Վաստակավորի կոչումը Մգեր Արմենիային կօգնի, եթե գնա «Եվրատեսիլ 2018». պրոդյուսեր

Մգեր Արմենիայի պրոդյուսեր Գեորգի Հարությունյանը վստահ է, որ ՀՀ վաստակավոր արտիստի կոչումը երգչին կօգնի, եթե նա Լիսաբոնում «Եվրատեսիլ 2018»-ին մասնակցելու հնարավորություն ստանա: Այս մասին Հարությունյանն ասաց armtimes.com-ի հետ զրույցում: Նա նշեց, որ Հանրային հեռուստաընկերության «Դեպի Եվրատեսիլ» նախագծում կոչումը խանգարում է, քանի որ մրցակիցների երկրպագուները երգչի դեմ են տրամադրվում, սակայն Եվրոպայում այն կնպաստի, որպեսզի հայկական սփյուռքն ակտիվ լինի քվեարկության ժամանակ:

««Դեպի Եվրատեսիլ»-ում խանգարում է, որովհետեւ նա արդեն ստացված երգիչ է, եւ մեր դեմ է տրամադրվում այն ջահելությունը, որը հետեւում է մնացած 19 մասնակիցներին: Վաստակավոր արտիստ լինելը կարեւոր է սփյուռքի համար. եթե հաղթենք ու գնանք Պորտուգալիա, ապա սփյուռքը շատ լավ կտրամադրվի՝ տեսնելով, որ մասնակցում է վաստակավոր արտիստ, նշանակում է՝ նա շատ լուրջ արտիստ է, սփյուռքն էլ ավելի լուրջ կվերաբերվի, եւ ձայներն ավելի շատ կլինեն: Ուշադրությունն ավելի մեծ կլինի, քանի որ Մհերին սփյուռքում ճանաչում են»,- ասաց պրոդյուսերը:

Գեորգի Հարությունյանը համոզված է, որ Մհերը հաղթելու է: Պրոդյուսերն ընդգծում է, որ մնացած 19 մասնակիցների մեջ չկան այնպիսիները, որոնք իրենց փորձով ու վոկալային տվյալներով կարող են համեմատվել նրա հետ: Բացի այդ՝ ըստ Հարությունյանի՝ իրենց երգը լավագույնն է: Հենց այս ամենը, նրա կարծիքով, կնպաստի Մհերի հաջողությանը, իսկ խոսակցություններին, թե նրա հաղթանակը կանխորոշված է, քանի որ առաջին տիկին Ռիտա Սարգսյանի մտերիմն է, ըստ Հարությունյանի՝ պետք չէ ուշադրություն դարձնել:

«Եթե առաջին տիկինը կապ ունենար, մրցույթ չէր լինի, ու Մհերն առանց մրցույթի կանցներ: Ծաղրածու չենք, որ մրցույթի մասնակցենք՝ իմանալով, որ մենք ենք հաղթելու: Մտերմությունն արդեն մոտ 10 տարի է, ինչո՞ւ 10 տարի հետո, ինչո՞ւ այն ժամանակ, երբ Մհերն արդեն ստացել է վաստակավոր արտիստի կոչում: Նշանակում է, որ առաջին տիկնոջ հետ հարաբերություններն ընդհանրապես կապ չունեն մեր մասնակցության հետ: Մհերը մասնակցելու ցանկություն ունեցավ, հայերեն ասած, պագոնները գցեց, ի տարբերություն այլ ճանաչված երգիչների, եւ մասնակցեց մրցույթին, որտեղ մասնակցում են երգիչներ, որոնք կամ այնքան փորձ չունեն, որքան նա, կամ էլ ընդհանրապես փորձ չունեն մեծ մրցույթների մասնակցելու»,- ասաց նա:

Վերջին շրջանում Մհերի անվան շուրջ «Դեպի Եվրատեսիլի» հետ կապված 2 աղմկահարույց դեպք եղավ: Նախ նրան մեղադրեցին գրագողության մեջ: Համացանցում օգտատերերը նրա մրցութային երգը՝ «Forever»-ը, նմանեցրել էին «Queen» խմբի «Who Wants to Live Forever»-ի հետ: Նրանք նմանություն էին գտել մեղեդու եւ բառերի մեջ: Գեորգի Հարությունյանը վստահ է, որ այս պարագայում պլագիատ չկա:

«Պլագիատն այն է, երբ կրկնվում են նոտաներ, ոչ մի նոտա չի կրկնվում, միայն երգի անվանման մեջ կան նույն բառերը. Մհերի երգի մեջ՝ «I Want to Live Forever» (ես ուզում եմ հավերժ ապրել), իսկ «Queen»-ի երգի մեջ՝ «Who Wants to Live Forever» (ով է ուզում հավերժ ապրել), իմաստները տարբեր են, ոչ մի նմանություն չկա: Այս երգը լսել է նաեւ «Queen» խմբի կիթառահարը, նա էլ է հասկանում, որ շատ սիրուն, լավ երգ է, եւ ոչ մի պլագիատ դրանում չի տեսել»,- ասաց Հարությունյանը՝ հիշեցնելով, որ Մհերը միակ հայ երգիչն է, որը «Queen»-ի հետ նույն բեմի վրա կանգնել է:

Մյուս սկանդալը կապված էր «Դեպի Եվրատեսիլ»-ի մեկ այլ մասնակցի՝ Հայկ Կասպարովի հետ: Օրերս Հայկն իր հարցազրույցներից մեկում նշել էր, որ Մհերը պետք է ներողություն խնդրի իրենից, քանի որ տարիներ առաջ իր ու երգչուհի Արփիի համար նախատեսված «Տարոսը ձեզ» երգն առանց իրեն զգուշացնելու վերցրել է: Հարությունյանը նշեց, որ Հայկն ինքն է ներողություն խնդրել այս հայտարարության համար:

«Հայկ Կասպարովն այդ հարցազրույցը տալուց հետո ներողություն է խնդրել, ասել է, որ դա իր համար PR էր: Ինչ վերաբերում է այդ երգին, այն գրել է Արփին, երգի իրավունքներն ինձ մոտ են: Ես իրավունք ունեմ տալ այն ցանկացած երգչի: Երգում է նա, ով լավ է կատարում, իսկ Հայկ Կասպարովը նույնիսկ չէր կարող կատարել»,- ասաց նա՝ ավելացնելով, որ իր ու Մհերի հարաբերությունները Հայկի հետ սրված չեն:

«Դեպի Եվրատեսիլ»-ի առաջին կիսաեզրափակիչը տեղի կունենա այսօր՝ փետրվարի 19-ին: Ելույթ կունենան Գեւորգ Հարությունյանը (01), Անգելը (02), Լուսինե Մարդանյանը (03), Ժաննա Դավթյանը (04), Մհեր Արմենիան (05), «Նեմրան» (06), Հայկ Կասպարովը (07), Թամար Կապրելիանը (08), Ռոբերտ Քոլոյանը (09) եւ «Գաթա» բենդը (10):

SMS քվեարկությունը կսկսվի համերգից անմիջապես հետո՝ 15 րոպեով։ Նախընտրած արտիստի օգտին քվեարկելու համար անհրաժեշտ է մասնակցի թիվն ուղարկել 1006 համարին։ 1 SMS-ի արժեքը 50 դրամ է (ներառյալ ԱԱՀ)։ Եզրափակիչ կանցնի ժյուրիի եւ հեռուստադիտողների քվեարկության արդյունքում առավել շատ միավորներ ստացած 5 մասնակից։

Տպել
3502 դիտում

Յուրացման խոշոր դեպք է բացահայտվել Գեղարքունիքի Ջիլ համայնքում (տեսանյութ)

Խորհրդակցություն ԱԻՆ-ում. Շիրակի մարզում կկառուցվեն նոր հրշեջ-փրկարարական ջոկատներ

Արմեն Սարգսյանը հանդիպել է Ալբանիայի նախագահի հետ

«Հումորի լիգայի» լավագույն թիմերը հանդես կգան ներկայացմամբ

Դիմակները պատռելու ժամանակը. խմբագրական

Մանվել Գրիգորյանի պաշտպանը դադարեցնում է պաշտպանությունը զինվորի հացը յուրացնելու մասով

«Բոհեմ» թատրոնը նորամուծություն ունի, որով, ըստ Դուրյանի, առաջինն է ՀՀ-ում

Հրշեջները մարել են Երևանի Սեբաստիայի փողոցում բռնկված հրդեհը

Ավետիք Իսահակյանի անվան գրադարանը կընդլայնվի. ամեն օր մինչեւ 1500 այցելու է ունենում

Ռուսաստանաբնակ բժիշկ Գեւորգ Ստեփանյանի խափանման միջոցը փոխվել է

Ստաս Միխայլովը երեւանյան համերգի ընթացքում խոստանում է անակնկալներ

Պատիվ է, այն էլ՝ շատ մեծ, շատ ազդեցիկ ու զիլ թիմի մեջ լինելը. Ստյոպա Սաֆարյանը նոր աշխատանքի կանցնի

Զոհրաբ Մնացականյանը հանդիպել է սենատոր Մենենդեսի հետ

«Սիմենս» ընկերության տնօրենների խորհրդի անդամ Ռոլանդ Բուշն Ա. Սարգսյանի հրավերով կայցելի ՀՀ

Օդի ջերմաստիճակը կնվազի 4-5 աստիճանով

Քննությունները մոտենում են. տագնապած են ուսուցիչներն ու աշակերտները. 1 տեքստ, 36 առաջադրանք

ՀՀ-ում տեղի կունենա բասկետբոլի ԵԱՏՄ երկրների գավաթի խաղարկություն

Ստավրոպոլի ձյուդոյի դպրոցի սան Արամ Գրիգորյանը հանդիպել է Վլադիմիր Պուտինի հետ

Ժամանակ է եղել՝ ծանրորդները խթանիչ են օգտագործել, հիմա դա չկա. ասել է մարզիչը

Պոլիէթիլենային տոպրակի մեջ հայտնված երկվորյակների առողջական վիճակը փոքր-ինչ վատացել էր. դեռ մանկատանն են