Ձյուդոյի ՀՀ առաջնության որակը լավացել է, խոստումնալից մարզիկներից 1-ը գուցե պատժվի. մարզիչ

Հայաստանի ձյուդոյի ազգային հավաքականի գլխավոր մարզիչ Արմեն Նազարյանը գոհ է ՀՀ 2018 թ. առաջնությունից: Նոյեմբերի 12-ին տղամարդկանց պայքարին մասնակցած 80 մարզիկների թվում եղել են գոհացուցիչ քանակով երիտասարդներ: Բացի այդ՝ բավարարել են նրանց որակական հատկանիշները: «Հայկական ժամանակ»-ի հետ զրույցում մարզիչն ամփոփեց մրցաշարը:

«Ընդհանուր առմամբ, անցած տարվա համեմատ, որակական առումով ավելի լավ էր: Բավականին թվով երիտասարդների էին մասնակցում: 60, 66, 73 կգ քաշային կարգերում հաղթողները 20-21 տարեկան տղաներ էին: 81 կգ քաշային կարգի մեր մարզիկը վնասվածքներ ուներ, 2 տարի է դադար էր տվել: Վնասվածքները բուժելուց հետո մասնակցեց եւ հաղթեց: 90 կգ քաշային կարգում Արսեն Խանջյանն էր մասնակցում: Ռուսաստանից է: 1 տարվա ընթացքում անձանգրի խնդիրները լուծել ենք, հաղթեց ՀՀ առաջնությունում եւ հունվարից կմասնակցի միջազգային մրցաշարերի»,- ասաց նա:

60 կգ քաշային կարգում արծաթե մեդալակիր է դարձել 17-ամյա Յուրի Իսրայելյանը: Հոկտեմբերին նա Հայաստանը ներկայացրեց Բուենոս Այրեսում կայացած պատանեկան օլիմպիական խաղերին եւ չպայքարեց մեդալների համար: Անկախ դրանից՝ Նազարյանը կարծում է, որ նա լավ ապագա ունի:

«Յուրին շատ խոստումնալից մարզիկ է: ՀՀ առաջնությունում մեծահասակների մեջ եզրափակիչ մտնելը բավականին լավ հաջողություն է: Նա շատ երիտասրդ է, մեր ապագա մարզիկներից է»,- ասաց նա:

Որպես Եվրոպայի 2018 թ. չեմպիոնի ՀՀ առաջնությունը բաց թողնելու հնարավորություն է տրվել Ֆերդինանդ Կարապետյանին (73): Նա պատրաստվում է դեկտեմբերի 15-ին Չինաստանում կայանալիք «Մաստերս» ամփոփիչ մցրաշարին, որը նույնքան օլիմպիական վարկանիշային միավորներ վաստակելու շանս է տալիս, որքան սեպտեմբերին Բաքվում կայացած աշխարհի 2018 թ. առաջնությունը, որը նա ստիպված էր բաց թողնել, քանի որ հարեւան երկիրն անվտագություն ապահովելու երաշխիքներ չտտվեց: Չինաստանի ստուգատեսին նրա քաշային կարգի 70 մազրիկներից մասնակցելու հրավեր են ստացել աշխարհում ամենաբարձր վարկանիշն ունեցող 16 ձյուդոիստները: Կարապետյանը 14-րդն է: Այժմ մարզվում է ու զբաղվում անձնագրի խնդիրներով, որի վավերականության ժամկետը լրացել է:

Կարապետյանին ՀՀ առաջնությունից ազատել են նաեւ այն նպատակով, որպեսզի պայքարելու եւ իրենց դրսեւորելու հնարավորություն ստանան երիտասարդները: Նազարյանը նշում է, որ իրենց նպատակին հասել են: 73 կգ քաշային կարգում չեմպիոն է դարձել Սամվել Խաչատրյանը, որը Կարապետյանի մասնակցության դեպքում քիչ շանսեր էր ունենում:

«Ամեն տարի Ֆերդինանդը մասնակցում էր, եւ երիտասարդներից Սամվելը 3-րդ տեղն էր գրավում: Այս տարի չմասնակցեց, ու նա հաղթող դարձավ»,- ասաց մարզիչը:

Ի տարբերություն Կարապետյանի՝ նույն քաշային կարգում հանդես եկող Արսեն Ղազարյանն առաջնությանը չմասնակցելու թույլտվություն չի ունեցել: Սակայն որոշել է դրա փոխարեն հանդես գալ նոյեմբերի 9-11-ը Ռումինիայի մայրաքաղաք Բուխարեստում կայացած աշխարհի առաջնությանը, որտեղ բրոնզե մեդալակիր է դարձել:

«Բոլորի հանդեպ էլ լինում է (խմբ. պատիժ), ովքեր չեն մասնակցում ՀՀ առաջնությանը, գնում այլ մարզաձեւերի են մասնակցում: Այդ հարցը ֆեդերացիայով պետք է քննարկենք, տեսնենք՝ ինչ կլինի»,- ասաց նա՝ ավելացնելով, որ ֆեդերացիան գումարներ է ծախսում մարզիկների վրա, եւ ճիշտ չէ, որ այլ մարզաձեւի են նախապատվություն տալիս:

Նազարյանը նշեց, որ ՀՀ 2018 թ. առաջնությունով ձեւավորվել է հավաքական կազմը, որում 6-7 երիտասարդ նորեկ կա: Հաջորդ տարին ձյուդոիստների համար հագեցած է լինելու: 2019-ի սկզբից սկսվում են ուսումնամարզական հավաքները: Հունվարի 6-ից հավաք են անցկացնելու Ավստրիայում, ապա մարզվելու են Երեւանում՝ «Օլիմպավանում»: Հետո մարզիկների մի մասը Գրան Պրի մրցաշարի է մասնակցելու Իսրայելում, մյուս մասը՝ Եվրոպայի գավաթի խաղարկության Պորտուգալիայում:

ՀՀ 2018 թ. առաջնության արդյունքները հետեւյալն են.

60 կգ
1.Աբաղյան Շահեն
2.Իսրայելյան Յուրի
3.Հարությունյան Էրիկ
3.Ներսիսյան Երվանդ

66 կգ
1.Գրիգորյան Վարդան
2.Հովսեփյան Գոռ
3.Ավեդիսյան Արսեն
3.Յաղուբյան Տիգրան

73 կգ
1.Խաչատրյան Սամվել
2.Սարգսյան Մերուժան
3.Թորոսյան Ռոբերտ
3.Պետրոսյան Ալեքսան

81 կգ
1.Սարգսյան Դավիթ
2.Գեւորգյան Սամվել
3.Չալյան Վահագն
3.Խաչատրյան Վարդան

90 կգ
1.Խանջյան Արսեն
2.Աբելյան Գուրգեն
3.Ավանեսյան Արման
3.Գրիգորյան Ավետիք

+90 կգ
1.Գյունաշյան Գոռ
2.Իսոյան Կարապետ
3.Սարգսյան Արտյոմ