«ՕՐՕ» դաշինքը կդառնա՞ մեկ կուսակցություն. առաջնորդները մասնավոր հանդիպումներ են ունենում

«Օհանյան-Րաֆֆի-Օսկանյան» դաշինքի համակիր Ազատ Արշակյանը կարծում է, որ դաշինքին մաս կազմող քաղաքական ուժերն ու անհատները մեկ կուսակցության մեջ միավորվելու համար պետք է իրենց ծրագրերը նույնական դարձնեն: Այս մասին Ազատ Արշակյանն ասաց armtimes.com-ի հետ զրույցում` անդրադառնալով «ՕՐՕ»-ի մեկ կուսակցություն դառնալու հեռանկարին:

Նշենք, որ երեկ «Ազատություն» ռադիոկայանի եթերում «Ժառանգություն» կուսակցության նախագահ Րաֆֆի Հովհաննիսյանն ասել էր, որ կուսակցությունը պետք է խոշորանա: «Շարքային քաղաքացու համար գաղտնիք չէ, որ սրանք չընտրություններ էին, որտեղ թիրախավորված էր մեր դաշինքը՝ հայտնի պատճառներով, և եղավ այն՝ ինչ եղավ: Զարգացումները ցուցանում են որպես պատգամ՝ թե՛ կեղծված ընտրությունները, թե՛ կեղծված հանրաքվեն, թե՛ Ընտրական օրենսգիրքը , թե՛ վերջին ընտրությունը, որ կուսակցությունը պետք է գնա խոշորացման: «Ժառանգությունն» այդ գիտակցումն ունի»,- ասել էր Րաֆֆի Հովհաննիսյանը՝ նշելով, որ «Օհանյան-Րաֆֆի-Օսկանյան» դաշինքի մյուս առաջնորդների հետ հանդիպել է և «Ժառանգություն» կուսակցությունը հունիսի վերջին համագումար կհրավիրի:

Ազատ Արշակյանը նկատում է, որ նախընտրական փուլում համագործակցելով, եթե նույնիսկ Ազգային ժողովում հայտնվեին, ապա շատ հնարավոր էր, որ միասին չգործեին՝ ելնելով ծրագրային տարբերություններից, անհատների ամբիցիաներից:

«Որոշակի ծրագրերի համար խոշորացում, համագործակցություն կարող է լինել նաեւ այլ կազմակերպությունների հետ: Համագործակցությունը միշտ կարելի է ենթադրել, երբ որ կա նպատակ, կա ծրագիր, կա գաղափարախոսություն: Ես կարծում եմ՝ «Համախմբումը»  եւ «Ժառանգությունը» նույնը չեն, որպեսզի նրանք միանան, բայց եթե նրանք որոշում կայացնեն նույն ծրագիրը մշակեն, նույն նպատակը ունենան, ներքին քաղաքական կարիերայի, անհատների հարցերը լուծեն, ինչու չէ՝ կարող են միանալ: Հնարավոր է, եթե նպատակ կա»,- ասաց Ազատ Արշակյանը:

Հարցին՝ եթե չհամախմբվեն մեկ կուսակցություն դառնալով, ապա առանձին-առանձին գործելով ինչի՞ կհասնեն, նա պատասխանեց. «Առանձին-առանձին կգործեն այնքան ժամանակ մինչեւ որ միասնական նպատակ ձեւավորվի, բայց հենց այնպես, «քանի որ իշխանությունը մեզ դուր չի գալիս, պետք է միավորվենք», այսպես չի կարող լինել: Պետք է նպատակ լինի: Ես կարծում եմ, որ հետագայում կարող է հավաք լինել, մոբիլիզացիա լինել եւ շատ քաղաքացիներ, որոնք քաղաքականությունից դուրս են ինչ-ինչ պատճառներով, նրանք էլ կարող են միանալ այդ շարժմանը: Վերջին հաշվով ԱԺ-ում գործող քաղաքական ուժերն էլ կարող են մասնակից լինել, դա կլինի համազգային շարժում, ես այդպիսի բան, անկեղծ ասած, պատկերացնում եմ»:

Ազատ Արշակյանի խոսքով՝ նախընտրական փուլում, երբ ձեւավորվեց «ՕՐՕ» դաշինքը, ընտրությունների ժամանակ իրենց համար ոչ ցանկալի ելքի դեպքում «պլան Բ» չեն ունեցել: Այսինքն՝ համոզված են եղել, որ հայտնվելու են խորհրդարանում: «Մեր ազգը բնութագրող մի բնավորություն կա, որ մենք միշտ ենթադրում ենք՝ ձախողման դեպքում ինչ ենք անելու: Այս անգամ պլանավորել էինք՝ հաղթանակից հետո` ինչ ենք անելու: Ես գոնե տեղյակ չեմ, բայց դա պարադոքսալ բան է: Մենք գիտենք պարտության դեպքում ում, որտեղ ենք թաղելու, ինչ ատյանների ենք դիմելու արդարությունը վերականգնելու համար, բայց այս անգամ «ՕՐՕ»-ն չէր պատրաստվել պարտության»:

«Համախմբում» կուսակցության մամուլի քարտուղար Արեգնազ Մանուկյանն էլ մեր զրույցում ասաց, որ «ՕՐՕ» դաշինքի առաջնորդների մասնակցությամբ մասնավոր հանդիպումներ երբեմն լինում են, բայց հետագա կոնկրետ քայլերի մասին որևէ տեղեկություն ինքը չունի: Հարցին՝ քննարկվե՞լ է արդյոք դաշինքի մասնակիցների հետ մեկ կուսակցություն ստեղծելու հեռանկարը, Արեգնազ Մանուկյանը պատասխանեց. «Քանի որ հանդիպումները մասնավոր բնույթ են կրել, դրանց բովանդակության մասին ես տեղյակ չեմ»:

«Օհանյան-Րաֆֆի-Օսկանյան» դաշինքը ձեւավորվեց խորհրդարանական ընտրություններից առաջ` 2017 թվականի փետրվարի 13-ին: Համագործակցության հուշագիրն այդ օրը ստորագրեցին ՀՀ պաշտպանության նախկին նախարարը՝ Սեյրան Օհանյանը, արտաքին գործերի նախկին նախարար Րաֆֆի Հովհաննիսյանը եւ արտաքին գործերի նախկին նախարար Վարդան Օսկանյանը: Ապրիլի 2-ին կայացած խորհրդարանական ընտրություններում «ՕՐՕ» դաշինքը ստացավ 32 հազար 508 ձայն եւ չկարողացավ հաղթահարել ԱԺ-ում հայտնվելու անցողիկ շեմը: Ընտրություններից հետո դաշինքը հրապարակային գործունեություն չի ծավալել: