Պետությունը ոչ մի կապ չպետք է ունենա պրոֆեսիոնալ սպորտի հետ.Միհրան Հարությունյան

Օլիմպիական փոխչեմպիոն հունահռոմեական ոճի ըմբիշ Միհրան Հարությունյանը միացել է հայկական սպորտի զարգացման վերաբերյալ քննարկումներին: Վերջին օրերին այս թեման համացանցում եւ դրանից դուրս արդիական է մարզիկներն ու մարզասերների շրջանում: Հարությունյանն իր թիմի հետ 10 կետ է առանձնացրել, որոնք, ըստ նրա, անհրաժեշտ են հայկական սպորտին:

Նա նշում է, որ դրանք են.

1.Անձնակազմի կրճատում

Այս պահին նախարարության կառուցվածքն ուռճացված է, կան գործառույթներ, որոնք կամ կրկնվում են, կամ էլ անհրաժեշտ չեն: Այդ պատճառով բյուրոկրատիայի մակարդակը բարձր է, ինչը խանգարում է, որ ոլորտը թափանցիկ լինի: Սկանդինավյան երկրներում ոլորտի համար պատասխանատու դեպարտամենտը կազմված է ոչ ավելի քան 20 հոգուց բաղկացած խմբից:

2.Բարելավել մենեջմենթը

Ոլորտին պետք են մարդիկ, որոնք պրակտիկ փորձ ունեն: Պետք է ուսումնական կուրսեր անցկացվեն կամ էլ արտասահմանից մասնագետներ հրավիրվեն: Սփյուռքում կան ուժեղ մասնագետներ, նրանց միջեւ կարելի է մրցույթ անցկացնել եւ ընտրել:

3.Մասսայական սպորտը կնպաստի առողջ ազգ ունենալուն

Այս պահին ՀՀ-ում մասսայական սպորտը զարգացնում են էնտուզիաստները, որոնք իրենց մրցումներն են կազմակերպում, ինչպիսին է օրինակ, Yerevan Marathon Run-ը: Պետք է զարգացնել ենթակառուցվածքները, քաղաքներում, գյուղերում պետք է լինեն հեծանվահրապարակներ, 20x40 խաղահրապարակներ (ֆուտբոլի, բասկետբոլի, վոլեյբոլի համար): ՀՀ-ում մինչեւ 30 տարեկան յուրաքանչյուր անձ պետք է ներգրավված լինի սպորտում: Այդպես մենք կունենանք ֆիզիկապես եւ հոգեբանորեն ուժեղ ազգ:

4.Սպորտով զբաղվելը պետք է հասանելի լինի բոլորին

Անկախ ֆինանսական պայմաններից՝ յուրաքանչյուր բնակիչ պետք է լողավազան, մարզասրահ, սպորտային խմբակ հաճախելու հնարավորություն ունենա: Ով գումար ունենա, ինքը կվճարի, իսկ նրանց համար, ովքեր չեն ունենա, այդ գումարը կսուբսիդավորի պետությունը կամ տվյալ մարզաձեւի ֆեդերացիան: Տարբեր երկրներ հատուկ չափանիշ ունեն, թե ամեն 1000 մարդու համար քանի խաղահրապարակ, մարզադահլիճ, լողավազան պետք է լինի: Այդ թիվը տատանվում է 5-10 հազար մարդու համար 1 սպորտային օբյեկտով:

5.Պրոֆեսիոնալ մոտեցում օլիմպիական հավաքականի անդամների նկատմամաբ

Բժշկական ապհովագրություն. առանց բժշկական ապահովագրության պրոֆեսիոնալ մարզիկը նոնսենս է ժամանակակից աշխարհում:

Բժշկություն. վերականգնողական գործընթաց է անհրաժեշտ ելույթներից առաջ եւ հետո: Հիմնականում այս ժամանակահատվածներում են լինում վնասվածքները: Անհրաժեշտ է գրագետ սննդակարգ եւ վիտամիններ:

Պայմանագրեր. Աստված մի արասցե, օլիմպիական հավաքականի մարզիկը հիվանդացել է, նա աշխատավարձ չի ստանում: Պրոֆեսիոնալ պայմանագիրը պետք է երաշխիք լինի մարզիկի վաղվա օրվա համար:

6.Ուժեղ եւ անկախ ֆեդերացիաներ

Ֆեդերացիաները պետք է լինեն ազատ, ինքնուրույն, պետք է իրենք կառուցեն սկսած դպրոցական խմբակներից մինչեւ օլիմպիական մակարդակ (եթե այդ մարզաձեւը կա օլիմպիական խաղերում) իրենց զարգացման ուղին: Պետք է աշխատեն հովանավորների հետ, մրցաշարեր անցկացնեն, մասսայականացնեն իրենց մարզաձեւը: Ամբողջական սուբսիդավորումը ֆեդերացիայի մեջ սպանում է զարգանալու ցանկությունը: Լավագույն օրինակն ԱՄՆ-ն է, որտեղ ֆեդերացիաներն իրենք են կառուցում իրենց հիերարխիան՝ սկսած դպրոցներից մինչեւ օլիմպիական կոմիտե:

7.Բեթինգն օգտագործվում է սպորտի համար

Ամբողջ աշխարհում կա պրակտիկա, ըստ որի, լոտոների, բուքմեյքերական ընկերությունների եկամուտների որոշակի տոկոս ուղղվում է տվյալ երկրի սպորտի զարգացմանը: Չինաստանում դա կազմում է 60%, Մեծ Բրիտանիայում՝ 35%: Սա լրացուցիչ եկամտի աղբյուր է: Սրան կարելի է ավելացնել նաեւ գեյմինգի (խաղատներ, մոլախաղեր) եկամուտների որոշակի տոկոս:

8.Պրոֆեսիոնալ սպորտը պետք է լինի մասնավոր

Այսբերգի գագաթը պրոֆեսիոնալ սպորտն է: Բուրգի ներքեւում մասսայական սպորտն է, որից աստիճանաբար ընթանալով դեպի վերեւ դառնում են պրոֆեսիոնալներ, որոնց աշխատանքը սպորտն է: Սա պետք է զարգանա ներդրողների շնորհիվ: Պետությունը ոչ մի կապ չպետք է ունենա պրոֆեսիոնալ սպորտի հետ:

9.Կիբերսպորտ

Հայաստանում կիբերսպորտը սիրողական մակարդակի է, սակայն պետք է պրոֆեսիոնալ թիմեր ստեղծել, որոնք կարող են հավակնել համաշխարհային հաջողությունների:

10.Մասսայականացում

Հայտնի մարզիկները, շոու-բիզնեսի ներկայացուցիչները, բիզնեսմենները, քաղաքական գործիչները պետք է սեփական օրինակով ցույց տան, որ սպորտով զբաղվելը հաճելի է եւ անհրաժեշտ: Հեռուստահաղորդումները, բաց մարզումները, վարպետության դասերը կմեծացնեն մարդկանց հետաքրքրությունը սպորտի նկատմամբ:

Վերջում Միհրան Հարությունյանն ավելացրել է, որ ՀՀ-ում սպորտը զարգացնելու համար անհրաժեշտ է կամքի ուժ նախորդ իշխանություններից մնացած խնդիրները վերացնելու եւ շատ բաներ փակելու համար: Ըստ նրա՝ անհրաժեշտ է նաեւ ուժեղ թիմ, որը կզբաղվի ոչ թե բյուրոկրատական քաշքշուկներով, այլ կկարողանա աշխատելուն զուգահեռ խնդիրներ լուծել:

Սպորտի զարգացման ու կարեւորության մասին խոսել է նաեւ օլիմպիական մեկ այլ փոխչեմպիոն: Երեկ՝ փետրվարի 13-ին, ԱԺ-ում այդ թեմայով ելույթ է ունեցել օլիմպիական փոխչեմպիոն, աշխարհի ու եվրոպայի չեմպիոն հունահռոմեական ոճի ըմբիշ, ԱԺ պատգամավոր Արսեն Ջուլֆալակյանը: