Կարելի է միաժամանակ 1-2 ծանր, կարեւոր գործեր կատարել. Արսեն Ջուլֆալակյան

Հունահռոմեական ոճի ըմբիշ Արսեն Ջուլֆալակյանի (77 կգ) վերջին մեդալը սովորականից տարբերվող կերպով լուսաբանվեց մամուլում: Օլիմպիական արծաթեմեդալակիր, աշխարհի, Եվրոպայի չեմպիոն մարզիկի համար Ֆրանսիայի Նիս քաղաքում փետրվարի 1-3-ը կայացած մրցաշարում նվաճած ոսկե մեդալը մարզական կարիերայում հերթականն էր, սակայն առաջինն էր ՀՀ ԱԺ պարգավորի կարգավիճակում: «Հայկական ժամանակ»-ի հետ զրույցում նա նշեց, որ գորգում իր զգացողությունները նախկինում ունեցածից չեն տարբերվել, սակայն միեւնույն ժամանակ գիտակցել է նոր կարգավիճակի բերած պատասխանատվությունը:

«Ինձ համար ամեն ինչ նույնն էր, ինչ նախկինում: Փորձում եմ հնարավորինս չկենտրոնանալ պատգամավորի մանդատի վրա, ինչքան հնարավոր է՝ սառնասիրտ լինել, չխառնել մեկը մյուսին: Բայց հնարավոր չէ բացարձակ անտեսել: Լրացուցիչ պատասխանատվություն է գալիս: Պետք է ավելի զգոն մոտենաս մրցումներին, ավելի որակյալ հանդես գաս. արդեն ոչ միայն անվանի մարզիկի կարգավիճակում ես, այլեւ քաղաքական գործչի եւ Ազգային ժողովի պատգամավորի: Բնականաբար դա ավելի է պարտավորեցնում, եւ բացարձակ պատիվ չի բերի, եթե արդեն այս կարգավիճակում վատ հանդես գաս: Չնայած առանց դրա եւս պարտավորեցնող էր»,- ասաց նա:

Արսեն Ջուլֆալակյանը մրցաշարում 4 գոտեմարտ է անցկացրել: Բոլորում էլ համոզիչ հաղթանակ է տարել՝ ընդհանուր առմամբ հակառակորդներին զիջելով ընդամենը 2 միավոր: Մրցակիցները բավական փորձառու են եղել՝ իրենց երկրների չեմպիոններ, միջազգային խոշոր մրցաշարերի մասնակիցներ: Եզրափակչում նա առավելության է հասել ազգությամբ հայ, Ֆրանսիան ներկայացնող Ֆրանսիայի չեմպիոն Էվրիկ Նիկողոսյանի նկատմամբ: Այն պահից սկսած, ինչ հայտնի դարձավ, որ Ջուլֆալակյանն առաջադրելու է թեկնածությունը, շատերին էր հետաքրքիր, թե ինչպես է կարողանալու համատեղել: Նշում է՝ ուրախ է, որ կարողացել է ապացուցել, որ հնարավոր է, ու ցանկանում է այսպիսով օրինակ ծառայել:

«Ուզում եմ օրինակ ծառայել մարզասերների, ապագա մարզիկների համար, որ համոզվեն, որ անհնարին բան չկա: Պետք է միայն ցանկություն: Ճիշտ է՝ սա դեռ միջազգային մրցաշար է, բայց լիահույս եմ, որ ե՛ւ Եվրոպայի, ե՛ւ աշխարհի առաջնություններում հնարավոր կլինի ապացուցել, որ կարելի է բարձրակարգ ելույթ ունենալ եւ մեդալներ նվաճել: Ուզում եմ սեփական օրինակով մոտիվացնել պատանիներին, նաեւ այլ բնագավառների ներկայացուցիչներին, որպեսզի հավատան, որ կարելի է միաժամանակ 1-2 լուրջ, ծանր, կարեւոր գործեր կատարել»,- ասաց նա:

Ջուլֆալակյանը բավական մեծ ծանոթություններ ունի իր ասպարեզում: Արտասահմանցի ընկերներին, կոլեգաներին նույնպես, ինչպես Հայաստանում, հետաքրքիր է եղել՝ ինչ մարզավիճակում է մոտենալու մրցումներին, ինչպես է հանդես գալու: Ծանոթները, մտերիմները մոտեցել ու խոսել են այդ թեմայով, կատակներ արել:

«Նույնն այնտեղ էր, բոլորը սպասում էին, մանավանդ ե՛ւ Ֆրանսիայում, ե՛ւ Գերմանիայում շրջապատը շատ մեծ է, որովհետեւ 2 երկրներում էլ՝ Ֆրանսիայում՝ 2, Գերմանիայում՝ 7 տարի ակումբային առաջնությանն եմ մասնակցել, եւ մտերիմները շատ են: Բոլորը, ովքեր ներկա էին, անհամբեր սպասում էին՝ արդեն պատգամավոր դառնալուց հետո ինչպես պետք է հանդես գամ: Ռուսաստանի թիմն էր այստեղ, որը շատ լավ գիտի ե՛ւ ինձ, ե՛ւ ընտանիքիս: Բոլորը մոտեցան մրցումների առաջին օրը, ասացին. «Պատգամավորի մանդատն էլ ավելացավ տիտղոսներիդ, հիմա առավելեւս քո դեմ մրցել չի լինի»: Ասացի՝ եթե այդքան մտնում եք դրության մեջ, ուրեմն մի մրցեք, պարտվեք (ծիծաղում է)»,- ասաց նա:

Ջուլֆալակյանը նշում է, որ մինչեւ ապրիլին Ռումինիայում կայանալիք Եվրոպայի 2019 թ. առաջնությունն այլեւս միջազգային մրցումներ չկան, որոնց կարող է մասնակցել: Հույս ունի, որ այս տարվա ընթացքում Եվրոպայի ու աշխարհի առաջնություններում էլ իրեն դրսեւորելու շանս կստանա: Ինչ վերաբերում է ակումբային մրցելույթներին, այդ հարցում դեռ պետք է որոշում կայացնի. գուցե հանգստանալու կարիք ունենա:

Նիսի մրցաշարից հետո ՀՀ հունահռոմեական ոճի ըմբշամարտի հավաքականին սպասվում է փետրվարի 28-ից մարտի 3-ը Բուղարիայում կայանալիք Դան Կոլովի եւ Նիկոլա Պետրովի անվան միջազգային մրցաշարը: Այնտեղ ՀՀ-ն ներկայացնելու են այն մարզիկները, որոնք Նիսի ստուգատեսը բաց են թողել: Այնուհետեւ հավաքականը կանցկացնի ուսումնամարզական հավաքներ: Դրանցից հետո հայտնի կդառնա հավաքականի կազմը, որը մասնակցելու է Եվրոպայի առաջնությանը: Այսինքն, պարզ կդառնա՝ Ջուլֆալակյանը կմասնակցի, թե՝ ոչ: