Ինձ պետք չէ քննադատել. Սամվել Բալասանյան

Գյումրու քաղաքապետ Սամվել Բալասանյանը դեմ է, որ Գալուստ Գյուլբենկյանի նախկին հիվանդանոցի շենքը տրվի Շիրակի երկրագիտական թանգարանին: Դեմ լինելն էլ հիմնավորել է հետեւյալ կերպ: Ըստ Սամվել Բալասանյանի՝ այդ եռահարկ շենքը թանգարանի համար շատ մեծ է, յուրաքանչյուր հարկը 820 քմ է, նկուղն էլ հետը՝ 3300 քմ է, չհաշված բակի լաբորատորիան:

«Քանի որ կարծիք են հարցրել, ես էլ հայտնել եմ իմ մտահոգությունն ու ասել, բերեք 2-րդ, 3-րդ հարկում տեղավորենք 2 նախարարություն, նույնիսկ առաջարկեցի, որ Ճերմակ հիվանդանոցում էլ բերենք Ֆիզկուլտ ինստիտուտը: Հաշվարկ կատարեցինք, որովհետեւ 6000 ուսանող էինք ուզում բերել քաղաք: Էն ժամանակ, որ այս հարցը քննարկվեց, Հասմիկ Պողոսյանն էր մշակույթի նախարարը, ես ասացի՝ նկուղը, առաջին հարկը եւ կաթսայատունը տանք մեր Հնագիտական թանգարանին: Եվ դա բավական կլինի, որ հարցը լուծվի: Շենքը 2 մուտք ունի: Մեկը կթողնենք, որ բարձրանա նախարարություններ, մյուսը թանգարանինը կլիներ»,- իր դեմ լինելն այսպես մեկնաբանեց Սամվել Բալասանյանը:

Միայն թե ոչ մի նախարարություն, առավելեւս Ֆիզկուլտ ինստիտուտը Գյումրի բերելու նախագիծ անգամ չկա, որ քաղաքապետը վարչական շենքեր է առաջարկում: Այս պարագայում Գյումրու քաղաքապետի վարած կիկոսաքաղաքականությունը ոչ այն է տարօրինակ, ոչ այն է՝ զավեշտալի է:

Քաղաքի կենտրոնում գտնվող շենքի տրամադրմանը դեմ Սամվել Բալասանյանը նպատակահարմար է գտնում, որ Շիրակի երկրագիտական թանգարանը տեղակայվի քաղաքի ծայրամասում գտնվող մի անմխիթար, սարսափելի եւ կիսաքանդ շինության մեջ, որտեղ գործում է վիճվարչությունը:

«Կուզենայի վերականգնենք նաեւ Կուրսկի հրապարակում գտնվող վիճվարչության շենքը, որը գտնվում է խայտառակ վիճակում, դրա համար էլ առաջարկել եմ, որ հնագիտական թանգարանը տեղափոխենք էնտեղ: Վիճվարչությանը տրամադրենք 2 սենյակ: Սա իմ կարծիքն ու առաջարկությունն է եւ պետք չէ ինձ քննադատել, թե էս ինչ վատ կարծիք է, կամ եսիմ ինչ: Նույնիսկ ասում են, թե Բալասանյանն աշես ի՞նչ է մտածել, որ էսպիսի բաներ է ասել: Որեւէ բան չեմ մտածել, որեւէ խնդիր չկա, ուղղակի ես ոնց որ առաջարկել եմ, որ մշակույթի եւ սպորտի նախարարությունը տեղափոխվի Գյումրի, իմ կարծիքին եմ մնացել եւ մնալու եմ: Էսքան բան»,- ասաց Սամվել Բալասանյանը:

«Նախարարությանը տված Ձեր պատասխանի մեջ ասում եք՝ թաղամասերը զարգացրենք: Արձանները քաղաքի կենտրոնում, երկրագիտական թանգարանը հաշվիչ չգիտեմ ինչ ծառայության շենքի մեջ, ջրմուղի կողքը: Բերեք Քըրքորյանի արձանը տեղափոխենք ջրմուղի կողքը, թանգարանը տեղավորենք էդ հիվանդանոցի նախկին շենքում»,-առաջարկեց Լեւոն Բարսեղյանն ու ավելացրեց. «Գիտեք, չէ՞, որ Ձեր կարծիքը կարող են եւ հաշվի չառնել, ուղղակի հարցրել են՝ իմանալու համար, որովհետեւ հիվանդանոցի շենքը պետական է, թանգարանը պետական է, իսկ պետությունն իր որ շենքում ուզեց կտեղակայի իր թանգարանը»,- Սամվել  Բալասանյանին ասաց ԺԱԱ խորհրդի նախագահ, Գյումրու ավագանու անդամ Լեւոն Բարսեղյանը:

«2013 թվականին էդ շենքը թափուր մնաց, առաջարկեցինք ավագանու կազմով ուղերձով դիմել կառավարությանը, խնդրել եւ առաջարկել պետությանը իր պետական թանգարանն էդ խայտառակ պայմաններից հանել, տանել իր պետական շենքի մեջ, նախկին հիվանդանոցի շենքի մեջ: Դուք էլ եք համաձայն եղել, չեմ հիշում, որ դեմ լինեիք, չեք քվեարկել համենայդեպս: Բայց կառավարությունը մեզ պատասխանեց, որ նպատակահարմար չի գտնում տեղափոխել, էլ ձեններս չելավ: 5 տարի էդ շենքը դատարկ բրախած էր ընդեղ, շուշեքը ջարդած, տիրություն անող չկար, ու ով ինչ ախորժակ ու հավես ուներ, սկսեց մտածել էդ շենքի վրա»:

«Գիտեք չէ՞, որ քաղաքապետը չի կարող հավակնություններ ունենալ պետական շենքի նկատմամբ»,- ասաց Լեւոն Բարսեղյանը: Բալասանյանն էլ հակադարձեց. «Ես էդ շենքի վրա աչք չունեմ, բայց Էս շենքի հետ կապված, ասեմ, որ ամբողջ հանրապետության աչքն է եղել էդ հիվանդանոցի շենքի վրա»: