Հաղթանակ կամրջից ինքնասպանության փորձ կատարած անձը նախկինում 5 անգամ դատապարտված է եղել

Երեկ առավոտյան Երեւանի Հաղթանակ կամրջում իրարանցում էր: Մի երիտասարդ անցել էր արգելապատնեշը եւ սպառնում էր ցած նետվել, քանի որ իրեն պատրաստվում են դատել: Մոտ մեկ ժամ հետո ոստիկաններին հաջողվեց նրան հանել վտանգավոր տարածքից եւ տանել ոստիկանության բաժանմունք:

Հաղթանակի կամրջից ինքնասպանության փորձ կատարած քաղաքացի Հասանյան Հ.-ն պարզվում է հարուստ քրեական անցյալ ունի: Կամրջից նետվելու փորձի ժամանակ Հասանյանը հավաքվածներին ասել է, որ գողություն է կատարել, գործ է հարուցվել, որի ժամանակ գողացած գումարը վերադարձրել է տուժողին, սակայն առաջիկայում իրեն սպառնում է մինչեւ 3 տարի ազատազրկում: Հասանյանի կինն էլ մեր թղթակցին ասել է, որ ամուսնուն խոստացել են, որ գումարը վերադարձնելուց հետո չի դատապարտվելու, սակայն խաբել են:

ՀՀ գլխավոր դատախազության հանրային կապերի վարչության պետ Արեւիկ Խաչատրյանը «Հայկական ժամանակ»-ի հետ զրույցում ասաց, որ գործը հսկող դատախազից տեղեկացել է, որ Հասանյանը նախկինում դատապարտված է եղել, իսկ վերջին դատավճռով սահմանված պատիժը դեռ ամբողջությամբ չի մարվել: Գողոնը տուժողին վերադարձնելու պայմաններում օրենսդրությունը հնարավորություն չի տալիս դադարեցնել քրեական հետապնդումը: Հասանյանը մինչ օրս 5 անգամ դատապարտված է եղել:

Մենք տեղեկացանք նաեւ, որ ՀՀ ոստիկանության Երեւան քաղաքի վարչության պետ Սարգիս Մարտիրոսյանը երեկ հեռախոսազրույց, ապա առանձնազրույց է ունեցել Հասանյանի հետ: Ոստիկանությունից հայտնեցին, որ տվյալ քաղաքացին այժմ ոստիկանությունում չէ: Հարցին՝ ի՞նչ արդյունք է ունեցել Երեւանի ոստիկանապետի առանձնազրույցը, ոստիկանությունից չմանրամասնեցին:

Ուսումնասիրելով դատական տեղեկատվական համակարգում Հասանյանի վերաբերյալ առկա տեղեկատվությունը՝ պարզեցինք, որ դեռեւս 2011 թվականին Հ. Հասանյանին մեղադրանք է առաջադրվել այն բանի համար, որ նա նույն թվականի մարտի 20-ին՝ ժամը 22-ի սահմաններում Երևանի Թումանյան փողոցի թիվ 1 հասցեի մոտ հանդիպելով Էդվարդ Բախշյանին, նպատակադրվել է հափշտակել վերջինիս գույքը: Հասանյանը հանցավոր մտադրությունն իրականացնելու նպատակով խաբեությամբ Բախշյանին ներկայացել է որպես ՀՀ ոստիկանության աշխատակից, ապա նրան հրավիրել է Տպագրիչների փողոցի 13 շենքի մոտ, որտեղ ստուգելու պատրվակով նրանից պահանջել է մոտը եղած իրերը: Բախշյանը Հասանյանի պահանջով նրան է ներկայացրել 6000 դրամ արժողությամբ դրամապանակը` 4.000 ՀՀ դրամ գումարով և «Նոկիա» տեսակի բջջային հեռախոսը, որից հետո Հասանյանը, բացահայտ հափշտակելով Բախշյանի զգալի չափի` 70 հազար դրամ արժողության գույքը, դիմել է փախուստի: Նույն թվականի հոկտեմբերին դատարանի վճռով Հասանյանը մեղավոր է ճանաչվել եւ դատապարտվել է 4 տարի 6 ամիս ժամկետով ազատազրկման: Հասանյանը հետագայում վճիռը բողոքարկել է Վերաքննիչ քրեական դատարանում, իսկ շատ չանցած հրաժարվել է վերաքննիչ բողոքից: Վճիռը մտել է օրինական ուժի մեջ:

Ազատ արձակվելուց հետո, մոտ 1 տարի ազատության մեջ գտնվելով, Հասանյանն արդեն գողություն է կատարել: 2017 թվականին Հասանյանին մեղադրանք է առաջադրվել այն բանի համար, որ նա նույն թվականի մայիս ամսին Երևան քաղաքի Համբարձումյան 4-րդ շենքի 58-րդ հասցեում գտնվող «Ամաս Մեդիա» ՍՊԸ-ին պատկանող պարի դպրոցի խոհանոցից գաղտնի հափշտակել է ընկերության հաշվապահ Արփինե Կարապետյանին պատկանող պայուսակը: Գողացված պայուսակի միջից նա վերցրել է խոշոր չափի՝ 1 միլիոն 150 հազար դրամ գումարը, իսկ պայուսակը մնացած իրերի հետ միասին նետել է Երևան քաղաքի Թումանյան փողոցի 40-րդ հասցեում գտնվող աղբարկղը: Դատարանում որպես իրեղեն ապացույց ներկայացվել են թվով 50 հատ 20.000 ՀՀ դրամ անվանական արժեքով թղթադրամները՝ 1 փաթեթում կնիքված վիճակում: Երեւան քաղաքի դատարանում (նստավայրը՝ Արաբկիր եւ Քանաքեռ Զեյթուն վարչական շրջաններ) ընթացող դատաքննությունը դեռ չի ավարտվել: Հասանյանի արարքը, եթե դատարանում որակվի այնպես, ինչպես ներկայացրել է մեղադրանքի կողմը, ապա նրան սպառնում է 2-ից 5 տարի ժամկետով ազատազրկում:

Նյութը տպագրվել է «Հայկական ժամանակ» օրաթերթի մարտի 17-ի համարում: