Կիրակի օրը ավարտվեցին հոկտեմբերի 2-ի նշանակված Գյումրիի եւ Վանաձորի ավագանու ընտրությունների առաջադրումները

 Գյումրիում, ինչպես եւ սպասվում էր, ընտրություններին մասնակցելու հայտ են ներկայացրել տասը՝ Հայ ազգային կոնգրես, ԳԱԼԱ, «Բարգավաճ Հայաստան», «Դաշնակցություն, «Քաղաքացիական պայմանագիր», «Օրինաց երկիր», «Համախմբում», «Գործարար», «Գյումրեցու ոգին» եւ «Ալյանս առաջադիմական ցենտրիստական» կուսակցությունները, ինչպես նաեւ գործող քաղաքապետ Սամվել Բալասանյանին սատարող «Բալասանյան» դաշինքը, որի մեջ Հանրապետական կուսակցությունից զատ մտնում են նաեւ պատգամավորներ Արտաշես Գեղամյանի, Խոսրով Հարությունյանի, Հայկ Բաբուխանյանի կուսակցությունները: Իսկ Վանաձորում մասնակցում են ՀՀԿ-ն, ԲՀԿ-ն, ՀԱԿ-ը, ՀՅԴ-ն, ՔՊ-ն, ՕԵԿ-ը՝ «Հայկական վերածնունդ» անունով եւ «Լուսավոր Հայաստանը»:

Այս պատկերը ցույց է տալիս, որ երկու քաղաքներում էլ ընտրությունները թեժ են լինելու: Երկու քաղաքներում էլ ՀՀԿ-ն բնականաբար փորձելու է պահել քաղաքապետի պաշտոնն ու ավագանու կազմում իր անդամների գերակշռությունը, իսկ այս կուսակցությունների մեծ մասն էլ փորձելու է ՀՀԿ-ից վերցնել այդ հնարավորությունը: Իհարկե, մասնակից կուսակցություններից ոմանց, օրինակ ՀՅԴ-ի հավակնությունները հնարավորինս նվազ են, նրանք փորձելու են գոնե մի քանի ներկայացուցիչ ունենալ ավագանու կազմում, այնուհետեւ ՀՀԿ-ի հետ ավագանիում կոալիցիա կազմել: Որոշ կուսակցություններ անգամ դրա հնարավորությունը չեն ունենա: Ի դեպ, հատկապես Գյումրիի եւ Վանաձորի ընտրությունները յուրահատուկ են այն առումով, որ այս երկու քաղաքներում կիրառվելու է 2017 թվականի խորհրդարանական ընտրությունների մոդելը: Եվ այն իր արդյունքներով ըստ էության լինելու է եկող տարվա ընտրությունների փորձնական տարբերակը, որը կարող է արտացոլել, թե ինչ համամասնություն կարող է ունենալ հաջորդ Ազգային ժողովը: Այս ընտրությունները կարեւոր են այս կուսակցությունների համար՝ բացահայտելու 2017-ի իրենց հնարավորությունները:

Իսկ մինչ Գյումրու եւ Վանաձորի ընտրությունները, համայնքի ղեկավարի եւ ավագանու ընտրություններ են սպասվում ՀՀ բազմաթիվ համայնքներում, այդ թվում՝ մի շարք քաղաքներում արդեն սեպտեմբերի 18-ին: Թեժ ընտրություն խոստացող քաղաքներից մեկը Էջմիածինն է, որտեղ գեներալ Մանվել Գրիգորյանի որդու՝ Կարեն Գրիգորյանի դեմ կպայքարի Արթուր Թումանյանը, որին իրենց հնարավորություններով կպաշտպանեն նախկին քաղաքապետ Հրաչիկ Աբգարյանը, նախկին պատգամավոր Հակոբ Հակոբյանը՝ Ճոյտը եւ այլք: Տեղեկություններ կան, որ նրան ստվերային աջակցություն են ցուցաբերում նաեւ վարչապետ Հովիկ Աբրահամյանն ու Արմավիրի մարզպետ Աշոտ Ղահրամանյանը:

Հետաքրքիր ընտրություններ են սպասվում նաեւ Նոյեմբերյանում, որտեղ գործող քաղաքապետ, ՀՀԿ-ի թեկնածու Վանուշ Ամիրաղյանի դեմ է դուրս եկել նախկին քաղաքապետ Սերյոժա Ամիրաղյանը: Այստեղ ինքնառաջադրվել է նաեւ Կարեն Աբազյանը, որը որոշակի հեղինակություն է վայելում Նոյեմբերյանում, եւ որին կրկին ստվերային աջակցություն կարող է ցուցաբերել Տավուշի մարզպետ Հովիկ Աբովյանը:

Հոկտեմբերի 2-ին մի շարք գյուղերում ու քաղաքներում եւս ընտրություններ են սպասվում: Այս դեպքում առաջադրումները դեռ նոր են սկսվում, եւ մասնակիցների հստակ պատկեր դեռ չկա, բայց ՀՀԿ-ն արդեն որոշ հետաքրքիր առաջադրումներ արել է: Օրինակ, Արթիկում գործող քաղաքապետ, ՀՀԿ անդամ Արսեն Աբրահամյանի փոխարեն առաջադրել է նախկին ԲՀԿ-ական, ԱԺ պատգամավոր Մուշեղ Պետոյանի թեկնածությունը: Ի դեպ, այստեղ առաջադրվել է նաեւ նախկին քաղաքապետ Մխիթար Վարագյանը: Իսկ ՀՀԿ-ի այս ընտրությունը, ասում են, պայմանավորված է ոչ թե այս մարդկանց գործունեության արդյունավետությամբ, այլեւ իշխանությունների օգտին ձայներ բերելու հնարավորություններով:

Առաջիկայում կշարունակվեն ինչպես առաջադրումները, այդպես էլ ինքնաբացարկները, եւ աշնանային ՏԻՄ ընտրությունների պատկերը ավելի որոշակի կդառնա: Ընդհանրապես այս ՏԻՄ ընտրություններն ու դրանց արդյունքները խիստ կարեւոր են լինելու 2017-ի խորհրդարանական ընտրությունների համար, քանի որ համապետական ընտրությունները համայնքից են սկսվում: