Նոր մանրամասներ՝ Գեւորգ Կոստանյան Արմեն Դանիելյան հեռակա սկանդալային բանավեճից

Հունիսի 13-ին ՀԺ-ն տպագրել էր նախկին գլխավոր դատախազ, ԱԺ պետաիրավական հանձնաժողովի նախագահ Գեւորգ Կոստանյանի նախկին տեղակալ Արմեն Դանիելյանի այն հայտարարությունը, որ իրեն աշխատանքից ազատել են առանց դիմում գրելու: Գեւորգ Կոստանյանը ՀԺ-ին տրամադրել է Դանիելյանի այն հարցազրույցները, որտեղ իր նախկին տեղակալն ասում է, որ ինքն աշխատանքից ազատման դիմում գրել է համատեղ քննարկման արդյունքում:

«Ես երբեք ֆեյսբուքից չեմ օգտվում եւ իր գրածը չեմ տեսել: Ես այդ մասին ծանոթացել եմ ձեր թերթում տպագրված նյութից: Ես որքան այդ հոդվածից հիշում եմ` խնդիրը վերաբերում էր նրան, որ Արմեն Դանիելյանը հայտնում է, որ դիմում չի գրել, բայց իրեն աշխատանքից ազատել են: Ես ուզում եմ ասել մի բան, որ նույն Արմեն Դանիելյանը իր աշխատանքից ազատվելու հաջորդ օրը հարցազրույց է տվել, որտեղ ասում է, որ որոշել է ազատման դիմում գրել եւ այդ որոշումը կայացրել է համատեղ: Նա այնտեղ պատճառաբանում է, թե ինչու է որոշել դիմում գրել: Ես այսքանից հետո ավելորդ եմ համարում այդ հարցին անդրադառնալ, քանի որ ինձ համար կարեւոր չի եղել: Այսինքն, նա պնդում էր, որ դիմում չէր գրել աշխատանքից ազատման, բայց ինքը ազատման հաջորդ օրն ասում է, որ դիմում է գրել»,- ասաց նա:

Գեւորգ Կոստանյանն ասում է, որ այսպիսով իր նախկին տեղակալն իրեն զրպարտում է, քանի որ հիմա մեկ բան է հայտարարում, իսկ նախկինում՝ այլ:

«Ճիշտ է զպարտությունը եւ վիրավորանքն ապաքրեականացված են, բայց քրեական օրենսգրքի 344 հոդվածը՝ արդարադատության դեմ ուղղված հանցագործություններ, հստակ սահամանում է` դատախազին, դատավորին, քննիչին զրպարտելը դեռեւս հանցագործություն է: Հետագայի համար ես կորոշեմ, թե ինչ քայլեր եմ կատարելու»,- նշեց Կոստանյանը:

Մասնավորապես, Դանիելյանը պատասխանելով հարցին, թե՝ աշխատանքից ազատվում է ստիպվա՞ծ, 2013 թվականին ասել էր. «Այդ որոշումը կայացվել է նախագահի հետ համատեղ: Ու ասեմ, որ շատ հարգում եմ այդ որոշումը եւ հպարտ եմ, որ հնարավորություն ունեցա այս ժամանակահատվածում աշխատել դատախազության համակարգում: Կարծում եմ՝ ապագայում նորից հնարավորություն կընձեռվի աշխատել դատախազության համակարգում` իմ իրավաբանական գիտելիքները, իմ անձը դրսեւորելու համար: Ես շնորհակալ եմ հանրապետության նախագահին»:

Ճշտող հարցին՝ համատեղ ասելով ու՞մ նկատի ունի, Դանիելյանը պատասխանել էր. «Համատեղ ասելով՝ ես նկատի ունեմ, որ քննարկել եմ գլխավոր դատախազի հետ, եւ ընդհանուր որոշում է եղել, որ ցանկալի կլինի, որպեսզի ես չաշխատեմ: Ես նաեւ իմ համոզմունքներն ունեմ: Նոր գլխավոր դատախազը թող լինի անփորձանք, առողջ, մենք դեռեւս առիթ կունենանք շփվելու իր հետ մասնագիտական տիրույթում»:

ՀԺ-ն թեմայի շուրջ պարզաբանում խնդրեց նաեւ Արմեն Դանիելյանից, մասնավորապես, այն մասին, թե ինչու՞ է 2013 թվականին համատեղ որոշմամբ աշխատանքից հեռացել, իսկ հիմա հայտարարում է, որ անօրինական է ազատվել:

«Ես չեմ ցանկացել Գեւորգ Կոստանյանի հետ իմ աշխատանքը շարունակել: Նախկին Սահմանադրության համաձայն՝ դատախազի տեղակալին նշանակում եւ ազատում է ՀՀ նախագահը: Ես ասում եմ, որ որպես այդպիսին դիմում՝ իրավաբանական փաստաթուղթ չեմ ներկայացրել: Ես մտածել եմ, որ դիմում պետք է ներկայացնեմ նախագահին, բայց ինձ չեն հրավիրել նախագահական, որպեսզի ես այդ դիմումը ներկայացնեմ: Լսել եմ նախագահի հրամանագիրը եւ դիմումը պատռել, թափել եմ»,- ասաց Արմեն Դանիելյանը:

Արմեն Դանիելյանը մեր զրույցում չհերքեց, որ աշխատանքից ազատվելու թեմայով, այնուհանդերձ, համատեղ քննարկում եղել է:

«Մենք քննարկել ենք այն, որ ես եւ ինքը չենք կարող շարունակել մեր համատեղ աշխատանքը, եւ ես կներկայացնեմ դիմում, որը չեմ ներկայացրել: Ես պատրաստ եմ եղել չաշխատելու»,- ասաց նա, իսկ ճշտող հարցին՝ ինչու՞ փակագծերը չի բացում, Դանիելյանն արձագանքեց. «Դե հիմա ճաշակի խնդիր է, այդպես ձեւակերպենք»:

Գեւորգ Կոստանյանը շարունակում է պնդել. «Արմեն Դանիելյանը շատ լավ գիտի, թե ինչու է ազատվել աշխատանքից»: Այս հայտարարության հետ կապված, Դանիելյանը հակադարձում է.

«Գեւորգ Կոստանյանը, ես չգիտեմ` ինչ գիտի, ինչ չգիտի: Ես մի բան գիտեմ, որ իմ դիմումը պետք է ներկայացնեմ ՀՀ նախագահին: Ինձ հրամանագրով պետք է ազատեին աշխատանքից, բայց ես դիմում չեմ ներկայացրել: Ինձ աշխատանքից հանելը իրավաչափ չէ: Ինչ որ Գեւորգ Կոստանյանը գիտի, ես էլ մեկ այլ բան գիտեմ, որի մասին չեմ հայտարարում: Ես էլ գիտեմ այն պատճառը, որի համար դիմում չեմ ներկայացրել: Եթե որեւէ խնդիր կար, ապա Գեւորգ Կոստանյանը երկար ժամանակ գլխավոր դատախազ էր, թող բացահայտեր»:

Մեր հարցին՝ ինչու՞ ի վերջո երկու կողմներից եւ ոչ մեկը չի հայտնում, թե ազատման պատճառը որն է եղել, Դանիելյանը նկատեց. «Մենք կոլեգիայի անդամներ ենք եղել եւ աշխատել ենք: Մենք տարբեր իրավական մտածողության արժեքներ ունեցող մարդիկ ենք: Ես այլ կերպ եմ մտածում ամեն ինչ, նա կարող է այլ կերպ է մտածում»: