Սամվել Բալասանյանը կգնի՞ «Շիրակի հանրային ՀՌԸ»-ն. կառավարության ուղերձը՝ վիճաբանության առիթ

«Մենք մեր մտահագությունն ենք հայտնում «Շիրակի հանրային հեռուստառադիո» փակ բաժնետիրական ընկերության փակման կապակցությամբ՝ կարևորելով քառորդդարյա պատմություն ունեցող ընկերության գործունեությունը Շիրակի մարզում և, մասնավորապես, Գյումրիում: Մեզ մտահոգում է նաև ընկերության 60 աշխատակիցների ճակատագիրը, ովքեր այս որոշմամբ կորցնում են իրենց աշխատանքը և համալրում Հանրապետության տարածքում գործազրկության ամենաբարձր  ցուցանիշ ունեցող մարզում առկա գործազուրկների շարքերը:

Վերը նշված հանգամանքներով պայմանավորված՝ ՀՀ կառավարությանը խնդրում ենք վերանայել հունվարի 31-ին կայացրած իր որոշումը, հեռուստաընկերությանը ընձեռել հնարավորություն՝ հետագա գործունեության համար»: 

Քաղաքապետ Սամվել Բալասանյանի ընթերցած հենց այս ուղերձն էր, որ վիճավանության առիթ դարձավ: Մասնավորապես, «Գալա» խմբակցության անդամներն առաջարկեցին հստակեցնել, թե ինչ ասել է՝ կառավարությունը վերանայի որոշումը:

«Վերանայել մի քանի բան կարող ենք հասկանալ, վերանայել, այսինքն շարունակի ֆինանսավորե՞լ, թե վերանայի՝ մասնավորեցմամբ: Եւ, հետո, կասկածներ կան, որ ուղերձում գրված է 60, էնտեղ 60 աշխատակից կոնկրետ չկա, այլ 28, 29 աշխատակից: Միգուցե գրանցված կան, բայց ռեալ աշխատակիցների թիվը 28, 29 է: Հաստիքացուցակ կարելի է խնդրել, քննարկել: Իմ կարծիքով՝ էստեղ 2 խնդիր կա՝ ղեկավարության խնդիրը եւ աշխատակիցների խնդիրը, զանազանենք դրանք իրարից: Ինչքա՞ն են օրինակ վճարվում այդ աշխատակիցները: Իմ տեղեկություններով, 55.000-ից 65.000 դրամ են վճարվել: Չե՞ք կարծում, որ արժե Նոր Հայաստանի պայմաններում նոր աուդիտ հրավիրել, որպեսզի շտվի, պարզվի, թե պետական բյուջեն ինչպես է ծախսվել, եւ ինչպես է ստացվել, որ հիմնական աշխատող մարդիկ էդքան քիչ են ստացել: Եվ ինչ է եղել մնացած գումարը: Հիմա եթե մենք առաջարկում ենք վերանայել եւ շարունակել ֆինանսավորել, եւ, եթե տեղի է ունեցել ապօրինություն, ապա կոչով դիմում ենք, որ հովանավորի դա» ,-ասաց Գյումրու ավագանու «Գալա» խմբակցության քարտուղար Քրիստինա Մկրտչյանը:

Սամվել Բալասանյանն ասաց՝ դա իր ֆունկցիան չէ: «Եթե դուք կասկածներ ունեք, դիմումով կարող եք դիմել համապատասխան մարմիններին, ես խնդիր չեմ տեսնում: Կառավարությունը կգա, կուսումնասիրի, թե ինչ, դա իմ խնդիրը չէ, որովհետեւ դա պետական կառույց է: Ճիշտն ասած, եթե դուք ուզում եք, դուք նախաձեռնեք, կամ, եթե ավագանու որեւէ անդամ ուզում է, թող ինքը անի: Հիմա մեր խնդիրը էն է, որ չփակվի «Շիրակ» հռը-ն: Մարդիկ աշխատատեղերը չկորցնեն, որովհետեւ մեզ համար Շիրակը շատ կարեւոր է: Ես չեմ ուզում, որ Շիրակը, որն ունի պատմություն, ջնջվի մեր հիշողությունից: Եթե խնդիրը վերանայել բառն է, ուրիշ բառ եթե հիմա ասեք, դա կգրենք»,-ասաց Բալասանյանը:

Նույն խմբակցության մեկ այլ անդամ՝ Արմենուհի Վարդանյանը, հայտարարեց, թե վստահ է, որ իշխանությանը հայտնի է, թե ինչ է կատարվել հռը-ում, եւ դրա համար է կայացվել չֆինանսավորելու որոշումը: «Լիազորված եմ ասելու, որ մեր գործընկերներին «Գալա» հը-ն կընդունի աշխատանքի, որակավորված մասնագետներին նաեւ պատրաստ են աշխատանք տրամադարել Երեւանի գրասենյակում: Եթե նույն նախաձեռնությամբ նաեւ հանդես գա «Ցայգ»-ը, որի սեփականատերն է նաեւ տնօրենը, եւ մի քանիսին էլ իրենք ընդունեն աշխատանքի, ապա, կարծում ենք, խնդիրը կլուծվի: Եվ Շիրակի մեր գործընկերները չեն մնա առանց աշխատանքի: Քաղաքապետարանը նաեւ իր լրատվական բաժնում կարող է աշխատանք առաջարկել»:

Գալա խմբակցությունից նաեւ հարց ուղղվեց Սամվել Բալսանյանին, թե ունի՞ վերջինս շահագրգռվածություն այս խնդրում եւ ցանկանո՞ւմ է ձեռք բերել «Շիրակ»-ը: Պատասխանը բացասական էր:

Վիճաբանության ավարտին ավագանին ընդունեց ուղերձը կառավարություն ուղարկելու որոշումը: Գալա խմբակլցության 3 անդամները ձեռնպահ եղան: Լեւոն Բարսեղյանը նիստին չէր մասնակցում: