«Բանանցն» անվանումը փոխում է ակումբին նոր շունչ հաղորդելու համար

«Բանանցի» ղեկավարությունն ակումբին նոր տեսք ու նոր շունչ հաղորդելու նպատակ է դրել, եւ դրա շրջանակներում ամենակարեւոր հարցերից մեկն անվանափոխությունն է: Այս մասին, պատասխանելով «Հայկական ժամանակ»-ի հարցերին, ասաց ակումբի գլխավոր տնօրեն Հրաչ Աղաբեկյանը: Նոր անուն ընտրելու համար «Բանանցը» պաշտոնական կայքում ներկայացրել է «Հայաստան», «Ուրարտու», «Սեբաստիա», «Արծիվ» եւ «Մալաթիա» տարբերակներն ու քվեարկություն է անցկացնում: Աղաբեկյանն ընդգծում է, որ դրանք խորհրդանշական բնույթ են կրում:

«Ծրագրի էական տարրերից է թիմի անվանման փոփոխությունը: Ակումբը տարբերակների մասով օգտագործել է սեփական ռեսուրսները եւ նախաձեռնել է հանրային քննարկման գործընթաց, որը գտնվում է ընթացիկ փուլում, եւ հստակ վերջնաժամկետ դեռ որոշված չէ, դեռեւս ընթանում են քննարկումներ ոլորտի տարբեր մասնագետների հետ: Տարբերակներն ընտրվել են խորհրդանշական բնույթը հաշվի առնելով»,- ասաց նա:

Այս պահին քվեարկության արդյունքներով առաջատարն «Ուրարտու» տարբերակն է: Այն ունի ձայների 38.5%-ը: Դրան ամենամոտը «Մալաթիան» է (32.1%): Մյուսները բավական հետ են մնում: «Արծիվը» հավաքել է ձայների 11.6%-ը, «Սեբաստիան»՝ 9.1%-ը, իսկ «Հայաստանը»՝ 8.7%-ը: «Ուրարտուի» հետ կապված ամեն ինչ չէ, որ պարզ է: Այս տարբերակը կարող է խնդիրներ առաջացնել: «Ուրարտու» բասկետբոլային թիմի ղեկավարները պատրաստվում են 2019-20 մրցաշրջանից համանուն ֆուտբոլային թիմ ներկայացնել ՀՀ առաջին խմբի առաջնությունում:

«Ինչ վերաբերվում է անվանման հետ կապված այնպիսի հնարավոր զարգացումներին, որոնք կարող են դառնալ խնդրո առարկա, միանշանակ մենք մեր մասով հակված ենք այդպիսի իրավիճակը լուծել բացառապես հայկական ֆուտբոլի զարգացման ընդհանուր շահերի լույսի ներքո՝ միաժամանակ հաշվի առնելով ե՛ւ գործընկեր ակումբի, ե՛ւ ֆուտբոլային հանրության, ե՛ւ մեր ակումբի շահերը: Համենայնդեպս, հարցման մեկնարկի դրությամբ «Ուրարտու» անվանումով գրանցված ֆուտբոլային թիմ չի եղել, ինչը խոչընդոտ չի այդ անվանումը հանրային քննարկման ներկայացնելու համար: Հետագայում, երբ հստակություն լինի, ավելի մանրամասն կարող ենք խոսել այս թեմայի շուրջ»,- ասաց նա:

Ամեն դեպքում նշված տարբերակները վերջնական չեն, դրանք կարող են քննարկվել ու փոփոխվել: Աղաբեկյանն ընդգծում է, որ անվանափոխությունը երկարատեւ գործընթաց է, պահանջում է որոշակի վարչարարական գործընթաց, քանի որ ակումբը նախկինում ՈՒԵՖԱ-ի մրցաշարերում հանդես է եկել «Բանանց ՖԱ» անվամբ: Անվանափոխության մասով ակումբը պետք է համապատասխանի ՈՒԵՖԱ-ի որոշ վարչարարական պահանջների: Հետագայում նոր անունը կարող է նաեւ տարբերանշանը վերանայելու հարց առաջացնել:

Անվան հետ կապված նախաձեռնությունը միակը չէ «Բանանցում»: Մրցաշրջանի գարնանային հատվածից առաջ ակումբը շինարարական աշխատանքներ է սկսել: Այժմ իրականցվում է խոտածածկի փոփոխությունը եւ ներդրվում է ջրահեռացման ժամանակակից համակարգ: Ջրահեռացման նոր համակարգի շնորհիվ ցանկացած եղանակային պայմաններում հնարավոր կլինի թույլ չտալ ջրի կուտակումներ: Նախկին խոտածածկն էլ օգտագործվել է մանկապատանեկան թիմերի խաղադաշտերը բարեկարգելու համար:

Ակումբը զբաղվում է նաեւ մարզադաշտն արհեստական լուսավորությամբ ապահովելով: Ըստ ղեկավարություն՝ դա անհրաժեշտ է, որպեսզի երկրպագուները կարողանան հանդիպումները դիտել աշխատանքային ժամերից հետո՝ ոչ շոգ ժամերին, ֆուտբոլիստներն էլ խաղան ավելի բարենպաստ կլիմայական պայմաններում: Այսպիսով՝ ակումբը փորձում է իրականացնել «Բանանց» մարզադաշտը երկրպագուների համար հարմարավետ եւ հաճելի ժամանցի վայր դարձնելու իր գերնպատակը:

Ծրագրեր կան նաեւ մանկապատենական ֆուտբոլի համար նախատեսված մարզումային խաղադաշտերի բարելավման եւ լուսավորությամբ ապահովման հետ կապված: Սա, ըստ ղեկավարների, թույլ կտա ապահովել երեխաների մարզումային գործընթացը լուսավոր պայմաններում դասերից հետո: Նրանք վստահ են, որ այս փոփոխությունից հետո ակադեմիայի սաների թիվը, որն 800 է, կավելանա: