Ինչո՞ւ է «Գագիկ Ծառուկյան» բարեգործական հիմնադրամը 5 մլն դրամ նվիրաբերել «Սասնա Ծռեր»-ին

Երեկ «Սասնա Ծռեր» խմբավորման ֆեյսբուքյան էջում հայտարարություն տարածվեց, որով շնորհակալություն էին հայտնում «Գագիկ Ծառուկյան» բարեգործական հիմնադրամին՝ 5 մլն դրամ նվիրատվության համար:

«Շնորհակալություն «Գագիկ Ծառուկյան» Բարեգործական Հիմնադրամին 5․000․000 դրամ նվիրատվության համար, որը կծառայի քաղաքական բանտարկյալներին գրավի դիմաց ազատ արձակելուն և նրանց առողջական կարիքները հոգալուն»,- գրված է խմբավորման ֆեյսբուքյան էջում:

ՀԺ-ն «Հիմնադիր Խորհրդարան»-ի մամուլի պատասխանատու Սյուզան Սիմոնյանից հետաքրքրվեց, թե ի՞նչ նպատակով է Ծառուկյանը այդքան գումար փոխանցել:

- Տիկին Սիմոնյան, «Գագիկ Ծառուկյան» հիմնադրամի կողմից 5 մլն դրամ «Սասնա Ծռեր» խմբավորմանը նվիրաբերելը ի՞նչ-որ քաղաքական նպատակներ հետապնդո՞ւմ է:

- Անկեղծ ասած, մենք դիմել ենք մեր ժողովրդին եւ շատ տարբեր կազմակերպություններից ստացել ենք նվիրատվություններ: Ես չգիտեմ, չեմ կարող իրենց նպատակների մասին խոսել, բայց այնուհանդերձ կարծում եմ՝ «Սասն Ծռեր»-ին սատարելու հարցը առաջին հերթին մեր ողջ ժողովրդի հարցն է:

Ինչպես գիտեք՝ դատարանում «Սասնա Ծռեր»-ի որոշ անդամներ ազատ արձակվեցին հենց «Ծառուկյան» խմբակցության պատգամավորների երաշխավորություններով, նույն ձեւով ԵԼՔ խմբակցության պատգամավորները երաշխավորագրեր տվեցին եւ որոշներն էլ նրանց երաշխավորագրով ազատ արձակվեցին: Ես կարծում եմ՝ դա հենց դրա արդյունքն է, իրենք էլ երեւի կարդացել են, որ մենք դժվարություններ ունենք, իրենց երաշխավորագրերին համապատասխան գումար են փոխանցել:

- Այսինքն, «Ծառուկյան» խմբակցության պատգամավորների երաշխավորությունների դիմաց վճարում էիք դուք, որը հիմա փոխհատուցվե՞լ է:

- Այո, ես դա այդպես եմ ընկալել:

- ԵԼՔ խմբակցության պատգամավորների երաշխավորագրերի համար էլ ե՞ք դուք վճարել:

- Այո, բացառությամբ Ներսես Պողոսյանի եւ եւս մեկ հոգու:

- Ի՞նչ եք կարծում, հնարավո՞ր է, որ սա քաղաքական նպատակ է հետապնդում, ձեզ ինչ-որ առաջարկ արե՞լ են:

- Մեզ բացարձակ որեւէ առաջարկ չի արվել, ես սրան առաջին հերթին մարդասիրական տեսանկյունից եմ նայում: Երկրորդ հերթին, որ «Սասնա Ծռեր»-ը միայն իրենց համար չէին գնացել այս քայլին, նրանք հայ ժողովրդի ազատագրության համար էին գնացել այդ քայլին: Ուստի, բոլոր այն ուժերը, որոնք հասկացել են, որ «Սասնա ծռեր»-ը ողջ հայության համար իրենց կյանքը դրեցին զոհասեղանի վրա, պատասխանատվություն են նաեւ ստանձնում օգնել նրանց: