Հայ-լիբանանյան հարաբերությունները եղել են յուրահատուկ. վարչապետի պատվին՝ պաշտոնական ընթրիք

Լիբանան պաշտոնական այցի շրջանակում վարչապետ Կարեն Կարապետյանը մարտի 12-ի երեկոյան մասնակցել է Լիբանանի վարչապետ Սաադ Հարիրիի անունից ՀՀ վարչապետի պատվին տրված պաշտոնական ընթրիքին, որին ներկա են  եղել նաեւ Լիբանանում հավատարմագրված օտարերկրյա դիվանագետներ, միջազգային կառույցների եւ կազմակերպությունների ղեկավարներ ու ներկայացուցիչներ: 

ՀՀ կառավարության հասարակայնության հետ կապի եւ լրատվության վարչության փոխանցմամբ, վարչապետ Կարեն Կարապետյանն իր ելույթում նշել է. 
«Լիբանանի Հանրապետության հարգարժան պարոն վարչապետ, հարգելի՛ ներկաներ,
Ցանկանում եմ կրկին շնորհակալություն հայտնել պարոն Հարիրիին Լիբանան պաշտոնական այցի՝ ինձ ուղղված հրավերի եւ ջերմ ընդունելության համար։ 

Բոլորիս է հայտնի, որ հայ-լիբանանյան կապերն ու հարաբերությունները միշտ եղել են յուրահատուկ, ինչը պայմանավորված է մեր ժողովուրդների միջեւ պատմականորեն ձեւավորված բարեկամական հարաբերություններով: Վստահաբար այստեղ իր առանցքային եւ գնահատելի դերն ունի լիբանանահայ համայնքը՝ իր խաղաղ եւ ստեղծագործ վարքով։

Անցած տարիների փորձը միայն հաստատում է թե՛ երկկողմ, թե՛ միջազգային ասպարեզներում հայ-լիբանանյան փոխգործակցության համահունչ լինելը: Մեզ միայն մնում է երկուստեք ապահովել դրա հետագա խորացմանը, մեր ընդհանուր արժեքների պաշտպանությանն ուղղված համատեղ ջանքերի շարունակականությունը:

Լիահույս եմ, որ այս օրերին մեր կողմից քննարկված հարցերը եւ պայմանավորվածությունները մոտ ժամանակներս կյանքի կկոչվեն եւ նոր թափ ու որակ կհաղորդեն հայ եւ լիբանանցի ժողովուրդների բազմաբովանդակ փոխգործակցության խորացմանը:

Հետեւելով վերջին տարիներին տարածաշրջանում եւ Լիբանանի անմիջական հարեւանությամբ ծավալվող ողբերգական եւ ցավալի իրադարձություններին՝ ուզում եմ ընդգծել Հայաստանի՝ բարեկամ Լիբանանին սատար կանգնելու պատրաստակամությունը եւ հույս հայտնել, որ դարերի իմաստություն ու հայրենասիրական արժեքներ կրող լիբանանցի ժողովուրդը պատվով եւ իրեն հատուկ համախմբվածությամբ կդիմագրավի բոլոր մարտահրավերները, կպահպանի երկրի հավասարակշիռ կեցվածքը եւ բնականոն զարգացումը:

Մեծարգո՛ պարոն վարչապետ, մաղթում եմ Ձեզ քաջառողջություն եւ ամենայն բարիք, իսկ Լիբանանի ժողովրդին` խաղաղություն, կայունություն եւ հետագա տնտեսական բարգավաճում:
Կեցցե՛ Լիբանանը եւ կեցցե՛ հայ-լիբանանյան բարեկամությունը»:

Լիբանանի վարչապետ Սաադ Հարիրին իր խոսքում ասել է. «Հարգարժան պարոն վարչապետ եւ հարգելի բարեկամներ,
Մեծ պատվով այս երեկո հյուրընկալում ենք մեր հարգարժան հյուրին` Հայաստանի վարչապետ Կարեն Կարապետյանին ու նրա գլխավորած պատվիրակությանը:
Առաջին հերթին, շնորհավորում եմ այս ամսվա սկզբին Հայաստանի Հանրապետության չորրորդ նախագահի ընտրությունը: 

Նախորդ տարում մենք նշել ենք անկախ Հայաստանի եւ Լիբանանի միջեւ դիվանագիտական հարաբերությունների հաստատման 25-ամյակը, սակայն երկու երկրների միջեւ մշակութային ու պատմական կապերն ունեն ավելի քան 2000 տարվա պատմություն` Տիգրան Մեծի օրերից:

Ներկա փուլում Լիբանանն ու Հայաստանն ունեն հաջող հարաբերություններ տարբեր ոլորտներում, հատկապես՝ բիզնեսի: Կա նաեւ բուհերի միջեւ ակադեմիական փոխանակում, ինչպես նաեւ ծավալվում է երկկողմ աշխույժ գործակցություն մշակույթի, արվեստի եւ զբոսաշրջության ոլորտներում: 

Լիբանանահությունը կարեւոր դեր է խաղում այս հարաբերությունների զարգացման մեջ` հատկապես նկատի առնելով, որ նրանք համարվում են աշխույժ դերակատար թե′ լիբանանյան ազգային կյանքում, թե′ աշխատանքային, արտադրության, մշակութային, կրթական եւ արվեստի ոլորտներում:
Ակտիվ փուլում է գտնվում նաեւ երկու երկրների միջեւ ներդրումների փոխանակումը, որի վերջին արդյունքներից է լիբանանյան երկու բանկերի ներգրավվածությունը Հայաստանի ֆինանսական համակարգում: 

Պարոն վարչապետ եւ բարեկամներ,
Երկու երկրների միջեւ հարաբերությունների զարգացումը գտնվում էր նահատակ վարչապետ Ռաֆիկ Հարիրիի ուշադրության կենտրոնում, եւ նա դարձավ լիբանանցի առաջին բարձրաստիճան պաշտոնյան, ով սկսած 1997 թվականից երեք անգամ այցելեց Հայաստան: 
Շնորհակալություն եւ մեկ անգամ եւս ողջունում եմ Ձեր այցելությունը Լիբանանի վարչապետարան: 
Կեցցե՛ն Լիբանանի ու Հայաստանի բարեկամական հարաբերությունները, կեցցե՛ն Հայաստանն ու Լիբանանը»: