ԲՀԿ-ի աղմուկն անտեղի է, բարեգործության օրենքում բան չի փոխվում. ՀՀԿ-ն կողմ է քվեարկելու

Այսօր Ազգային ժողովում կպահպանվեն նախորդ օրվա թեժ կրքերը: Մանվել Գրիգորյանին անձեռնմխելիությունից զրկել-չզրկելու հարցի քննարկումից հետո ԱԺ-ն երեկ սկսեց եւ այսօր կշարունակի քննարկել «Բարեգործության մասին» ՀՀ օրենքում փոփոխություններ կատարելու մասին նախագիծը: Սակայն այս նախագծի՝ ԱԺ-ում հայտնվելը միայն Ծառուկյան խմբակցության պատգամավորներին է ցայտնոտի մեջ գցել: Նրանք մի քանի օր շարունակ խորհրդարանի ամբիոնից ահազանգում են այն մասին, որ այս նախագծի ընդունմամբ սահմանափակվում է Գագիկ Ծառուկյանի բարեգործական գործունեության շրջանակը:

Իրականում «Բարեգործության մասին» ՀՀ օրենքում այս նախագծով որեւէ բան չի փոխվում: Կառավարությունում այժմ առկա է «Բարեգործական ծրագրերի հանձնաժողով», սակայն այն սահմանադրական փոփոխություններից հետո կորցրել է իր լիազորությունները: Այժմ այս հանձնաժողովի կարգավիճակը հակասահմանադրական է, այդ իսկ պատճառով ստեղծվում է լիազոր մարմին, որին փոխանցվում են բացառապես այն լիազորությունները, որոնք ունի ներկայիս հանձնաժողովը: Փոփոխություններով բարեգործության աջակցության համար վարչապետին կից ստեղծվում է խորհրդակցական մարմին: Ասել է, թե որեւէ դարակազմիկ փոփոխություն տեղի չի ունենում: Պարզապես կարգավորումները բերվում են օրենքի դաշտ:

Նշենք, որ այս փոփոխությունը վերաբերվում է միայն բարեգործական ծրագրերին, իսկ Գագիկ Ծառուկյանը իրականացնում է միայն բարեգործություն:

ՀԺ-ն թեմայի շուրջ արդեն ներկայացրել էր ԲՀԿ-ի, ԵԼՔ-ի, ՀՅԴ-ի եւ ՀՀԿ-ի կարծիքները: Քաղաքական ուժերի ներկայացուցիչները, պատասխանելով ՀԺ-ի հարցին, նշել էին, որ դեմ չեն փոփոխություններին՝ բացառությամբ Ծառուկյան խմբակցության:

Այսօր այս օրենքի նախագիծը կընդունվի ԵԼՔ-ի, ՀՅԴ-ի եւ ՀՀԿ-ի կողմ քվեներով: ԵԼՔ-ից ու ՀՅԴ-ից արդեն դիրքորոշում հայտնել էին քվեարկության մասին: ՀՀԿ էլիտայի ներկայացուցիչներից մեկն էլ երեկ ուշ երեկոյան ՀԺ-ի լրագրողի հետ ունեցած մասնավոր զրույցում հաստատեց, որ իրենք եւս կողմ են լինելու: Մեր զրուցակիցը որպես հիմնավորում նշեց այն, որ նախագիծն իրենց կառավարության օրոք է գրվել: