«Հորիզոն-2020»-ին ներկայացվել է 93 գիտական ծրագիր, 14-ը՝ ֆինանսավորվել 1.3մլն եվրոյի չափով

Հայաստանը Եվրոպական Միության հետազոտությունների եւ նորարարության ֆինանսավորման «Հորիզոն-2020» ծրագրի ասոցացված անդամ է արդեն շուրջ մեկ տարի:

Այս անդամակցությունը գիտության ոլորտի պատասխանատուներին հիմք էր տալիս հույս հայտնելու, որ Հայաստանում գիտությունը որոշակի զարգացում կունենա, եւ կլուծվեն դրան խոչընդոտող բազմաթիվ ֆինանսական խնդիրներ:

Գիտության պետական կոմիտեի նախագահի տեղակալ Վարդան Սահակյանից տեղեկացանք, որ նախորդ մեկ տարվա ընթացքում «Հորիոզոն-2020»-ին ներկայացվել է 93 հայտ, որոնցից 14-ը ֆինանսավորվել են: Այդ դրամաշնորհների ընդհանուր ծավալը կազմում է 1.3 միլիոն եվրո:

«Այս առումով կա հետաքրքիր վիճակագրություն: Մեր ներկայացրած ծրագրերի հաջողության գործակիցը կազմում է 15.1 տոկոս, որը ավելի բարձր է, քան թե եվրոպական միջինը, որը 13.3 տոկոս է ու նաեւ ավելի բարձր է, քան թե ասոցացված երկրներինը, որը 14.6 է»,- գոհունակությամբ նշեց Վարդան Սահակյանը:

«Մեր գնահատմամբ, մինչեւ այսօր Հայաստանի մասնակցությունը բավականաչափ բարեհաջող է ընթանում: Հիմա մեր ակտիվությունը երկու ուղղությամբ ենք կազմակերպել՝ մեկը գիտական համայնքի հետ համապատասխան աշխատանք ենք տանում, որպեսզի «Հորիզոն 2020»-ին հայտեր ներկայացվեն եւ երկրորդը՝ Եվրոպական Միության պատասխանատուների հետ բանակցություններ են վարվում, որպեսզի ասոցացված անդամների համար հայտարարվի առանձին ռեգիոնալ մրցույթ, որն ուղղված լինի մեզ համար ընդհանուր թեմատիկաների: Չգիտեմ՝ ինչ արդյունք կստացվի, բայց, համենայնդեպս, մենք լիահույս ենք, որ հնարավորություն կունենանք իրենց հետ պայմանավորվել այդպիսի մրցույթի իրականացման վերաբերյալ: Արեւելյան գործընկերության երկրները 6-ն են, որոնցից 4-ը՝ Հայաստանը, Վրաստանը, Մոլդովան եւ Ուկրաինան, ասոցացված անդամներ են: Մյուս երկուսը՝ Բելառուսը եւ Ադրբեջանը, ասոցացված անդամ չեն»,- հավելեց գիտության պետական կոմիտեի փոխնախագահը:

2017 թվականի օգոստոսի 24-ին ՀՀ կառավարության N1034-Ն որոշմամբ ստեղծվել է «Գիտական ծրագրերի ինտեգրման աջակցության կենտրոն» հիմնադրամը, որի հիմնական նպատակներից են «Հորիզոն-2020» ծրագրին Հայաստանի  համագործակցության համակարգումը, եվրոպական հանձնաժողովի կողմից ֆինանսավորվող ծրագրերի վերաբերյալ խորհրդատվության տրամադրումը:

«Հորիզոն-2020»-ն  իրականացվում է 2014 թվականից եւ գործելու է մինչեւ 2020 թվականը:Ծրագրի ընդհանուր ֆինանսական ծավալները կազմում են շուրջ 80 մլրդ եվրո: Ասոցացված անդամ երկրներից պահանջվում է որոշակի անդամավճար:

Գիտության պետական կոմիտեի նախագահ Սամվել Հարությունյանն ավելի վաղ մեր զրույցում նշել էր, որ Հայաստանի ֆինանսական ներդրումը 87.5 % զեղչի պայմաններում է: Այդպիսով, մեր երկիրը վճարել էր մոտավորապես 450 հազար եվրո: Առանց զեղչի, այդ գումարը կկազմեր 5 միլիոն եվրո: Սամվել Հարությունյանը հույս էր հայտնել, որ ներդրածի գոնե տասնապատիկը պետք է վերադառնա տարբեր ծրագրերի ֆինանսավորման տեսքով: