Ախալքալաքում մարդկանց 80%-ը տառապում է բանկերից վերցրած վարկերից. Սամվել Պետրոսյան

Վրաստանում հայաշատ Ախալքալաքի Շրջանային ժողովի բյուրոյի նիստի ժամանակ քննարկվել է «Հայրենասերների դաշինք» խմբակցության առաջադրած հարցը բանկերի բարձր տոկոսադրույքների եւ վարկառուների անելանելի իրավիճակի մասին: Որոշվել է հարցը չտեղափոխել Ժողովի լիագումար նիստ, բայց խնդրի լուծման այլ տարբերակ գտնել, գրում է jnews.ge-ն: 

Օրեր առաջ Ախալքալաքի խմբակցությունը պահանջեց, որ Սակրեբուլոն քննարկի եւ նախագիծ մշակի բանկերի վարկային քաղաքականության վերաբերյալ: Համապատասխան խնդրանքով Սակրեբուլոն նաեւ դիմի Վրաստանի կառավարությանը:

«Ժողովրդի մոտ 70-80 տոկոսը տառապում է բանկերից վերցրած վարկերից: Նախընտրական քարոզարշավի ժամանակ բոլոր գյուղերում այս խնդիրը բարձրացրել են: Հենց ժողովրդի խնդրանքով մենք նախագիծ մտցրեցինք Սակրեբուլո, որ խնդիրը քննարկենք եւ կարողանանք Սակրեբուլոյի որոշմամբ հարցը բարձրացնել կառավարության առջեւ, որպեսզի բանկերի օրենքի մեջ փոփոխություններ մտցվի, որ գոնե մի քիչ կարողանանք բարելավել ժողովրդի սոցիալական պայմանները»,- ասել է «Հայրենասերների դաշինք» խմբակցության ներկայացուցիչ Սամվել Պետրոսյանը:

Ախալքալաքի Սակրեբուլոյի իրավաբանական հանձնաժողովը բարձրացված խնդրի շուրջ ընդլայնված քննարկում իրականացրեց, որին մասնակցեցին Ախալքալաքում գործող երեք տարբեր բանկերի ներկայացուցիչները, ընդդիմության պատգամավորները եւ հանձնաժողովի անդամները: Իրավաբանական հանձնաժողովի նախագահը «Հայրենասերների» կողմից առաջ քաշած հարցին համամիտ է եւ կարծում է, որ բանկերի վարկային քաղաքականությունը զսպող ինչ-որ չափորոշիչներ պետք է մշակվի: Որովհետեւ մարդկանց մեծամասնությունն այսօր վարկերի պատճառով զրկվում է սեփական տներից եւ հայտնվում են փողոցում:

«Եթե մարդը բանկից 1000 լարի է վերցնում, իր ձեռքը տալիս են 860 լարի, այսինքն՝ 140 լարի ինչ-որ վճարումների է գնում: Ես որպես իրավաբանական կոմիսիայի նախագահ դեկլարացիա եմ գրել եւ հանձնաժողովի նիստի ժամանակ քննարկված եւ հնչեցված յուրաքանչյուր կարծիք գրավոր ներկայացրել եմ Բյուրոյի քննարկմանը: Ես ինքս կողմ եմ այս հարցադրմանը, որովհետեւ շատ մարդիկ այսօր խնդիրներ ունեն բանկերի հետ կապված: Իմ կարծիքով խնդիրն այն է, որ մարդիկ բանկի կողմից տրվող պայմանագիրը չեն կարդում, ուղղակի ստորագրում են, որ գումարը վերցնեն: Հետագայում կանգնում են մեծ խնդիրների առաջ, մինչեւ անգամ տներն է աճուրդի հանվում»,- ասել է Ախալքալաքի Սակրեբուլոյի Իրավաբանական հանձնաժողովի նախագահ Սիփան Շիպակցյանը:

Ի վերջո, դեկտեմբերի 27-ին Սակրեբուլոն Բյուրոյի նիստի ժամանակ դեմ քվեարկեց նախագծին, արդյունքում հարցը չհասավ Սակրեբուլոյի լիագումար նիստի օրակարգ: Ախալքալաքի Սակրեբուլոյի նախագահը եւս տեղին է համարում բարձրացված հարցը, առաջարկեց մեկ կամ մի քանի հոգու անունից, կոնկրետ դեպքերը ներկայացնելով նամակով դիմեն Ազգային բանկին:

«Հարցը հիմա Ժողովի քննարկմանը չի գնա, հետո կտեսնենք ինչ բովանդակությամբ նամակ կգրենք Վրաստանի ազգային բանկին, որպեսզի հասկանանք ինչ մեխանիզմներ է հնարավոր կիրառել, որպեսզի թեթեւացնենք ժողովրդի վիճակը: Թող դաշինքը մի քանի հոգու ներկայացնի, ովքեր տուժել են բանկերից, որի հիման վրա կարողանանք ընթացք տալ գործին: Հիմա իմաստ չունի հարցը դնել Սակրեբուլոյի նիստի քննարկման»,- ասել է Ախալքալաքի Ժողովի նախագահ Նաիրի Իրիցյանը:

Վրաստանի բանկերի կողմից վարկավորվող ոլորտների մեծ մասին տրվող վարկերի կազմում գերիշխում են արտարժույթային վարկերը: Արտարժույթային տատանումներից խուսափելու համար քաղաքացիներին ավելի ձեռնտու է լարիով վարկ վերցնելը, սակայն մյուս կողմից էլ բանկերի համար ավելի շահավետ է արտարժույթով վարկ տալը, քանի որ վերջիններիս՝ դրսից ստացած վարկային միջոցները արտարժույթով են:

Վարկային պորտֆելում արտարժույթի գերիշխումը նշանակում է, որ բանկերը նախընտրում են արտարժույթային ռիսկերը թողնել վարկառուների ուսերին: Այդ ռիսկայնությունը պարզ երեւում է գյուղատնտեսության ոլորտին տրված վարկերի օրինակով, քանի որ գյուղացիների եկամուտները հիմնականում դրամով են, բայց այս ոլորտի վարկավորման մեծ մասը կատարվում է դոլարով:

Վերջին տարիներին բնակչության համար բանկերից վարկ ստանալը համեմատաբար հեշտացել է։ Կան բանկեր, որոնք միայն անձանգրի հիման վրա վարկ են տալիս: Հենց վարկերի տրամադրման գործընթացի պարզեցումները, մի շարք այլ հանգամանքների հետ միասին նպաստում է տարիների ընթացքում բանկային համակարգի վարկային պորտֆելի աճին: