Ծառուկյանը փորձում է վերահսկողություն իրակացնել բոլոր ֆեդերացիաների վրա. Արթուր Գեւորգյան

Հայաստանի բռնցքամարտի ֆեդերացիայի (ՀԲՖ) նախագահ, Ազգային ժողովի պատգամավոր Արթուր Գեւորգյանը նշում է, որ ՀԱՕԿ նախագահ, նույնպես ԱԺ պատգամավոր Գագիկ Ծառուկյանը փորձում է իրեն ենթարկել ՀԲՖ-ն: Գեւորգյանն այս մասին գրառում է կատարել ֆեյսբուքի իր էջում: Նա անդրադարձել է վերջին շրջանում բռնցքամարտում ծագած խնդիրներին, խոսել է նոր կազմակերպության մասին, որը վերջերս ստեղծվել է որպես բռնցքամարտի նոր ֆեդերացիա եւ հավակնում է ներկա ֆեդերացիայի փոխարեն ինքը ճանաչվել տեղական ու միջազգային մարզական կազմակերպությունների՝ ՀԱՕԿ-ի, ՀՀ սպորտի եւ երիտասարդության հարցերի նախարարության, ԱԻԲԱ-ի (Բռնցքամարտի միջազգային միություն) կողմից:

«Հարգելի հայրենակիցներ, մարզաշխարհի ներկայացուցիչներ եւ լրագրողներ, վերջին ժամանակներում բռնցքամարտի ազգային ֆեդերացիայի շուրջ ստեղծված արհեստածին լարվածության շուրջ ցանկանում եմ մի քանի նկատառում ներկայացնել, այսպես.

1.«ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԲՌՆՑՔԱՄԱՐՏԻ ՖԵԴԵՐԱՑԻԱ» ՀԿ-ն ստեղծվել է տարիներ առաջ եւ արդեն իսկ ձեւավորված ավանդույթներից բացի, մեծ հեղինակություն է վայելում նաեւ բռնցքամարտի միջազգային հեղինակավոր կառույցներում:

2.Փաստացի մի քանի օր առաջ Ֆեդերացիան եւս մեկ անգամ ապացուցեց իր բարձր կարգը Թուրքիայում ընթացող հեղինակավոր մրցաշարի ժամանակ, զբաղեցնելով թիմային պատվավոր 3-րդ հորիզոնականը:

3.Ֆեդերացիայում, ինչպես յուրաքանչյուր հեղինակավոր կառույցում, կարող են լինել խնդիրներ:

4.Ֆեդերացիան իր անդամների եւ բռնցքամարտի ներկայացուցիչների համար միշտ բաց է եղել քննարկումների, խնդիրների լուծման համար:

5.Ինչպես հայտնի է ՀԱՕԿ նախագահ Գագիկ Ծառուկյանը փորձել եւ փորձում է տոտալ վերահսկողություն իրականացնել բոլոր ֆեդերացիաների նկատմամբ:

6.Բռնցքամարտի Ֆեդերացիան նույնպես անմասն չմնաց նման փորձերից:

7.Ֆեդերացիան մասնատելու փորձն անհաջողության մատնելուց հետո վերջինս փորձեց որոշ դժգոհ ներկայացուցիչների միջոցով (ի դեպ, նրանցից շատերը ֆեդերացիայից հեռացվել են օբյեկտիվ եւ հիմնավոր պատճառներով, օրինակ աղջիկ մարզիկին հայհոյելու, հարվածելու եւ այլն) ժողով կազմակերպել եւ հայտարարել, թե իբր նա կարող է ֆեդերացիան չճանաչել, ՀԱՕԿ-ը հանդիսանում է ֆեդերացիան հաստատողը (անհասկանալի իրավական ձեւակերպումներ) եւ ՀԱՕԿ-ը, որ ֆեդերացիային ճանաչեց, այն ֆեդերացիան էլ ԱԻԲԱ-ն է ճանաչելու, ՀԱՕԿ-ը պետք է ստորագրի եւ ճանաչի, թե որ ֆեդերացիային է տեղ տալիս (տեսաձայնագրությունն առկա է):

8.Դրանից հետո անհասկանալի նամակ ստացանք սպորտի նախարարությունից, որտեղ գրված էր, թե իբր ֆեդերացիայի անդամները բողոքում են, բայց գրված չէր ինչն են բողոքում, ինչից են դժգոհ:

9.Պատասխան նամակով արձագանքեցի, որ չենք բացառում բողոք լինի, բայց բողոքին ընթացք տալու համար պետք է հասկանանք բողոքի բովանդակությունը: Առաջարկեցինք ֆեդերացիայի ներսում կազմակերպել բաց քննարկումներ, եւ հայտնեցինք, որ ցանկացած բարձրացված խնդիր պատրաստ ենք քննարկել եւ լուծումներ գտնել:

10.Այս առաջարկս եւ նախարարության եւ «բողոքողների» կողմից անարձագանք մնաց:

11.Հետեւություն. իրական բողոք լինելու դեպքում առնվազն բողոքի բովանդակությունը կբացահայտվեր:

12.Ֆեդերացիայի եւ մարզիկների վերջին հաջողությունների ֆոնին կոմիտեն եւ ՀԱՕԿ-ը դիմեցին ամենավտանգավոր եւ անհեթեթ քայլին՝ ստեղծեցին նոր անվանմամբ ֆեդերացիա, որի անվանումը շփոթության աստիճան նման է ֆեդերացիայի անվանմանը:

13.Ելույթ ունեցան, իբր Սիրողական բռնցքամարտի միջազգային ասոցիացիան՝ ԱԻԲԱ-ն այսուհետ կճանաչի իրենց ֆեդերացիան:
Այսպիսով՝ ցանկանում եմ որոշ արկածախնդիրների մի քանի պարզ իրողություն ներկայացնել, որը գուցե վերջիններիս հետ պահի չգիտակցված քայլեր անելուց:

Նախարարությունը եւ Կոմիտեն իրավունք չունեն ԱԻԲԱ-ին ներկայացնել այլ ֆեդերացիայի մի քանի պարզ պատճառներով

1.ԱԻԲԱ-ն արդեն իսկ ճանաչում է ֆեդերացիան եւ ես՝որպես ՀՀ բռնցքամարտի ֆեդերացիայի նախագահ, առաջադրված թեկնածու եմ ԱԻԲԱ-ի գործադիր մարմնի ընտրությանը:

2.Մի պահ պատկերացնենք, որ ամեն տարի, կամ ամեն մի քանի տարին մեկ մարզաշխարհի ղեկավարությունը փոխվում է, ինչ է նշանակում, յուրաքանչյուր նոր ղեկավար պետք է նոր ֆեդերացիա հիմնադրի, սա ուղղակի աբսուրդի ժանրից է եւ բռնցքամարտի աշխարհին օտար մի երեւույթ:

3.Ենթադրենք վաղը մեկ այլ անձի կողմից հիմնադրվում է ֆեդերացիա, որի անվանումը նույնն է, ուղղակի բառերի տեղերն են փոխվում, արդյո՞ք պետք է նոր ֆեդերացիան հովանավորողները հասնեն նրան, որ նորը միջազգային հարթակներում հանդես գա:
Այս նախաձեռնության հեղինակներն արդյոք այս անհեթեթ քայլն անելիս մտածել են բումերանգի էֆեկտի մասին:

Այս՝ անձնական ամբիցիաներից բխող գործելաոճը վտանգավոր է եւ խարխլում է հայկական բռնցքամարտի ամուր սյուները:
Իսկապես այսօր միջազգային հարթակներում հեղինակավոր բռնցքամարտի դպրոց ունենք եւ այս քայլերով փորձ է արվում առաջին հերթին հարվածի տակ դնել այդ ձեռքբերումները, որոնք օրինական չեն:
Արկածախնդիրներին հորդորում եմ ձեռնպահ մնալ նման ապօրինի փորձեր կատարելուց:
Թույլ չենք տալու ցեխ շպրտել բռնցքամարտի վրա»,- գրել է Արթուր Գեւորգյանը: 

Ավելի վաղ Բռնցքամարտի Եվրոպայի միության (EUBC) նախագահ Ֆրանկո Ֆալչինելին նամակ էր ուղարկել Գեւորգյանին: Նամակում կոչ էր անում ԱԻԲԱ-ի նախագահ Գաֆուր Ռախիմովին եւ ASOIF-ի (ամառային օլիմպիական մարզաձեւերի միջազգային ֆեդերացիաների ասոցիացիա) նախագահ Ֆրանչեսկո Ռիչչի Բիտտիին կանխել միջամտությունները ՀՀ ֆեդերացիայում: