Բողոք Էջմիածնում. ազատամարտիկները քաշքշեցին իրար, դեմ են ԵԿՄ տարածքային վարչության նոր ղեկավարի նշանակմանը

Մի խումբ ազատամարտիկներ այսօր Երկրապահ կամավորականների միության Էջմիածնի տարածքային վարչության դիմաց բողոքի ակցիա էին անում՝  պահանջելով տարածքային վարչության ղեկավարի ժամանակավոր պաշտոնակատարի հրաժարականն ու պնդում, որ իրենց ընտրած թեկնածուն պետք է ղեկավարի կառույցը՝ մինչեւ կլինի ԵԿՄ ընդհանուր համագումարը:

Բողոքի ակցիա անող ազատամարտիկները պնդում են, որ այս ամիսների ընթացքում կառույցը նորմալ չի աշխատել, հիվանդ ազատամարտիկների թղթերը չի ստորագրել բուժումների համար եւ այլն. «Եթե չեն աշխատելու, թող դռները փակեն գնան, մինչեւ համագումար, ընտրություն կլինի, կսկսեն աշխատել: Բա էլ ինչի՞ համար են իրենց նշանակել, որ բան չպիտի փոխվեր»,- «Հայկական ժամանակ»-ին ասաց ազատամարտիկ Սուսաննա Մարգարյանը:

Վերջին շրջանի զարգացումներից, մասնավորապես՝ Մանվել Գրիգորյանի կալանավորումից ու նրա որդու՝ Էջմիածնի ԵԿՄ խորհրդի պաշտոնը թողնելուց հետո, հունիսին ԵԿՄ կենտրոնական վարչությունից ԵԿՄ Էջմիածնի բաժնի ղեկավար է նշանակվել ազատամարտիկ Մաթեւոս Ներսիսյանը: Սակայն ազատամարտիկները պնդում են, որ մինչեւ կենտրոնական վարչությունից նշանակումն արել են, իրենք այստեղ՝ Էջմիածնում, շուրջ 200 ազատամարտիկով արդեն ընտրել են ազատամարտիկ Գագիկ Մելքոնյանին: Իսկ կենտրոնական վարչությունում Մաթեւոս Ներսիսյանին նշանակել են մոտ 50 ստորագրությամբ, բայց ինչպես պնդում են ազատամարտիկները՝ անօրինական կերպով:

ԵԿՄ Էջմիածնի վարչության նախկին ղեկավար Մաթեւոս Ներսիսյանը

Մաթեւոս Ներսիսյանի պաշտոնավարումից դժգոհ ազատամարտիկները տեւական ժամանակ պահանջել են Ներսիսյանի հրաժարականը: Օրեր առաջ, ստեղծված իրավիճակը հարթելու համար, ԵԿՄ Արմավիրի մարզային խորհրդի նախագահ Աշոտ Խաչատրյանին ԵԿՄ կենտրոնական վարչությունից նշանակել են Էջմիածնի վարչության ժամանակավոր պաշտոնակատար: Բայց ազատամարտիկները պահանջում են, որ վարչության ղեկավարի պաշտոնակատար նշանակվի միայն իրենց ընտրած թեկնածուն՝ Գագիկ Մելքոնյանը, ում էլ հենց հունիսին ընտրել է Էջմիածնի Երկրապահ կամավորականների միության մոտ 200 ազատամարտիկը.

Գագիկ Մելքոնյանը

«Մեր պահանջն է, որ բոլոր ազատամարտիկները միահամուռ լինեն, միահամուռ պահանջեն, որ արդար ընտրություններ անցկացվեն: Իսկ Ներսիսյանին մենք չենք ընտրել, կենտրոնականից նշանակել են: Երբ բողոքեցինք, Աշոտ Խաչատրյանին ուղարկեցին, իբր՝ ոչ էս կողմից լինի, ոչ՝ էն: Բայց մենք Աշոտին էլ չենք ուզում»,- «Հայկական ժամանակ»-ին ասաց Խաչատրյանի հրաժարականը պահանջող ազատամարտիկներից մեկը:

ԵԿՄ ընդհանուր համագումարի օրը դեռ հայտնի չէ: Այն, հավանաբար, կկայանա հոկտեմբերին: Այդ համագումարի ժամանակ ընտրվելու են Երկրապահ կամավորականների միության նախագահ, ապա մարզային ու տարածքային կառույցների ղեկավարներ.

«Ընդհանուր ժողովը նախկինում երկու տարին մեկ էր, հետո Մանվելի երկարակեցությունն ապահովելու համար սարքեցին հինգ տարին մեկ: Էս դեպքերից հետո էլ համագումարը, հավանաբար կլինի հոկտեմբերին»,- մեր զրույցում ասաց ԵԿՄ վարչության անդամ Իշխան Հովհաննիսյանը:

Իշխան Հովհաննիսյանը

Օրերս ԵԿՄ Էջմիածնի վարչության նախագահի պաշտոնակատար նշանակված Աշոտ Խաչատրյանը չի հասկանում՝ ինչու ազատամարտիկները չեն սպասում մինչեւ համագումար, որ հետո իրենց ուզած մարդուն ըստ կարգի ընտրեն.

«Հիմա պատրաստված եկել, բողոքում են, լրատվամիջոցներ են բերել: Իմ նշանակման իմաստն էլ էն է, որ էս լարված վիճակը խաղաղվի: Տղերքը, Էջմիածնի կռված երկրապահները ում ցանկանան, նրանց էլ կընտրեն, բայց համագումարից հետո, որովհետեւ, ըստ ԵԿՄ կանոնադրության, համագումարից հետո բոլոր բաժանմունքներում ընտրություններ են տեղի ունենում, որտեղ էլ ընտրվում են մարզային ու տարածքային վարչության ղեկավարներ»,- ասաց Աշոտ Խաչատրյանը:

Էջմիածնի ԵԿՄ վարչության նախագահի ներկայիս պաշտոնակատար Աշոտ Խաչատրյանը

Բողոքող ազատամարտիկներին հակադրվեցին մի քանի այլ ԵԿՄ-ականներ՝ ասելով, թե նրանք անիմաստ պրովոկացիա են անում, եւ եթե Գագիկ Մելքոնյանին 200 հոգի ընտրել է, ինչո՞ւ են հիմա 15-20 հոգի բողոքում: Թեեւ փոքր-ինչ քաշքշուկ սկսվեց ազատամարտիկների միջեւ, այնուամենայնիվ, այն հարթվեց, որովհետեւ վերջիններս հույս էին հայտնում, որ խնդիրը արագ կլուծվի. «Վերջը բոլորս էլ մարտական ուղի անցած տղերք ենք, ախպերներ ենք»,- ասացին ԵԿՄ-ականները՝ սպասելով ինչ-որ հանգուցալուծման: Իսկ հանգուցալուծումը, ամենայն հավանականությամբ, կլինի ԵԿՄ ընդհանուր համագումարից հետո: