Բելառուս, Կիպրոս... սա է մեր մակարդակը. եւս մեկ ճշմարտություն Արթուր Պետրոսյան կողմից

Հայաստանի ֆուտբոլի ազգային հավաքականն ընկերական խաղում տպավորիչ հաշվով հաղթանակ տարավ Բելառուսի նկատմամբ: Երեկ՝ նոյեմբերի 9-ին, Վազգեն Սարգսյանի անվան «Հանրապետական» մարզադաշտում թիմը մրցակցի նկատմամբ առավելության հասավ 4:1 հաշվով: Սակայն այս հաշիվն էլ մոռացնել չի տալիս ֆուտբոլում առկա խնդիրները, ու չի վերացնում ապագայի վերաբերյալ մտավախությունները:

Ամեն անգամ մամուլի ասուլիսների ընթացքում Հայաստանի ֆուտբոլի ազգային հավաքականի գլխավոր մարզիչ Արթուր Պետրոսյանը թիմի մասին բարձրաձայնում է մի ճշմարտություն, որը ոմանք չեն տեսնում կամ չեն ցանկանում տեսնել: Շատերը մտովի Հայաստանը պատկերացնում է աշխարհի, Եվրոպայի առաջնությունների եզրափակիչ փոլերում ուժեղ թիմերի դեմ հավասարը հավասարի պայքարողի դերում: Սակայն ընտրանու մարզիչը ռեալ է գնահատում թիմի պոտենցիալը, ու այն պահից սկսած, ինչ գլխավորել է ընտրանին, 1 անգամ չէ, որ օբյեկտիվ հիմնավորումներ է բերել, թե ինչու պետք չէ երազանքների գիրկն ընկնել: Նախ մասնագետը չի թաքցնում, որ դժվարությունների ունի հավաքականի կազմն ընտրելու հարցում: Մենք այն երկրներից չենք, որոնք ընտրության մեծ հնարավորություններ ունեն: Ինչպես ինքն է նշում, 40-50 հոգուց բաղկացած ցուցակ չունենք:

«Թարմ արյուն է պետք», ասում է մասնագետը, բայց ընկերական խաղում, երբ մարզիչները փորձարկումներ անելու լայն հնարավորություններ են ստանում, նա ձեռքի տակ կա ընդամենը 2 նորեկ. երեկ Բելառուսի դեմ խաղում նորամուտը նշեցին Էրիկ Վարդանյանն ու Հայկ Իշխանյանը: Իսկ նոր սերունդը շարունակում է պարտվել: Օրինակ, վերջերս՝ նոյեմբերի 8-ին, մինչեւ 19 տարեկանների թիմը Եվրոպայի Մ-19 տարեկանների 2018 թ. առաջնության ընտրական փուլում 5:0 հաշվով զիջեց Չեխիային: Հոկտեմբերին էլ Եվրոպայի մինչեւ 17 տարեկանների 2018 թ. առաջնության ընտրական փուլում ՀՀ-ն 7:0 հաշվով պարտվել էր նույպես Չեխիայի տարեկիցներին: Եթե այս ֆուտբոլիստներն են փոխարինողները.... մնում է, որ մարզիչը տեսնի՝ արտասահմանում ինչ ֆուտբոլիստ կա, որի գոնե տատիկը, կամ հեռավոր բարեկամի հարեւանը հայկական ազգանուն ունի:

Մյուս խնդիրը, որի մասին,  Պետրոսյանը խոսել է, մանկապատանեկան ֆուտբոլն է: Աշխարհի 2018 թ. ընտրական փուլի խաղերում, հայ ֆուտբոլիստները պարբերաբար աչքի էին ընկնում տարրական սխալներով: Ասուլիսներից հետո մասնագետը նշում էր, որ նման սխալներից խուսափել ֆուտբոլիստներին պետք է սովորեցրած լինեին դեռ վաղ տարիքում: Փաստորեն մակապատանեկան ֆուտբոլում կա լավ մասնագետների պակաս:

Ի վերջո հասել է այն կետին, որ ունենք այն, ինչ ունենք: Երեկ հարցին, թե արդյո՞ք Կիպրոսի ու Բելառուս նման թիմերի հետ խաղալը զարգացման առումով նահանջ չէ Հայաստանի համար, Արթուր Պետրոսյանը տվեց այն պատասխանը, որը գուցե շատ երկրպագուներ չէին ցանկանա լսել: «Սա մեր մակարդակն է»,- ասաց նա ու ավելացրեց, որ Ազգերի լիգայի D դիվիզիունում, որտեղ պայքարը կարող է Եվրո 2020-ի ուղեգիր տալ, ՀՀ-ն նման թիմերի դեմ է խաղալու, հետեւաբար ճիշտ է նման ընտրանիների հետ խաղերում փորձել ուժերը:

Եթե աշխարհի 2018 թ. առաջնության ընտրական խաղերի ընթացքում ֆուտբոլիստներն ու մարզիչը խուսափում էին խոսել Ազգերի լիգայի մասին, ապա հիմա նրանք արդեն մտովի պատրաստվում են այդ մրցաշարին: Երեկ լրագրողների հետ զրույցում նրանք անընդհատ նշում էին, որ եվրոպական նոր մրցաշարում լավ հանդես գալն իրենց հիմնական նպատակն է: Խմբային փուլը սկսվելու է 2018 թ. սեպտեմբերին: Աշխարհի ու Եվրոպայի առաջնությունների ընտրական խաղերում ուժեղները եզրափակիչ փուլերի ուղեգրերին մոտենալ թույլ չեն տալիս, գուցե այսպես՝ մեր մակարդակի թիմերի դեմ պայքարում անհնարին թվացող երազանքը կատարվի, ու հավաքականը հայտնվի Եվրոպայի առաջնությունում:

Հ.Գ. Բելառուսը, որին երեկ ՀՀ-ն հաղթեց, Ազգերի լիգայում Հայաստանի հետ ընդգրկված է D դիվիզիոնում: