Ակնհայտ էր, որ Նիկոլ Փաշինյանը ֆալշ էր երգում. Արմեն Աշոտյան

«Անդրանիկ Մարգարյանի» անվան ՀՀԿ-ի քաղաքական դպրոցում սովորել են նաեւ ընդդիմադիր քաղաքական ուժեր ներկայացնող երիտասարդներ, որոնք ակտիվորեն ներգրավված են եղել խորհրդարանական ընտրությունների ժամանակ իրենց քաղաքական ուժերի քարոզարշավներում: Այս մասին ՀՀԿ կենտրոնական գրասենյակում այսօր հրավիրած մամուլի ասուլիսի ժամանակ հայտարարեց ՀՀԿ փոխնախագահ Արմեն Աշոտյանը:

Հարցին՝ հատկապես ո՞ր քաղաքական ուժից են եղել այդ ուսանողները, Արմեն Աշոտյանը պատասխանեց. «Ես չեմ կարող բացահայտել դա, որովհետեւ դրա իմաստը չեմ տեսնում, բայց դա թաքուն չի եղել, որովհետեւ նույն ֆեյսբուքում, հետեւելով բոլոր ունկնդիրների գործունեությանը, ես ֆիքսել եմ դա»: Դիտարկմանը, թե ֆեյսբուք սոցիալական ցանցում եւ լրատվամիջոցներում նշվում էր, որ այդ երիտասարդները հիմնականում եղել են «Ելք» դաշինքի ներկայացուցիչներ, ՀՀԿ փոխնախագահն այսպես արձագանքեց. «Այդ հարցը մտածել էիք գալո՞ւց, թե՞ տեղում ծնվեց: Չեմ ուզում միանալ «Ելք»-ին իշխանության հետ կապող շրջանակների գործունեությանը եւ ասեմ, որ այդ երիտասարդները մասնակցել են մեկից ավելի ընդդիմադիր քաղաքական ուժերի քարոզարշավին»:

Անդրադառնալով Երեւանի ավագանու ընտրություններին մասնակցող «Ելք» դաշինքի քաղաքապետի թեկնածու Նիկոլ Փաշինյանի երաժշտական կատարման վերաբերյալ հնչած այն հարցին, թե չե՞ք պատրաստվում Նիկոլ Փաշինյանի համար երգ գրել, Արմեն Աշոտյանը պատասխանեց. «Ես, որպես Տարոն Մարգարյանի շտաբի քարոզչության պատասխանատու, հետեւում եմ ավագանու ընտրություններին մասնակից քաղաքական ուժերի նախապատրաստական աշխատանքներին: Ակնհայտ է, որ մեզանից բացի երկու ուժ արդեն սկսել է իր քարոզարշավը՝ այդ թվում նաեւ «Ելք» դաշինքը: Չեմ ուզում լծվել այն աշխատանքին, որը ենթադրում է քարոզարշավից առաջ քարոզչական կամ հակաքարոզչական բնույթի հայտարարություններ անել անգամ քաղաքական մրցակիցների հանդեպ, ում մենք հարգում ենք»: Արմեն Աշոտյանի խոսքով՝ մինչեւ քարոզարշավի պաշտոնական մեկնարկը՝ ապրիլի 21-ը, զերծ են մնում քարոզչության վերաբերյալ հարցերին անդրադառնալուց:

«Եթե ձեր հարցը ստեղծագործական բաղադրիչ ուներ իր մեջ, ապա կարծում եմ, Ազգային ժողովում մենք հնարավորություն կունենանք ե՛ւ Նիկոլ Փաշինյանի, ե՛ւ այլ քաղաքական գործիչների հետ համատեղ գործունեության՝ օրինաստեղծ, արտաքին կապեր եւ այլն: Եթե կարիք լինի նաեւ երաժշտական փաթեթավորման, ես կգտնեմ այն մարդկանց, ում կարող եմ փոխանցել իմ էմոցիաները՝ բանաստեղծությունների եւ երաժշտության տեսքով, որ իրենք լավագույնս կարտահայտեն այն, ինչ որպես հեղինակ ես կդիտեմ այս կամ այն երգը գրելիս»,- նշեց Արմեն Աշոտյանը:

Հարցին՝ Տարոն Մարգարյանի ձայնային տվյալներն ինչպիսի՞ն են, հնարավո՞ր է նրա համար երգ գրեք եւ երեւանցիները լսեն նրան, ՀՀԿ փոխնախագահը պատասխանեց. «Ես երաժշտական կրթություն չունեմ, չեմ գնահատի երեկվա տեսահոլովակի այսպես ասած թիզը, բայց ակնհայտ էր, որ ֆալշ էր երգում: Դե բոլորդ լսեցիք դա: Ողջունելի է, երբ մարդ անկաշկանդ է, կրեատիվ է, այս տեսակետից… հիմա գովե՞մ: Գովեմ, կասեն իշխանությունների պրոյեկտն է «Ելք»-ը, ուզո՞ւմ եք գովեմ: Գովեմ, եթե ձեզ պետք է: Անպայման գովեմ, գովեմ, նամանավանդ, որ գովալու տեղ պարբերաբար լինում է, ինչպես նաեւ՝ քննադատելու»: Արմեն Աշոտյանն, ամեն դեպքում, չպատասխանեց հնչած հարցին:

Անդրադառնալով ավագանու ընտրությունների առաջադրված թեկնածուներին, ՀՀԿ փոխնախագահը նշեց, որ նրանց կազմից քաղաքապետի թեկնածուները երիտասարդ են եւ դա իրենց ուրախացնում է, որովհետեւ դա այն տարիքն է, երբ փորձը եւ էնտուզիազմը հնարավոր է միահյուսել: