Դուք վարչապետ ե՞ք, թե՞ ասֆալտչիկ․ Էդուարդ Շարմազանովը կրկին ուղիղ եթեր է մտել (տեսանյութ)

ՀՀԿ պատգամավորի թեկնածու Էդուարդ Շարմազանովն այսօր ֆեյսբուքյան ուղիղ եթերով անդրադարձել է ՀՀ վարչապետ Նիկոլ Փաշինյանի՝ երեկ տեղի ունեցած նախընտրական հանրահավաքին ու վերջինիս հայտարարություններին․

«Այս երկու օրերի ընթացքում եղել եմ Լոռվա մարզի մի շարք համայքներում, կփորձեմ լինել մյուս համայքներում էլ՝ ավելի ուղիղ շփման միջոցով հաշվետվություն ներկայանցել տարիների իմ գործունեության մասին, իսկ որ նայում եմ՝ իրոք շատ բան է արվել, նաեւ պատրաստվում եմ լսել առաջարկներ, ինչու չէ՝ քննադատություններ։

Բայց երեկ Լոռու մարզում տեղի ունեցավ շատ կարեւոր մի իրադարձություն։ Այցելել էին իշխանության ներկայացուցիչները՝ վարչապետ Փաշինյանի գլխավորությամբ, եւ ցավոք, պիտի նշեմ, որ հյուրընկալ Լոռիում մարդ էր վատացել, ու էդ վատացող մարդը ոչ պակաս, ոչ ավել՝ Նիկոլ Փաշինյանն էր։ Գործը հասել էր նրան, որ աջ ու ձախ լոռեցիներին շանտաժի, մատ թափ տալու, ասֆալտին փռելու, վզից բռնելու կոչեր էր անում։ Ա՛յ ընգեր ջան, լոռեցիներին սկի թուրքերը չեն կարողացել վզից բռնել կամ ասֆալտին փռել։ 1918 թվականին Ղարաքիլիսայի ճակատամարտում էդ փառապանծ լոռեցիներն են պաշտպանել հայությանն ու Հայաստանը։ Ինչպես կարելի ա տենց խոսել, ի՞նչ ա նշանակում ասֆալտին փռել։

Դուք վարչապետ ե՞ք, թե՞ ասֆալտին փռող, դուք վարչապետ ե՞ք, թե՞ ասֆալտչիկ։ Ինչպես կարելի ա իջնել էդ մակարդակի։ Սա քաղաքական բանավե՞ճ ա, թե՞ քուչի բազառ։ Կամ, ես վատ եմ զգում որպես ՀՀ քաղաքացի, որ իմ պետության ղեկավարը, որի քարոզարշավին հետեւում են տարբեր երկրների դեսպաններ, լրատվամիջոցներ, ներկայացուցիչներ, առավոտից իրկուն ճղղում ա, գոռում ա, ասֆալտին ա փռում։ Այ ախպեր, սա քուչի բազառ չի, սա քարոզարշավ ա, ծրագիր ունես, գնա ներկայացրու։ Ի՞նչ ես եկել աջ ու ձախ գոռում, ասֆալտին փռում, հանրապետական․․․Քո նմանները գալու են գնան, իսկ Հանրապետականը սովետի վախտից կա, իսկ Աշոտ Նավասարդյանի կուսակցությունը մնալու ա։

Եւ չփորձես լոռեցիների հետ էդ տոնով խոսել։ Կընտրե՞ն քեզ, շնորհավոր, թող ընտրեն, կընտրեն մեզ, թող ընտրեն մեզ։ Ինչի՞ ես վատացել, այ ախպեր։ Մի մոռացի, պետության ղեկավար ես, ոչ բարով։ Սա պետություն ա, չէ՞, մսուր մանկապարտեզ չի, որի առաջնորդն անդադար գոռում ա։

Գնացել ես իմ հայրենի Ալավերդի քաղաք, լավ ես արել, բարով գնաս։ Ժողովուրդ ջան, եկել ա, կանգնել ա, մի հատ ստերի շարան։ Գործարանը փակել են, հիմա ասում ա՝ ներդրողների հետ քննարկում ենք, պիտի բացվի։ Ե՞րբ պիտի բացվի։ Էդ որ բացող էին, էդ ինչի՞ եկան փակեցին։ Հիմա եկել ա Ալավերդի, լոլո ա կարդում, չինացիների հետ պայմանավորվում ենք․․․էս իշխանազավթումը չլիներ, հիմա մենք արել էին, պայմանավորվել էինք չինացիների հետ։ Լավ, ինչքա՞ն կարելի ա ժողովրդին խաբել։ Էրկու ձեն ստանալու համար էդքան խաբել ժողովրդի՞ն։

Դեկտեմբերին 9-ին հույսդ կտրվելու ա, հենց ալավերդցիները հանրապետականին հազարավոր ձայներ են տալու, եւ ողջ հանրապետությունում։ Որովհետեւ մենք դեռ ապրում ենք ազատ ու անկախ Հայաստանում, որովհետեւ ունենք արժանապատիվ քաղաքացիներ, որոնք չնայած վարչապետի հոխորտանքներին, ունեն սեփական ուղեղ, եւ չեն պատրաստվում նորօրյա հիտլերների ու մուսոլինիների բռնի կոչերին տուրք տալ ու գնալ ընտրել, մենակ նրան, ում նորօրյա հիտլերներն են ասում։ Լավ, քարոզարշավ ե՞նք անում, թե՞ հայհոյում իրար։ Հայհոյանքով խոսում ա նա, ով փաստազուրկ ա։

Կրկնում եմ, դեկտեմբերի 9-ին ընտրեք այն քաղաքական ուժին, որին վստահում եք, դուք անկախ Հայաստանի քաղաքացիներ եք, Նարեկացու ու Թումանյանի ժառանգներ եք, ու մեր ազատ կամքի վրա ոչ մեկը չի կարա բռնանա, ում կուզեք, կընտրեք։ Ոչ մեկից չվախենաք, ոչ ԱԱԾ-ից, ոչ ՊՊԾ-ից, ոչ ոստիկանությունից, ոչ մարզպետից։

Ուրեմն, Լոռու մարզում եւ ամբողջ Հայաստանում մենք թիվ մեկ քվեաթերթիկն ենք։ Վարչապետին էլ փոխանցեք, որ դուք արժանապատիվ քաղաքացիներ եք, վարչապետներն ու կուսակցությունները գալու են ու գնալու, իսկ արժանապատիվ ու ազատ կամք ունեցող քաղաքացիները մնալու են։ Մեզ ոչինչ չի կարող վախեցնել, մենք մտահոգ ենք, եւ այդ մտահոգություններով գնում են վճռական պայքարի՝ հանուն Հայաստանի եւ Արցախի, հանուն ազգային արժեքների եւ հայ ժողովրդի միասնության»,- ասաց Շարմազանովը՝ նշելով, որ հիմա գնում է Լոռու մարզում իր քարոզարշավը շարունակելու։

Հիշեցնենք ընդամենը, Նիկոլ Փաշինյանը խոսել էր ՀՀԿ-ական, օլիգարխ, մուսկուլավոր ու հանցավոր տարրերին ասֆալտին փռելու մասին, որոնք փորձել են շարունակել վախի մթնոլորտ սերմանել լոռեցիների շրջանում:

«Որտեղ կա ՀՀԿ-ական գյուղապետ, որի մտքով անցնում է վախեցնել իր գյուղացիներին, ուրեմն իմացեք, ես գալու եմ անձամբ այդ գյուղապետերի հետեւից եւ վզներից բռնած դուրս եմ անելու իրենց կաբինետներից: Ո՞նց, այս երկրում մարդ կա, որը փորձում է վախեցնել: Տո, բոլորիդ կպառկեցնենք ասֆալտներին, էս ովքե՞ր են սրանք: Ի՞նչ հանրապետական, ի՞նչ օլիգարխ, ի՞նչ մուսկուլավոր, բոլորին կպառկեցնենք ասֆալտին ու տարիներով վեր չեք կենա այդ ասֆալտներից:

Ես ոստիկանությանն ասում եմ՝ չփորձի մեկը թպրտալ, չփորձի մեկ հանցավոր տարր՝ գող կլինի, ավտարիտետ կլինի, պատերին կտանք բոլորին: Քաղաքացի ե՞ք վախեցնում, գլուխներդ պատին եք տվել: Դուք ծակերից չպետք է դուրս գաք, դուք այս երկրի փողոցներով չպետք է քայլեք, ձեր տեղը բանտն է եւ հայտնվելու եք բանտերում, ստահակնե՛ր»,- ասել էր վարչապետը: 

ՀՀԿ-ականները, փաստորեն, համառորեն շարունակում են նենգափոխել Նիկոլ Փաշինյանի հայտարարությունները: «Էֆեկտը», բնականաբար, շատ կարճ է տեւում եւ անհասկանալի է մնում, թե ինչու են շարունակում մանիպուլյացիաներն ու նենգափոխման անհաջող փորձերը: