Հայ մարզիչն ու ֆուտբոլիստը ՌԴ-ում գոլեր են խփել, նայել Կոնֆեդերացիաների գավաթի եզրափակիչը

ՀՖՖ Տեխնիկական կենտրոնի 12 տարեկանների թիմի մարզիչ Լեւոն Ղասաբօղլյանը մեծ տպավորություններով ու նոր գիտելիքներով է վերադարձել ՌԴ-ում տեղի ունեցած «Ֆուտբոլը բարեկամության համար» ծրագրից: Հունիսի 26-ից հուլիսի 3-ը ՖԻՖԱ-ի եւ ՈՒԵՖԱ-ի հովանու ներքո անցկացված ծրագրին նա մասնակցել է իր սանի՝ 12-ամյա հարձակվող Էդգար Ասլանյանի հետ: Ընդհանուր առմամբ հրավիրված են եղել 64 երկրների 1-ական ֆուտբոլիստ եւ 8 մարզիչ: Armtimes.com-ի հետ զրույցում Լեւոն Ղասաբօղլյանը պատմեց իրենց ուղեւորության մասին:

«Ֆանտաստիկ, բարձր մակադրակով էր կազմակերպված: Շատ տպավորված եմ: Ամենակարեւորը, որ կազմակերպիչները շատ սրտացավ էին: Երեխաներն անմիջապես սկսեցին շփվել միմյանց հետ: Ազատ ժամանակ գրեթե չունեին: Առավոտյան մարզվում էին, որից հետո հետաքրքիր ժամանց էին անցկացվում, նրանց համար տարբեր խաղեր էին կազմակերպում: Այդպես մինչեւ երեկո, ընթրիքից հետո նրանք պարզապես խաղում էին իրար հետ առանց մարզիչների ու կազմակերպիչների, միասին ֆուտբոլ էին նայում: Իրոք ֆուտբոլը բարեկամություն է ստեղծում: Ու հետաքրքիրն այն էր, որ նույնիսկ միմյանց հետ խնդիրներ ունեցող երկրների ներկայացուիցչները հիանալի շփվում էին իրար հետ, զվարճանում»,- պատմեց նա:

Մարզիչները նույնպես չեն ձանձրացել: Նրանք արդյունավեռտ շփում են ունեցել: Լեւոն Ղասաբօղլյանն ընդգծում է, որ մեծ փորձ է կուտակել: Գիտելիքներ ձեռք բերելու հիանալի հնարավորություն է ստացել եւ փորձել է ոչ մի վայրկյան անտեղի չկորցնել, օպտիմալ օգտագործել Ռուսաստանում անցկացրած ժամանակը:

«Մարզիչների համար առանձին սեմինարներ չկային, բայց հավաքվում էինք, տարբեր թեմաներ էինք քննարկում: Հիանալի փորձի փոխանակում էր: Շատ բան եմ սովորել: Այդ գիտելիքները հնարավոր չէ համեմատել կամ փոխարինել որեւէ բանի հետ: Շատ շնորհակալ եմ Հայաստանի ֆուտբոլի ֆեդերացիային, որ  ինձ ուղարկեցին»,- ասաց նա:

«Ֆուտբոլը բարեկամության համար» ծրագրին հրավիրված 64 ֆուտբոլիստներն ու մարզիչները բաժանվել են 8 թիմի, որոնց միջեւ հուլիսի 1-ին  բլից մրցաշար է տեղի ունեցել: Լեւոն Ղասաբօղլյանին բաժին է հասել դեղին թիմը (թիմերը բաժանված են եղել ըստ գույների), որի կազմում եղել է մեկական հնդիկ, հարավկորեացի, սլովակ, պակիստանցի, իսլանդացի, վենեսուելացի խաղացող, ինչպես նաեւ իր սանը՝ Էդգար Ասլանյանը:

«1-ին հանդիպման ընթացքում շատ լավ խաղացինք եւ հաղթեցինք 2:0 հաշվով: Էդգարը հեռվից շատ գեղեցիկ գոլ խփեց: 2-րդ խաղում՝ կիսաեզրափակչում, կարճ ժամանակահատվածում 3 գոլ բաց թողեցինք, բայց երեխաներին հաջողվեց հավասարեցնել հաշիվը: Վերջին վայրկյաններին եւս 1 գոլ բաց թողեցինք ու չկարողացանք եզրափակիչ դուրս գալ»,- պատմեց նա:

^{Լեւոն Ղասաբօղլյանը նույնպես ֆուտբոլ է խաղացել: Մարզիչների (տեսանյութում մանուշակագույն մարզահագուստով) ու մասնակից երկրների պատվիրակների միջեւ ընկերական հանդիպում է անցկացվել: Հանդիպումն ավարտվել է մարզիչների 4:1 հաշվով հաղթանակով: Իր թիմի 3-րդ գոլը խփել է Լեւոն Ղասաբօղլյանը:}

«Ֆուտբոլը բարեկամության համար» ծրագիրն անցկացվել է Կոնֆեդերացիաների գավաթի 2017 թ. խաղարկությանը զուգահեռ: Հուլիսի 2-ին մասնակիցները Սանկտ Պետերբուրգի «Կրեստովսկի» մարզադաշտում Չիլի-Գերմանիա եզրզփակիչ հանդիպումը դիտելու հնարավորություն են ստացել (0:1):

«Ֆանտաստիկ տպավորություններ են: Որքան ասեմ, դրանից մի քանի անգամ ավելի կարող եք պատկերացնել: Խաղադաշտին մոտ էինք նստած, խաղի շունչն զգացվում էր: Ես ու Էդգարը սկզբում Չիլիին էինք աջակցում, բայց հետո հասկացանք, որ Գերմանիան շատ ուժեղ ֆուտբոլ է խաղում: Գերմանիան դուրս էր եկել՝ սպասելու մինչեւ Չիլին կսխալվի, ոչինչ չէին ուզում ձեռքնարկել, այնքան սպասեցին, մինչեւ մրցակիցը սխալվեց: Նրանց հաղթանակի հարցում մարզչի դերը շատ մեծ էր. մրցաշարի սկզբում նրանք այն ֆուտբոլը չէին խաղում, բայց այս շաբաթների ընթացքում մարզիչն այնպիսի թիմ ստեղծեց... դա մարզչի հզորությունն է ու բարձր ինտելեկտը»,- ասաց Լեւոն Ղասաբօղլյանը:

«Գազպրոմի» հիմնադրած «Ֆուտբոլը բարեկամության համար» ծրագրին Հայաստանը 2-րդ անգամ էր մասնակցում: 2016 թ. ՀՀ-ն ներկայացրել էր ՀՖՖ Տեխնիկական կենտրոնի 12-14 տարեկան 8 ֆուտբոլիստից բաղկացած թիմը: