Ադրբեջանում գիտեին՝ Ֆերդինանդն ինչ մարզիկ է, եւ չապահովեցին մեր անվտանգությունը. մարզիչ

ՀՀ ձյուդոյի հավաքականի գլխավոր մարզիչ Արմեն Նազարյանը կարծում է, որ ադրբեջանցիները միտումնավոր են այնպես արել, որ ձյուդոիստ Ֆերդինանդ Կարապետյանը չկարողանա մասնակցել Բաքվի աշխարհի 2018 թ. առաջնությանը: Նման կարծիք նա արտահայտեց այսօր՝ դեկտեմբերի 26-ին, լրագրողների հետ հանդիպման ժամանակ: Ապրիլին Ֆերդինանդը (73 կգ քաշային կարգ) Եվրոպայի չեմպիոն էր դարձել մաքուր հաղթանակներով: Այդ թվում մաքուր հաղթանակ էր տարել նաեւ եզրափակչում ադրբեջանցու նկատմամբ, եւ սա, ըստ Նազարյանի, Ադրբեջանում հաշվի են առել, այդ պատճառով էլ հրաժարվել են անհատական անվտանգություն ապահովել:

«Սկզբում ուզում էին, որ գնայիք: Մեր ֆեդերացիայի նախագահ Վարդան Ոսկանյանը միջազգային ֆեդերացիայի նախագահի հետ հանդիպումներ ունեցավ: Արդեն խոսակցություններն այնպիսին էին, որ պետք է գնայինք, բայց Բաքվի կողմը գիտեր՝ ինչ մարզիկ է Ֆերդինանդը, որ մաքուր հաղթանակ է տարել ադրբեջանցու նկատմամբ, երեւի դա էլ խնդիր էր, որ չկարողացան ապահովել մեր անհատական անվտանգությունը: Նրանք պատրաստ էին մեզ ընդհանուր անվտանգություն տրամադրել, իսկ դա Հայաստանի Հանրապետությանը չէր բավարարում»,- ասաց նա:

Մասնագետը նշում է, որ տարին ավելի լավը կլիներ, եթե Հայաստանը մասնակցեր աշխարհի առաջնությանը: Սակայն, ամեն դեպքում, ընդհանուր արդյունքներից գոհ է: ՀՀ-ն ներկայացնող մարզիկները մրցանակային տեղեր են զբաղեցրել միջազգային տարբեր մրցաշարերում, եւ ամենակարեւորը՝ Ֆերդինանդ Կարապետյանը 13 տարի անց Հայաստան է բերել Եվրոպայի չեմպիոնի կոչումը:

«13 տարի Եվրոպայի չեմպիոն չէր եղել: Ես էի դարձել, 13 տարի անց Ֆերդինանդը դարձավ, ասեմ, որ, այո՛, հաջող տարի էր: Եթե աշխարհի առաջնությունն էլ լիներ ավելի լավ կլիներ»,- ասաց նա:

Ֆերդինանդ Կարապետյանն աշխարհի 2018 թ. առաջնությունը բաց թողնելու մասին չի մտածում: Արդեն նախապատրաստվում է հաջորդին ու իր առջեւ հաղթելու նպատակ է դնում: Նաեւ կենտրոնանում է Տոկիոյի 2020 թ. օլիմպիական խաղերի վարկանիշային միավորներ հավաքելու վրա: Վստահ է իր ուժերի վրա: Նշում է, որ շանսեր ունի:

«Եվրոպայի առաջնությունում լավ հանդես եկա եւ ոսկի նվաճեցի, շատ ուրախ եմ դրա համար: Ցավալի է, որ աշխարհի առաջնությանը չմասնակցեցի, բայց կյանքը շարունակվում է: Պատրաստվում եմ հաջռորդին: Կապացուցեմ, որ հենց այնպես չէ, որ պատրաստվում եմ, եւ Աստված տա՝ աշխարհի ու օլիմպիական խաղերի չեմպիոն դառնամ: Օլիմպիական ուղեգիր ձեռք բերելու մասին շատ չեմ անհանգստանում, քանի որ բոլոր շանսերն ունեմ: Կարեւորը վնասվածքներ չլինեն: Միավորներ ունեմ, պարզապես պետք է պահպանել դիրքերը, եւ վերջ: Կարծում եմ՝ կհայտնվեմ օլիմպիական խաղերում»,- ասաց նա:

ՀՀ հավաքականի ձյուդոիստների մրցաշրջանը սկսվելու է 2019 թ. հունվարից: Հունվարի 7-16-ը Ֆերդինանդ Կարապետյանն ու Արդեն Խանջյանը (90 կգ) մեկնելու են Ավստրիա՝ ուսումնամարզական հավաքի: Հետո 1 շաբաթ հավաք կլինի Երեւանում՝ «Օլիմպավանում»: Հունվարի 24-28-ը Իսրայելում այս 2 մարզիկները կմասնակցեն Գրան պրիի, փետրվարի 16-18-ը՝ Ֆրանսիայում կայանալիք Մեծ Սաղավարտի մրցաշարի, փետրվարի 24-29՝ Գերմանիայում կայանալիք Գրան պրիի: Դրանից հետո, ըստ մարզիկների մարզավիճակի, կորոշվեն հետագա անելիքները: Մյուս ձյուդոիստները կմասնակցեն եվրոպական գավաթների խաղարկությունների: Եթե լավ արդյունքներ գրանցեն, կմասնակցեն մեծ մրցաշարերի: