ՀՀԿ-ն որևէ մեկին ծառայություն մատուցելու կարիք չունի. քաղաքական անբարոյականության մասին

«Ելք»-ի իրավունքն է դիմել կառավարությանը, որպեսզի Վանաձորում արտահերթ ընտրություններ անցկացվեն: Խորհրդարանում լրագրողների հետ զրույցի ժամանակ ասաց ՀՀԿ խմբակցության ղեկավար Վահրամ Բաղդասարյանը:

«Իմ կարծիքով` առայժմ դրա անհրաժեշտությունը չկա, եթե քվորում կլինի ավագանու նիստերի ժամանակ, ապա բնականոն գործընթացով կգնա առաջ»,- ասաց նա:

Բաղդասարյանի խոսքով` Վանաձորի ավագանու նիստերը եղել են ՏԻՄ օրենքին համապատասխան, և, որ հակասությունը ՏԻՄ օրենքի և սահամանդրության հետ է կապված: «Դեպքերից առաջ պետք չէ ընկնել, եզրակացություններ անելու համար վաղ է»,- հայտարարեց նա:

Բաղդասարյանն անդրադարձավ նաև Փաշինյանի այն գնահատականին, որ Վանաձորի ավագանիում ՀՀԿ-ն քնած դշխուհի է, իսկ ՀՎԿ-ն փորձում է իր համբույրներով վերակենդանացնել նրան:

«Ես այդ գնահատակնների հետ համձայն չեմ. նոր քաղաքական պրոցեսներ են: Քաղաքական ուժերը եկել են համաձայնության, որ պետք է համագործակցեն, իսկ մնացածը ցույց կտա ապագան: Բոյկոտները հավերժական չեն, սպասեք իրադարձությունների զարգացմանը»,- ասաց նա:

Բաղդասարյանի կարծիքով` մյուս երկու քաղաքական ուժերն էլ պետք է մասնակցեն ավագանու նսիտերին: «Այսօր կա հուշագիր, նրանք կարող են իրենց ընդդիմադիր կեցվածքը պահպանել և պարտադրել, որ հաշվի նստեն իրենց քննադատությունների հետ, եթե նրանց նպատակն այն է, որ պարալիզացնեն ավագանու աշխատանքները, դրանով Վանաձորն ու վանաձորի քաղաքացին որևէ բան չեն շահի»,- ընդգծեց պատգամավորը:

Ինչ վերաբերում է հարցին` թե ՀՎԿ-ական Հեղինե Բիշարյանը հայտարարել էր` ով շեղվել է պայմանավորվածությունից անբարոյական է, իսկ պարզ է դառնում, թե հիմա ովքեր են անբարոյականները, ինչպե՞ս է ՀՀԿ-ն ստորագրել հուշագիր անբարոյականների հետ, նա ասաց.

«Հուշագիր ստորագրելով չի որոշվում` նախկինում ով է ձայն տվել, ով՝ ոչ: Մենք որևէ մեկին ծառայություն մատուցելու կարիք չունենք: Քաղաքականության մեջ, չեմ կարծում, որ բարոյականությունն այս չափանիշներով պետք է դատել: Որևէ մեկի ճակատին գրված չէ, որ պետք է լինի հավերժ ընդդիմություն կամ իշխանություն»,- եզրափակեց նա: