Մկոն, Ֆելիքս Խաչատրյանը եւ այլ հայտնիներ բասկետբոլ կխաղան պրոֆեսիոնալ բասկետբոլիստների հետ

ՀՀ բասկետբոլի ֆեդերացիան շարունակում է աշխատանքներ տանել մարզաձեւը երկրում ավելի սիրված դարձնելու համար: Վաղը՝ ապրիլի 11-ին, «Միկա» մարզահամալիրում կայանալու է «Աստղերի հանդիպում», որին մասնակցելու են նաեւ հայկական շոու բիզնեսի հայտնիները: «Հայկական ժամանակ»-ի հետ զրույցում ՀՀ բասկետբոլի ֆեդերացիայի փոխնախագահ, Ա լիգայի նախագահ Արա Պողոսյանը հույս հայտնեց, որ սա կնպաստի նրան, որ մարդիկ ավելի շատ հետաքրքրվեն բասկետբոլով:

«Այս միջոցառման նպատակը մարզաձեւի մասսայականացումն է: Մենք անում ենք ամեն ինչ, որ «Աստղերի հանդիպումը» հանդիսատեսին հետաքրքրի: Գովազդում ենք: Երեւի, ահագին մարդ կգա, որովհետեւ սիրուն բան է լինելու, Հայաստանում դեռ նման բան չի եղել»,- ասաց նա:

Հանդիպումը բաղկացած է լինելու 3 մասից: Առաջինը կմեկնարկի 17:00-ին: Կմրցեն «Անհայատներն» ու «Հայտնիները»: «Անհայտների» թիմում կլինեն Հայաստանի պատանի բասկետբոլիստները, իսկ «Հայտնիների» կազմում՝ ՀՀ սպորտի եւ երիտասարդության հարցերի նախարար, ՀՀ բասկետբոլի ֆեդերացիայի նախագահ Հրաչյա Ռոստոմյանը, ՀՀ Բասկետբոլի ֆեդերացիայի փոխնախագահ՝ Վահագն Հարությունյանը, Արա Պողոսյանը, երգիչներ Արամեն, Նարեկը (Մեծ Հայք), Հայկ Դուրգարյանը, հաղորդավարներ Ֆելիքս Խաչատրյանը, Խորեն Լեւոնյանը, Վահե Խանամիրյանը, դերասան Մկրտիչ Արզումանյանը եւ ուրիշներ: Հանդիպումը կանցկացվի 12-րոպեանոց 2 խաղակեսով:

2-րդ մասը կմեկնարկի 18:20-ին: Տեղի կունենա «Դանք» մրցույթ: Միմյանց դեմ կմրցեն Ա լիգայի բասկետբոլիստները:

3-րդ մասը կսկսվի 19:00-ին: Միմյանց դեմ կմրցեն Ա լիգայում հանդես եկող հայ բասկետբոլիստներն ու լեգեոներները: Թիմերը կկոչվեն լիգայի լավագույն խաղացողների անուններով՝ «Բաբայան» եւ «Սիմովիչ»: Յուրաքանչյուրում կլինի 12 խաղացող: Հանդիպումը կանցկացվի 10-րոպեանոց 4 քառորդով: Գլխավոր մրցավարը կլինի Հրաչյա Ռոստոմյանը:

Ժամը 21:00-ին տեղի կունենա պարգեւատրման արարողությունը: Միջոցառման մուտքն ազատ է: