Չեչիլ պանիր ու տնական մածուն. Արփին կդառնա զբոսաշրջային կենտրոն

Գյուղացու հետ նույն հարկի տակ կապրեն, չեչիլ պանիր ու տնական մածուն կուտեն: Արեւմուտքից Շիրակ եկող զբոսաշրջիկների նախընտրությունն է սա:  Առաջիկայում Աշոցքի տարածաշրջանի Արփի համայնքը կդառնա զբոսաշրջային կենտրոն: Այս պահին քննարկումների եւ ծրագրերի մշակման փուլն է:Շիրակի նախկին եւ ներկա մարզպետները Շաղիկ համայնք են այցելել«Տուրիզմը մենակ էդ մի օրը հյուրանոցում մնալը չէ,  դա գյուղատնտեսության զարգացումն է, որովհետեւ, եթե ստեղ տուրիստ է գալիս, վստահաբար չի ուզենա շվեյցարական պանիր ուտի, տեղական կաթ պետք է խմի, տնական  մեղր ուտի: Այսինքն  գյուղացին պետք է դրան պատրաստ լինի, անասունների թիվն ավելացնի, պատրաստվող ապրանքի որակը բարձրացնի, տեսքը լավացնի»,-Արփիի համայնքապետի հետ հանդիպման ժամանակ ընդգծեց Շիրակի  մարզպետ Արթուր Խաչատրյանը:

Արփիի գյուղերում անգամ խանութներ չկան: Ինչքան էլ գյուղացին զբոսաշրջիկին կերակրի տնական սննդամթերքով, մարդը հաստատ ինչ-որ գնումներ անելու կարիք էլ կունենա: Խանութների լինել-չլինելն էլ կախված է զբոսաշրջիկներից: «Եթե ստեղ տուրիստներ լինեն, խանութ էլ կլինի, կարող է ինքը գարեջուր, կամ սնիկերս ուզենա, կառնի, կուտի»,-ասաց մարզպետը:Արփին խոշորացված համայնք է, որի կազմի մեջ 9 գյուղ կա: Բնակչության ընդհանուր թիվը 2000 է: Բոլորն անասնապահությամբ են զբաղվում: Այսօր դա անում են ապրելու համար, վաղը բիզնես կդառնա: Մարզպետը վստահեցրեց, որ կարվի ամեն ինչ գյուղացու կեցությունը բարելավելու եւ գյուղերն առավել հարմարավետ դարձնելու համար:Արփիի բոլոր գյուղերն ապահով են: Օրինակ՝ Շաղիկը: Հենց այդտեղից էլ կսկսվի տնային հյուրատների հիմնումը:  Բոլոր գյուղերը պահպանել են իրենց կենցաղը, իսկ արեւմուտքից եկողներին հենց սա է գրավում: Արդեն հոգնել են երկնաքերերից: Հանգստություն են փնտրում, ուզում են բնությանը մոտ լինել:  Արփի համայնքում շատ անտառներ կան, որտեղ կկառուցվեն փոքրիկ հյուրանոցներ: Ոչ մի ծառ չի հատվի,-վստահեցրեց մարզպետը: Ծրագիրը մշակված է: Բնությունը չի տուժի: Արփիի կազմի մեջ մտնող համայնքների վարչական ներկայացուցիչները հույս ունեն, որ այս կերպ հնարավոր կլինի կանխել նկատելի արտագաղթը: Մարդիկ եւ ընտանքիներով են հեռանում, եւ արտագնա աշխատանքի են մեկնում, տարվա մեջ մի քանի ամիս վերադառնում, այն էլ եթե խիստ անհրաժեշտություն է: Պետք է անել ամեն ինչ, որպեսզի հնարավոր լինի գյուղացուն պահել  գյուղում, իր տանը, բայց ոչ թե մի կերպ գոյատեւելու, այլ նորմալ կեցություն եւ կենցաղավարություն ունենալու նպատակով:

Արփին զբոսաշրջային կենտրոն կդառնա միայն համագործակցության  պարագայում, եթե գյուղացիները չուզեն՝ գործը գլուխ չի գա: Հենց դրա համար էլ պետք է ծրագրի նպատակը ճիշտ բացատրել, հասանելի մատուցել, քանի որ Արփիի բնակիչների համար այս ծրագիրը փրկություն կլինի:

Աշոցքը Շիրակի մարզի հյուսիսային դարպասն է, այստեղ  տարին ոչ թե 4, այլ մի քանի եղանակ ունի, անանուն, բայց երփներանգ: «Արփի լիճ» ազգային պարկն էլ է այստեղ, որն էլ հենց զբոսաշրջային կենտրոնի գլխավոր հաղթաթուղթն է:

Ավելի քան 140 թռչնի  տեսակ է գրանցված այստեղ,  որոնցից 80-85 նաև բնադրվում են Արփի լճի տարածքում: Այդ թռչուններից  7-ը համաշխարհային պահպանման մտահոգության առարկա են` ներառյալ գանգրափետուր հավալուսանը և մարգահավը: Ինչպես դրանք, այնպես էլ էնդեմիկ հայկական որորն է ձվադրում  Արփի լճի շրջակայքում: Նաեւ հազվագյուտ  բույսեր ու թփեր կան, որոնք գրանցված են կարմիր գրքում: Հենց այս ամենը տեսնել, վայելելու հնարավորություն է ստեղծվելու:

Ալպիական մարգագետիններում զբոսաշրջիկները կկարողանան ոչ միայն շրջել, այլեւ հարակից տարածքներում անգամ տներ գնել: Շաղիկում օրինակ, վարչական ներկայացուցիչն ասում է՝ 1մլն դրամով սեփական տուն է վաճառվում,  հողամասն էլ հետը: Ծրագրի մեկնարկի համար խիստ կարեւոր է նաեւ տուրիստական փաթեթներում ներառել Արփին: Այս ուղղությունը հիմնականում չեն նախընտրում Շիրակի մարզ ժամանողները: Իսկ էկոտուրիզմով հետաքրքրվողների համար  դեռ Ծաղկաձորը, նաեւ  Տաթեւն է  առաջին հորիզոնականում: