Համաշխարհային ֆուտբոլում էլ է իրավիճակ փոխվել. Մոդրիչը՝ տարվա լավագույն ֆուտբոլիստ

ՖԻՖԱ-ի՝ 2017-18 մրցաշրջանի լավագույն ֆուտբոլիստի մրցանակը Մադրիդի «Ռեալի» եւ Խորվաթիայի ազգային հավաքականի կիսապաշտպան Լուկա Մոդրիչինն է: Նրան այն շնորհվեց երեկ՝ սեպտեմբերի 24-ին, Լոնդոնում կայացած լավագույն ֆուտբոլիստի մրցանակաբաշխության ժամանակ: Նա առաջ անցավ «Ռեալում» իր նախկին թիմակից, այժմ «Յուվենտուսում» հանդես եկող պորտուգալացի աստղ Կրիշտիանու Ռոնալդուից եւ «Լիվերպուլի» եգիպտացի առաջատար Մոհամեդ Սալահից:

Լավագույնին քվեարկությամբ որոշել են մարզիչները, ֆուտբոլիստները, լրագրողները: Մոդրիչը ստացել է ձայների 29.05%-ը: Լավագույն տասնյակն ունի հետեւյալ տեսքը.

1. Լուկա Մոդրիչ 29.05%

2. Կրիշտիանու Ռոնալդու 19.08%

3. Մոհամեդ Սալահ 11.23%

4. Կիլիան Մբապե 10.52%

5. Լեո Մեսսի 9.81%

6. Անտուան Գրիզման 6.69%

7. Էդեն Ազար 5.65%

8. Քեւին դե Բրույնե 3.54%

9. Ռաֆայել Վարան 3.45%

10. Հարի Քեյն 0.98%

Լուկա Մոդրիչը նախորդ մրցաշրջանի ընթացքում «Ռեալին» օգնել է 3-րդ տարին անընդմեջ նվաճել Չեմպիոնների լիգայի գավաթը: Նաեւ Ռուսաստանում կայացած ֆուտբոլի աշխարհի 2018 թ. առաջնությունում Խորվաթիայի հավաքականի կազմում դարձել է արծաթե մեդալակիր: Խորվաթիան իր պատմության մեջ առաջին անգամ էր հայտնվել աշխարհի առաջնության եզրափակչում, ու այդ հաջողության մեջ մեծ դեր էր ունեցել Մոդրիչը: Նա նաեւ ստացել էր ԱԱ 2018-ի լավագույն ֆուտբոլիստի մրցանակը: Վերջերս տարվա լավագույն ֆուտբոլիստ ճանաչվեց նաեւ ՈԻԵՖԱ-ի վարկածով:

Այսպես Մոդրիչը «գահընկեց» արեց Կրիշտիանու Ռոնալդուին ու «Բարսելոնայի» աստղ Լիոնել Մեսսիին (նրանք չէին էլ եկել մրցանակաբաշխությանը): Այս 2 ֆուտբոլիստները, որոնք վիճարկում են ոչ միայն ժամանակակից ֆուտբոլի, այլև պատմության մեջ լավագույնի կոչումը, վերջին 10 տարիների ընթացքում «սեփականաշնորհել» էին անհատական գրեթե բոլոր մրցանակները:

Այս 2-ից ոչ մեկին մրցանակը չտալը փոխեց նաեւ պարգեւատրման տրամաբանությունը: Տիտղոսը տրվեց ոչ թե գոլեր խփողին, այլ խաղը ստեղծողին, կառավարողին, նրան, ով թե՛ ակումբի եւ թե՛ ընտրանու կազմում իր թիմի շարժիչն է եղել, այլ ոչ թե անընդհատ բարելավել է գոլերի իր վիճակագրությունը:  

Իսպանական լրատվամիջոցները, սակայն, կարծում են, որ Մոդրիչը գուցե չկարողանա դեկտեմբերին հերթական անգամ նման հաղթական լուսանկար ունենալ այս անգամ արդեն «Ոսկե գնդակով»: Ըստ դրանց՝ «France Football» ֆրանսիական հեղինակավոր պարբերականը, որն իր թղթակիցների ընտրությամբ որոշում է օրացույցային տարվա լավագույն ֆուտբոլիստին, նախապատվությունը կտա ֆրանսիացի ֆուտբոլիստներին, մանավանդ որ Ֆրանսիայի հավաքականը դարձել է աշխարհի 2018 թ. առաջնության չեմպիոն:

Նշվում է, որ այս պարագայում մեծանում են Ֆրանսիայի կազմում աշխարհի չեմպիոններ դարձած Ռաֆայել Վարանի, Կիլիան Մբապեի եւ Անտուան Գրիզմանի հնարավորությունները: Վերջինս «Ատլետիկոյի» կազմում այս տարի դարձել է նաեւ Եվրոպա լիգայի եւ ՈւԵՖԱ-ի սուպերգավաթի հաղթող:

Բացի Լուկա Մոդրիչից՝ երեկ նաեւ այլ մրցանակակիրներ եղան: Հայտնի դարձավ 2017-18 մրցաշրջանի լավագույն դարպասապահը, մարզիչը եւ տարվա խորհրդանշական հավաքականը: Լավագույն դարպասապահ անվանակարգում հաղթեց բելգիացի Տիբո Կուրտուան, որը նաեւ աշխարհի 2018 թ. առաջնության լավագույն դարպասապահ էր ճանաչվել: Լավագույն մարզչի տիտղոսը տրվեց Ֆրանսիային դեպի աշխարհի 2018 թ. առաջնության չեմպիոնական տիտղոսն առաջնորդած Դիդյե Դեշամին:

Տարվա խորհրդանշական հավաքականն էլ ունի հետեւյալ տեսքը.

Դարպասապահ – Դավիդ դե Խեա («Մանչեստեր Յունայթեդ»)

Պաշտպաններ – Դանի Ալվեշ (ՊՍԺ), Ռաֆայել Վարան, Սերխիո Ռամոս, Մարսելո (3-ն էլ «Ռեալ Մադրիդ»)

Կիսապաշտպաններ – Լուկա Մոդրիչ («Ռեալ Մադրիդ»), Նգոլո կանտե, Էդեն Ազար (2-ն էլ «Չելսի»)  

Հարձակվողներ – Կիլիան Մբապե (ՊՍԺ), Լիոնել Մեսսի («Բարսելոնա»), Կրիշտիանու Ռոնալդու («Յուվենտուս», 2017-18 մրցաշրջանում՝ «Ռեալ»)