15 դպրոցի տնօրեն ահազանգում է. մարզպետարանի պաշտոնյան չարաշահում է պաշտոնեական դիրքը

«Հայկական ժամանակ»-ի խմբագրությունը չստորագրված նամակ է ստացել Արարատի մարզի թվով 15 դպրոցների տնօրենների անունից, որոնք պնդում են, որ Արարատի մարզպետարանի ներքին աուդիտի բաժնի պետ Սուրեն Քարամյանը պարտադրում է, որ դպրոցի տնօրեններն իր անվան հետ կապվող ընկերությունից գնեն «A4» ֆորմատի թղթեր:

Նամակում, մասնավորապես, ասված է. «Այսպես՝ Արարատի մարզպետարանի ներքին աուդիտի բաժնի պետ Սուրեն Քարամյանը՝ խախտելով Քաղաքացիական ծառայության եւ Ներքին աուդիտի մասին օրենքները, զբաղվում է ձեռնարկատիրական գործունեությամբ (ճիշտ է, ոչ իր անունով), այն է՝ մարզպետարանի ենթակայությամբ կազմակերպությունների զգալի մասի տնօրեններին պարտադրվում է իր միջոցով գնել A4 ֆորմատի թղթեր, այլ ոչ թե յուրաքանչյուր կազմակերպությանը մոտ գտնվող խանութներից: Դե, քանի որ ստուգող բաժնի պետ է, լռակյաց, բայց դժկամությամբ կատարում ենք նրա պահանջը»,- ասված է նամակում: Նշենք, որ նամակի սկզբնամասում ասվում է, որ այն խմբագրությանն է ուղղված մարզի թվով 15 դպրոցի տնօրենի անունից, սակայն որեւէ հասցե եւ անուն- ազգանուն նշված չէ: Հասկանալի է, դպրոցի տնօրենները կարող են անհանգստանալ ներքին աուդիտի տակ ընկնելու ռիսկից:

Դպրոցների տնօրենները անանուն նամակում նաեւ նշում են, որ իրենք լսել են, թե ինչպես է Սուրեն Քարամյանը նաեւ անհարգալից խոսում դպրոցների աշխատակիցների հետ, սակայն որեւէ փաստական հանգամանք նամակում նշված չէ: «Միաժամանակ տեղեկացնում ենք ձեզ, որ օրեր առաջ այդ մասին ահազանգել ենք Արարատի մարզպետ պարոն Ա. Գրիգորյանին, ՀՀ վարչապետին, սակայն ձայն բարբառո անապատի, եւ ստիպված էինք դիմել խմբագրություն»,- ասված է  նամակում: Խնդրի վերաբերյալ զրուցեցինք Սուրեն Քարամյանի հետ:

- Պարոն Քարամյան, դպրոցի տնօրեններ են դիմել մեզ, պնդելով, որ ստիպում եք իրենց A4 ֆորմատի թղթերը ձեռք բերել բացառապես ձեր անվան հետ կապվող ընկերությունից:

- Նման բան չի կարող լինել, ոչ մի տնօրեն չի կարող ասել, որ ես ինչ-որ մեկին պարտադրել եմ կամ ասել եմ իմ ընկերությունից կամ իմ խանութներից ձեռք բերել: Նման բան չի կարող լինել, ես ձեզ դա 100 տոկոսով կարող եմ ասել:

- Դուք ունե՞ք խանութ:

- Ես 20 տարի է խանութ եմ ունեցել, բայց նման բան չի եղել, որ ինչ-որ մեկը պարտադրի, դա սուտ տեղեկություն է: Ոչ մի տնօրեն չի ասի նման բան, որ պարտադրանք է եղել, հիմա որ խանութ է, գնել են, թե չեն գնել, ես ձեզ չեմ էլ կարող հստակ ասել:

- Բայց դուք ունե՞ք խանութ:

- Իմ անունով չունեմ, բայց խանութ ունենք:

- Արարատո՞ւմ է:

- Այո, Արարատի մարզում է, բայց ոչ մի անգամ ոչ մեկի կողմից պարտադրանք չի եղել, որովհետեւ դրա կարիքն ընդհանրապես չկա: Ասեմ, որ 3-4 ամիս է այդ գործունեությամբ չենք զբաղվում:

- Այսինքն՝ խանութը փակվե՞լ է:

- Դա եղել է հունվար-փետրվար ամսին, դրանից հետո այդ գործով ընդհանրապես չենք զբաղվել:

- Խանութը փակվե՞լ է:

- Խանութը չի փակվել, բայց ուրիշ բաներ է վաճառվում: Ոչ մի տնօրեն չի ասի, որ ինչ-որ մեկին պարտադրվել է: Դա սուտ հերյուրանք է:

Արարատի մարզպետարանի ներքին աուդիտի բաժնի պետ Սուրեն Քարամյանի անունը մամուլում վերջին շրջանում հաճախ է հոլովվում: «Հրապարակ» օրաթերթը նախորդ ամիս գրել էր, որ Արարատի մարզպետ Արամայիս Գրիգորյանն իր դեմ է հանել անգամ մեր սփյուռ­քահայ հայրենակիցներին: «Արդեն մի քա­նի ամիս է՝ մարզում հաշվեհարդար են տեսնում Հովիկ Աբրահամյանի թիմակից­ների նկատմամբ, աշխատանքից ազատ­վում են դպրոցի տնօրեններ, մարզպե­տարանի աշխատակիցներ, որոնց մասին մամուլը գրում է: Վերջերս էլ մարզպետարանի կողմից իրականացված աուդիտի արդյունքում ազատվեց Արտաշատի Հայկազ Ճգնավորյանի անվան թիվ 5 դպրոցի տնօրեն Ռուզաննա Հայրապետյանը»,- գրել էր թերթը:

2016 թվականի սեպտեմբերին Արարատի մարզի Կանաչուտ գյուղի գյուղապետի ընտրությանն էլ մասնակցել է Սուրեն Քարամյանի կինը՝ Նարինե Քարամյանը: Ընտրությանը օրը Քարամյանի եւ գործող գյուղապետի կողմնակիցների միջեւ բախում էր տեղի ունեցել: Ընտրության արդյունքում Քարամյանի կինը պարտվել էր գործող գյուղապետին: