու գործում են «բաժանիր, որ տիրես» սկզբունքով: «Արատավոր երեւույթները շարունակական են նաեւ մեր դաշինքի նկատմամբ, տարբեր բռնություններ, ստիպողական գործողություններ, Ջրառատի դեպքերը: Վերջին արտահայտությունը Ս. Բաբայանի նկատմամբ էր՝ չհասկանալով, որ նա մեր մարտական ընկերն է, մեր գաղափարակից ընկերը: Ս. Բաբայանն Արցախյան ազատամարտում իր ընկերների հետ հաղթանակ է ապահովել։ Նա Արցախի հերոս է»,- հայտարարեց է Ս. Օհանյանը։

«Արցախի հերոս, գեներալ Սամվել Բաբայանը հանդիսանում է Հայաստանի իշխանությունը բռնազավթած այս խմբակի հերթական քաղաքական բանտարկյալը: Ինքը արժեք լինելով՝ նաեւ զսպում է թշնամուն։ Եվ այսօր ես կարող եմ ասել, որ մեր դաշինքը հանձնառու է մինչեւ վերջ պաշտպանել գեներալ Բաբայանի իրավունքները, թեեւ ինքը մեր պաշտպանության կարիքը չունի, եւ ավելին՝ կիսատ մնացած հաղթանակները պատրաստ ենք ի կատար ածել այս անգամ։ Մեր առջեւում է աննախադեպ մի շրջան։ Հայաստանը, հայ մարդն իր ամբողջությամբ պետք է ազատագրվի, այս ազատագրման օրը եթե ընտրությամբ է, կլինի ապրիլի 2-ը, եթե ոչ՝ ապրիլի 3-ից սկսած»,- համաժողովից հետո իր հերթին ասաց Րաֆֆի Հովհաննիսյանը:

Վերջինիս խոսքերով, Բաբայանի ձերբակալությամբ իշխանությունները բացահայտել են իրենց դաշինքի ու հենց նրա նկատմամբ ունեցած վախը: «Բայց չի հաջողվի, իրենք են վախի մեջ։ Այս անգամ ունենք այն հավաքականը, որը գնալու է մինչեւ վերջ։ Պիտի օգտագործենք ընդվզման եւ ինքնապաշտպանության բոլոր եղանակները՝ ապահովելու հայ ժողովրդի քվեն ու արժանապատվությունը»,- ասում էր Ր. Հովհաննիսյանը:

Իսկ եթե հետընտրական զարգացումներ լինեն, ըստ նրա` դրանք կլինեն սահմանադրական բոլոր եղանակներով: Դա կլինի քաղաքացիական ու քաղաքական բոլոր ուժերի հեղափոխություն, դիմադրություն, եթե իշխող կուսակցապետությունը նորից դիմի իր կեղծիքի, բռնության մեքենային։ Հարցին՝ ինչո՞ւ ձերբակալվեց հենց Բաբայանը եւ ոչ թե ինքը կամ Օհանյանը, Հովհաննիսյանը պատասխանեց, որ Սեյրան Օհանյանը հիմա փաստացի հետապնդման մեջ է»։ Իսկ հնարավո՞ր է, որ հաջորդը Օհանյանին ձերբակալեն, քանի որ խոսվում է, թե նա էլ ներգրավվելու է ինչ-որ քրեական գործում, պատասխանեց. «Թող ռիսկ անեն»։ Վերջինս նաեւ անդրադարձավ այն հրապարակումներին, թե Սամվել Բաբայանը պատրաստվում էր «Սասնա ծռեր-2» ապստամբություն իրականացնել: Որոշ տեղեկությունների համաձայն՝ նա անգամ նման բացահայտ հայտարարություն է արել իր կողմնակիցների մոտ, ինչի մասին անմիջապես իշխանություններին տեղյակ են պահել նրա շրջապատում եղած այսպես ասած՝ գործակալները: Եվ իզուր չէ, որ կալանավայրերում գտնվող Ժիրայր Սեֆիլյանն ու «Սասնա ծռերի» անդամները ողջունել են Ջրառատի դեպքերի ժամանակ ՕՐՕ-ի դիրքորոշումը: Այնուամենայնիվ, դաշինքում Բաբայանը նման սցենարի վերաբերյալ խոսակցություն վարե՞լ է: «Նման միջոցառում չկար, արյունահեղության ճնշման բոլոր նախաձեռնությունները պարոն Սարգսյանի եւ իր կուսակցության կողմից են, մեզ մնում էր ինքնապաշտպանվել՝ որպես քաղաքացիներ: Բայց  որ զորակցություն ենք ստանում մեր դիրքորոշման համար ամենատարբեր անկյուններից, այդ թվում՝ Սեֆիլյանից եւ մյուս քաղբանտարկյալներից, ցույց է տալիս, որ այս անգամ հանձնառու ենք փողոցում, ընտրատեղամասում ու բանտում տանել մեր պայքարը, որ ազատվենք այս ռեժիմից»,- եզրափակեց նա։