Ռուս-թուրքական ընկերությունը ՀՀ քաղաքացիների տվյալները կտրամադրի «երրորդ կողմի»

Լուսանկարում՝ ՀՀ-ում Գերմանիայի դեսպան Մաթիաս Քիսլերը

Մարտի 6-ին Հայաստանում Գերմանիայի Դաշնային Հանրապետության դեսպանության կայքում հրապարակվեց տեղեկատվություն, համաձայն որի ապրիլի 3-ից Երեւանում Գերմանիայի, Բելգիայի, Նիդեռլանդների, Լյուքսեմբուրգի, Ավստրիայի եւ Շվեդիայի համար ներկայացված Շենգենյան վիզայի դիմումները կընդունի ոչ թե Գերմանիայի դեսպանությունը, այլ «Վիզամետրիկ» ընկերությունը:

Մարտի 28-ին լրագրողների հետ կայացած հանդիպման ընթացքում Հայաստանում Գերմանիայի դեսպան Մաթիաս Քիսլերը նշել է, որ «Վիզամետրիկ»-ը ռուս-թուրքական համընկերություն է, որի գլխամասը գտնվում է Թուրքիայում։ Դեսպանն ընդգծել է, որ մրցույթի արդյունքների ամփոփման հարցում դեր չի խաղացել, թե որ երկրում է գտնվում ընկերությունը: Մինչդեռ գտնվելու վայրը հաշվի առնելու պարագայում միգուցե հնարավոր լիներ մերժել ընկերությանը եւ խուսափել հանրության մոտ առաջացած անհանգստությունից:

Արձագանքելով այդ անհանգստությանը, Արմեն Աշոտյանը, ինչպես տեղեկանում ենք նրա ֆեյսբուքյան էջից, ԱԺ արտաքին հարաբերությունների հանձնաժողովի անունից գրավոր հարցադրումներով դիմել է կառավարությանը։

«Արձագանքելով մեր բազմաթիվ քաղաքացիների անհանգստությանը կապված ԵՄ մի շարք երկրների կողմից մուտքի արտոնագրման համար թուրքական կազմակերպությանը վերապահելու որոշման հետ՝ տեղեկացնում եմ, որ այսօր արտաքին հարաբերությունների հանձնաժողովի անունից գրավոր հարցադրումներով դիմել եմ ՀՀ Կառավարությանը։ Ընթացքի մասին կտեղեկացնեմ լրացուցիչ»,- մասնավորապես ասված է պատգամավորի էջում:

Հանրության մոտ առաջացած հիմնական մտավախությունը կապված է անձնական տվյալների գաղտնիության պահպանման հետ եւ դա միանգամայն տրամաբանական է: Շենգենյան վիզայի համար անհրաժեշտ փաստաթղթերը կարեւոր տեղեկատվություն են պարունակում եւ տրամադրել այդ տեղեկատվությունը թուրքական ընկերության, այն պարագայում, երբ մեր երկրները դիվանագիտական հարաբերություններ չունեն, առնվազն մտահոգիչ է: Գերմանիայի դեսպանը, անդրադառնալով այդ մտավախություններին, ասել է, որ անձնական տվյալների պահպանությունն իրենց համար բարձր արժեք է եւ երաշխավորել, որ որեւէ տվյալ արտաքին օգտագործողների չի հասնի։ Քիսլերը նաեւ նշել է, որ գրասենյակի աշխատակիցները հայեր են լինելու:

«Գրասենյակը ղեկավարելու է հայ ներկայացուցիչը եւ աշխատակազմում բացառապես ՀՀ քաղաքացիներ են լինելու»,-ասել է դեսպանը։

Դեսպանի երաշխիքների հետ որոշակի հակասության մեջ է «Վիզամետրիկ»-ի կայքում տրված տեղեկատվությունը: Այնտեղից տեղեկանում ենք, թե «ո՞ւմ եւ ի՞նչ նպատակով կարող են փոխանցվել մշակված տվյալները».

«Ձեր տվյալները կարող են փոխանցվել մեր աշխատակիցներին, մատակարարներին, գործակալություններին, VisaMetric լիազորներին, ֆիզիկական եւ իրավաբանական անձանց, իրավական եւ տվյալների մշակմամբ զբաղվող կազմակերպություններին, որպեսզի մեր աշխատակիցներն անհրաժեշտ գործունեությունն իրականացնեն այնպես, որ Դուք օգտագործեք VisaMetric արտադրանքն ու ծառայությունները եւ դրանք Ձեր ճաշակին ու պահանջներին համապատասխան առաջարկվեն», - ասված է համընկերության կայքում:

Արդյո՞ք «իրավական եւ տվյալների մշակմամբ զբաղվող կազմակերպությունները» երրորդ կողմ չեն համարվում: Եվրոպական Միությունը, որի անդամ է հանդիսանում Գերմանիան, տվյալների պաշտպանության բավական լուրջ օրենսդրություն եւ մեխանիզմներ ունի:

2016 թ. ուժի մեջ է մտել Տվյալների պաշտպանության ընդհանուր կարգավորումը (General Data Protection Regulation - GDPR), որը կսկսի գործել 2018 թ. մայիսի 25-ին: Կոնկրետ ենթատեքստում հուսադրող է, որ GDPR-ը տարածվում է նաեւ ԵՄ-ից դուրս գտնվող այն կազմակերպությունների վրա, որոնց գործունեությունը անձնական տվյալների վերամշակման ընթացքում կապված է ԵՄ-ում տվյալների սուբյեկտներին ապրանքների կամ ծառայությունների տրամադրման կամ ԵՄ տարածքում իրենց վարքագծի մոնիտորինգի հետ: GDPR-ը ենթադրում է, որ տվյալների մշակմամբ զբաղվող կազմակերպությունները, որոնք ներկայացված չեն ԵՄ-ում, պետք է ԵՄ-ում ներկայացուցիչ նշանակեն: Ո՛չ գործող, ո՛չ էլ մայիսի 25-ից գործարկվող օրենսդրությամբ կորպորատիվ խմբի ներսում տվյալների փոխանցմանը՝ անգամ եթե այդ ընթացքում սահման է հատվում, որեւէ լուրջ խոչընդոտ չկա: Դրա համար բավարար է անձնական տվյալների փոխանցման համար իրավական հիմքեր ունենալը, ինչը օբյեկտիվորեն չի ապահովում անձնական տվյալների գաղտնիության պահպանումը: Սակայն GDPR-ը անձնական տվյալների անհիմն փոխանցման համար ենթադրում է 20 միլիոն եվրո տուգանք:

Լրացուցիչ մանրամասներ ի հայտ կգան կառավարության պարզաբանման արդյունքում: 

Վլադիմիր Մարտիրոսյան

Հոդվածը տպագրվել է «Հայկական ժամանակ» օրաթերթի մարտի 30-ի համարում: