Սա ամբողջ մոլորակի համար է դաս. Միքայել Պողոսյան

Հայտնի դերասան, երգիչ, ռեժիսոր Միքայել Պողոսյանը ոգեւորված է երկրում տիրող տրամադրությամբ: Հայաստանի բնակչությունը կարողացավ առանց արյուն թափելու ստիպել հեռանալ երկրի ղեկավարին, որի նշանակմանը համաձայն չէր: Այսօր՝ ապրիլի 23-ին, մի քանի օր բողոքի խաղաղ ակցիաներից հետո Սերժ Սարգսյանը հրաժարական տվեց վարչապետի պաշտոնից: «Հայկական ժամանակ»-ի հետ զրույցում Միքայել Պողոսյանը խոսեց ստեղծված իրավիճակի մասին: Նա ընդգծեց, որ տեղի ունեցածը կարեւոր օրինակ էր ինչպես Հայաստանի, այնպես էլ ողջ աշխարհի համար:

- Պարո՛ն Պողոսյան, ինչպե՞ս կգնահատեք Սերժ Սարգսյանի հրաժարականը:

- Միակ գիտակցված քայլն էր: Կարծում եմ՝ շրջապատի ճնշումը, խորհուդրները ազդեցին, որովհետեւ նա, կարելի է ասել, չէր հասկանում, թե ինչ տագնապային վիճակ է, եւ չէր գիտակցում՝ ուր կարող է հասցնել ժողովրդին: Ինձ թվում է՝ ժամանակին ճիշտ խորհուրդների եւ բնականաբար ժողովրդի այս միասնության շնորհիվ նա կատարեց միակ քայլը, որը կարող էր անել, որպես տղամարդ, վերջին իր խոսքն ասել:

- Երբ շարժումը նոր էր սկսվում՝ ԱԺ պատգամավոր Նիկոլ Փաշինյանի քայլերթը, հավաքները... ի՞նչ հանգուցալուծում էիք սպասում:

- Անկեղծ ասած, երեւի ոչ մեկս այդպիսի վստահություն չուներ, որովհետեւ բոլորս ինչ-որ քնած վիճակում էինք: Բոլորիս մեջ այդ պրոտեստը կար, բայց համախմբվելու կայծն էր պետք: Ուղղակի բրավո Նիկոլին, որ մինչեւ վերջ կարողացավ սկզբունքայնորեն բոլորին հասցնել այս օրվան: Դրա համար ես այդ տղայի ճակատն եմ համբուրում:

- Այս օրերի ընթացքում հետեւել եք շարժմանը: Ինչպիսի՞ տրամադրություն էր մարդկանց մեջ:

- Մեր հայի գենի մեջ ուղղակի սերմացած է սերը, այդ մեծ սերը, որը հատուկ է հենց մեր ժողովրդին: Դա է պատճառը, որ առաջին քրիստոնյաներն ենք: Այդ սերն այնքան փակուղիների մեջ էր մտած, բայց այսօր դուրս է եկել, մարդիկ իրար սիրում են, մարդիկ իրար նայում են, զիջում են, համբուրում են, շնորհավորում են, սա սիրո մեծ տոն է: Ու ամենակարեւորը, մենք եւս անգամ հաղթեցինք Ադրբեջանին ոգու առումով: Այսպիսի հաղթանակ կերազեր ունենալ ցանկացած ազգ, մանավանդ պատերազմող ազգ: Սա հոգեբանական հաղթանակ է: Դուք հիմա պատկերացնո՞ւմ եք ադրբեջանցիների վիճակը կամ թուրքի վիճակը, ու այս ամենը կատարվում է ապրիլի 24-ի նախօրյակին: Սա Աստծո շնորհ էր, Աստծո վերաբերմունք էր մեր այս տառապած, խուճապի մատնված ազգին:

- Կարո՞ղ ենք ասել, որ սա ողջ աշխարհի համար դաս էր:

- Առաջին հերթին այս դասը մեզ համար էր: Մեզ համար էր այն առումով, որ գիտակցեցինք, այն, ինչ Աստված մեզ շնորհել է, մենք վերջապես ինչ-որ տոկոսով վերադարձրեցինք Աստծուն: Բնականաբար այս օրինակը, այս դասը, որ մենք ինքներս առանք մեզ համար, ամբողջ մոլորակի համար է դաս: Հիմա չեք պատկերացնում՝ ինչ ոգեւորություն է լինելու: Միշտ հայերն առաջինն են, չէ՞: Տեսեք՝ այս ալիքը՝ ազնիվ ալիքը, ոչ թե Մայդանի մակարդակի ալիքը, ինչպես է տարածվելու աշխարհով մեկ՝ Ռուսաստան, նույն Ադրբեջան, ժողովուրդը ոտքի է ելնելու, որովհետեւ ամեն մի ժողովուրդ իր արդարությունն ունի:

- Ըստ Ձեզ՝ ինչպիսի՞ զարգացումներ են սպասվում:

- Ամենակարեւորը՝ հաղթանակած ժողովրդի տրամաբանական քայլերն են, որ մենք պետք է կարողանանք գիտակցել եւ անել: Նիկոլը հերոս է, բայց Նիկոլը չէ, որ այսօր պետք է բոլոր հարցերի պատասխանները տա, եւ Նիկոլը պետք է հասկանա, ինձ թվում է՝ նա կհասկանա, որովհետեւ այն պատմությունը բոլորիս աչքի առաջ է, երբ հրեշին հաղթում ես, հետո դու ինքդ ես հրեշ դառնում: Հասկանո՞ւմ եք՝ ես շատ եմ վախենում այսպիսի պատմություններից, նույն իմ «Խաթաբալադան» է: Ամենամեծ հաղթանակը գիտե՞ք որն է: Ամեն մեկիս մեջ Սատանան մերթընդմերթ սողոսկում է: Այսօր այդ բոլոր սատանաները, թող Սերժիկը ինձ ների, այդ Սերժիկի պատկերով, Սերժիկի շարժուձեւով բոլորիս միջից դուրս թռան: Մենք ազատագրվեցինք այդ սատանայական գրավից, որը մեր ժողովրդին հունից հանել էր, բթացրել էր: Այդ ամենը դուրս պրծավ մեզանից: Այսօր օդի մեջ սատանայական հրաժեշտ է այս երկրից: Չգիտեմ՝ որ երկիր կգնա, Ադրբեջան կգնա, թե՝ Թուրքիա, բայց համենայնդեպս Հայաստանից դուրս պրծավ այդ ամենը:

- Ինչ-որ մեկին տեսնո՞ւմ եք առաջնորդի՝ երկրի հետագա ղեկավարի դերում:

- Ինձ որ մնար, ես կթողնեի այս ալյանսը՝ Կարեն Կարապետյանի եւ նախագահի՝ Արմեն Սարգսյանի, որովհետեւ կարծում եմ՝ երկուսն էլ կիրթ անձնավորություններ են: Ինձ թվում է՝ նրանք շատ կիրթ կկարողանան տանել մեր երկրը: Հիմա այ Նիկոլը չսկսի ասել՝ բա քո՝ Մեծ Բրիտանիայի անձնագիրը, պետք է հրաժարվես հպատակությունից եւ այլն: Այս բաների միջից պետք է դուրս գանք: Եթե մարդն արժանի է, էլ մի խորացեք, այդ բաները գնացին, անցան:

- Ի՞նչ կավելացնեք: Ի՞նչ կասեք ժողովրդին:

- Ես սիրում եմ բոլորիդ:

Հարցազրույցը տպագրվել է «Հայկական Ժամանակ» օրաթերթի ապրիլի 24-ի համարում