Տոտին, Պույոլը, Ձանետին եւ այլ ֆուտբոլային աստղեր կխաղան Երեւանում

ՀՀ-ում ֆուտբոլային աստղերի ընկերական հանդիպում անցկացնելու աշխատանքների շրջանակում համաձայնություն է ձեռք բերվել մի շարք ֆուտբոլային հանճարների հետ: Անցած տարի «Հայկական ժամանակ»-ի հետ զրույցում «Փյունիկ» ֆուտբոլային ակումբի սեփականատեր, գործարար Արթուր Սողոմոնյանը նշել էր, որ 2018-ի ամռանը Երեւանում ֆուտբոլային խոշոր իրադարձություն է սպասվում: Հիմա արդեն ներկայացնում է, ովքեր կարող են մասնակցել Հարավային Ամերիկայի հավաքականն ընդդեմ Եվրոպայի հավաքականի ընկերական հանդիպմանը:

«Արդեն որոշված է, որ Եվրոպայի հավաքականի կազմում լինելու են Պաոլո Մալդինին, Ֆրանչեսկո Տոտին, Յուրի Ջորկաեֆը, Կառլես Պույոլը, Էրիկ Աբիդալը, Կախա Կալաձեն, Մարսել Դեսաին, Լյուդովիկ Ժյուլին, Արդրեյ Շեվչենկոն, Խրիստո Ստոիչկովը, Յարի Լիտմանենը: Մի քանի հայտնի խաղացողներ էլ կան, որոնց անունները չեմ ուզում տալ, կպայմանավորվենք նոր կասեմ: Հայտնի խաղացողներ են: Ստոիչկովն ու Լիտմանենը 2015 թ.-ին էլ էին եկել (խմբ. մասնակցում էին Խորեն Հովհաննիսյանի 60-ամյակին նվիրված խաղին): Լատինական Ամերիկայից կլինի Իվան Սամորանոն, որն անցած անգամ էլ էր եկել: Իսկ դեռեւս ՀՀ-ում չեղածներից հուսով եմ՝ կլինեն Կաֆուն, Ռիվալդոն, Խավիեր Ձանետտին, Էռնան Կրեսպոն, Դիդան, Դիեգո Միլիտոն, Դիեգո Ֆորլանը ու շատ այլ խաղացողներ, որոնց հետ բանակցություններն ընթացքի մեջ են»,- ասաց նա:

Արթուր Սողոմոնյանը որոշել է նման հանդիպում կազմակերպել, քանի որ ֆուտբոլի աշխարհի 2018 թ. առաջնությունն անց է կացվելու Ռուսաստանում: Այդ ընթացքում այնտեղ բազմաթիվ ֆուտբոլային աստղեր են լինելու, Մոսկվայում նախատեսվում է անցկացնել լեգենդների գավաթի խաղարկություն, եւ նա որոշել է օգտվել առիթից ու Հայաստանում էլ ֆուտբոլային միջոցառում կազմակերպել:

Հանդիպման գլխավոր մրցավարը լինելու է հայտնի մրցավար, FIFA-ի մրցավարական դեպարտամենտը գլխավորող Մասիմո Բուզական, որն անցած տարի կնոջ հետ շրջագայել է ՀՀ-ում, ինչպես նաեւ վարպետության դաս է անցկացրել հայ մրցավարների հետ: Ֆուտբոլային հայտնի հյուրեր էլ են լինելու, որոնք, թեեւ չեն մասնակցելու հանդիպմանը, սակայն գալու ու նայելու ցանկություն են հայտնել: Սողոմոնյանը վստահ է, որ դիտարժան ֆուտբոլ ու կարեւոր իրադարձություն է լինելու, որն արժանանալու է ուշադրության:

«Մենք այնպես ենք ընտրել, որ խաղացողների մեծ մասը մոտ քառասուն տարեկան է, վերջերս են ավարտել կարիերան ու լավ մարզավիճակում են: Կարծում ենք՝ այնպիսի խաղ կլինի, որ ոչ միայն Հայաստանում կնայեն: Պլանավորում ենք դա ցույց տալ նաեւ Ռուսաստանում ու Եվրոպայում: Հուսով ենք՝ այդ հանդիպումը մեծ աշխուժություն կառաջացնի, այլ երկրներում էլ հեռուստատեսությունը ցույց կտա: Ռուսաստանում խորհրդակցում ենք, կարծում եմ, ցույց կտան»,- ասաց նա:

Ավելի վաղ նախատեսնում էր, որ այս հանդիպման հետ մեկտեղ Երեւանում անցկացվի նաեւ մանկապատանեկան մրցաշար տարբեր երկրների ակումբներ թիմերի միջեւ: «Չելսին», օրինակ, համաձայնել է թիմ ուղարկել, սակայն ավելի ուշ որոշվել է մանկապատանեկան մրցաշարը տեղափոխել օգոստոս, քանի որ հուլիսին շատ ակումբերում արձակուրդ է: Սողոմոնյանն ընդգծում է, որ, եթե անգամ մեծ ֆուտբոլի երկրպագուներին այս նախաձեռնությունը չհետաքրքրի, այն շատ կարեւոր է հայ պատանի ֆուտբոլիստների զարգացման համար:

«Երեւի կլինի 11-12 տարեկանների մրցաշար: Հուսով եմ՝ սա ավանդույթ կդառնա, ու ամեն տարի ամռանը կանցկացնենք մանկապատանեկան մրցաշար: Գլխավոր նպատակն է, որ հայ երեխաները աճեն, սովորեն նոր տեխնոլոգիաները, շանս ունենան դառնալու մեծ ֆուտբոլային վարպետներ՝ ինչպես Հենրիխ Մխիթարյանը: Իհարկե, մանկապատանեկան ֆուտբոլն այնպիսի ֆուտբոլ չէ, որը հետաքրքիր է երկրպագուների համար, բայց անձամբ երեխաների, նրանց ծնողների համար, կարծում եմ, շատ հետաքրքիր եւ օգտակար կլինի»,- ասաց նա:

Հարավային Ամերիկան ընդդեմ Եվրոպայի ընկերական հանդիպումը կկայանա հուլիսի 8-ին: Տոմսերի վաճառքից ստացված գումարը կուղղվի բարեգործության: