Թուրքիան վտանգավոր է դարձել, հեռու մնալը Հայաստանի համար բարեբախտություն է. Բ. Էստուկյան

«Միգուցե բարեբախտություն է, որ Հայաստանն ու Թուրքիան չեն հաստատել բարիդրացիական հարաբերություններ: Եթե դրացին բարի չէ՝ լավ է, որ բարիդրացիական հարաբերություններ չլինեն»,- այսօր «Մեդիա կենտրոնի» տեսակապի միջոցով այս մասին հայտարարեց Թուրքիայում լույս տեսնող «Ակոս» թերթի հայկական բաժնի խմբագիր Բագրատ Էստուկյանը՝ հավելելով, որ եթե մինչեւ այժմ կարծում էինք, որ Հայաստան-Թուրքիա սահմանի բացումը նպաստելու է երկու երկրների ժողովուրդների զարգացմանն ու բարգավաճմանը, ապա Թուրքիայում տեղի ունեցած սահմանադրական հանրաքվեից հետո համոզված է, որ հեռու մնալն ավելի ճիշտ է:

Բացատրելով իր այս կարծիքը՝ Էստուկյանը համոզմունք հայտնեց, որ որպես նախագահական երկիր՝ Թուրքիան դարձել է ավելի վտանգավոր:

Թուրքագետ Լեւոն Հովսեփյանն էլ նշեց, որ ինքը հայ-թուրքական հարաբերությունների դրական ուղղությամբ զարգացման հիմքեր չի տեսնում. «Թուրքիայի հակահայկական, հակահայաստանյան քաղաքականությունը կշարունակվի եւ ես հիմքեր չեմ տեսնում դրական առումով հայ-թուրքական հարաբերությունների հետ կապված, որովհետեւ որեւէ բազա այս առումով չի մնացել: Միգուցե ավելի կխորանա հակահայաստանյան դիրքորոշումը նաեւ արցախյան հիմնախնդրով պայմանավորված»,- հավելեց թուրքագետը:

Հիշեցնենք, որ կիրակի օրը անցկացրած սահմանադրական փոփոխությունների հանրաքվեով Թուրքիան անցում կատարեց նախագահական կառավարման համակարգին: Թուրքիայի նախագահ Ռեջեբ Թայիփ Էրդողանի այս նախաձեռնությանը կողմ քվեարկեց հանրաքվեի մասնակիցների 51,2 տոկոսը, դեմ՝ 48,8 տոկոսը:

Այսուհետ Էրդողանն ունենալու է բանակի, գլխավոր շտաբի, կառավարության անդամների վրա ուղղակի ազդեցություն: Նա միանձնյա տնօրինելու է երկրի բյուջեն: Ավելին, նախագահին անվստահություն հայտնելու ինստիտուտն է հանվել, իսկ Էրդողանն ինքը մինչեւ 2029 թվականը նախագահ լինելու տեսական հնարավորություն է ունենում: