Կառավարությունը բացասական եզրակացություն տվեց Նաիրա Զոհրաբյանի՝ Քր․ օրենսգրքում փոփոխություն կատարելու նախագծին

Այսօր՝ փետրվարի 15-ին, ՀՀ կառավարությունը բացասական եզրակացություն տվեց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանի նախագծին, որով առաջարկվում էր Հայաստանի Հանրապետության Քրեական օրենս­գրքի 69-րդ հոդ­վա­ծում փոփոխություն կատարել, որի համաձայն՝ մինչեւ դատա­վճռի օրինական ուժի մեջ մտնելը կալանքի տակ պահելու ժամկետը պետք է հաշ­վակցվի ազատազրկման, կար­գա­պա­հական գումարտակում պահելու ձեւով նշա­նա­կված պատժին՝ 1 օրը հաշվելով 1,5 օրվա դիմաց:

Ըստ նախագծի հիմնավորման՝ ներկայացված օրենքի նախագծով նախնական կալանքի տակ պահելու ժամկետն ազա­տազրկման եւ կարգապահական գումարտակում պահելու ձեւով նշանակված պատժի մեկ օրվա հաշվակցումը մեկ ու կես օրով պայմանավորված է ՀՀ-ում նախնական կա­լան­քի վայրերի պայմաններով, որոնք երբեմն ավելի ծանր են, քան քրեակատարողական հիմ­նարկներում․

«ՀՀ գործող քրեական օրենսգրքի 69-րդ հոդվածի 3-րդ մասի համաձայն՝ մինչեւ դատավճռի օրի­նա­կան ուժի մեջ մտնելը կալանքի տակ պահելու ժամկետը հաշ­վակցվում է ազատա­զրկ­ման, կարգապահական գումարտակում պահելու ձեւով նշա­նակ­ված պատժին՝ մեկ օրը հաշ­վելով մեկ օրվա դիմաց: Նշված հոդվածի 3-րդ մասը փո­փո­խության է ենթակվել դեռ­եւս 2004 թվականին, սակայն Կ-248-23.2004-ՊԻ-010/0 օրեն­քի նախագծի հիմնավորման մեջ նույնիսկ որեւիցէ անրադարձ չկա՝ 69-րդ հոդվածի 3-րդ մասը՝ փոփոխության են­թար­կե­լու անհրաժեշտության վերաբերյալ, իսկ մինչ 2004 թվա­կանի փոփոխությունը քրե­ա­կան օրենսգրքի 69-րդ հոդվածի 3-րդ մասով սահ­ման­վել է, որ մինչեւ դատավճռի օրինա­կան ուժի մեջ մտնելը կալանքի տակ պահելու ժամ­կե­տը հաշվակցվում է ազատա­զրկ­ման, կարգապահական գումարտակում պահելու ձեւով նշանակված պատժին՝ մեկ օրը հաշվելով մեկուկես օրվա դիմաց:

Ներկա իրավիճակում կան բազմաթիվ քրեական գործեր, որոնց շրջանակում նախ­­նական կալանքի տակ գտնվող անձինք՝ ամիսներով կամ տարիներով, կալա­նա­վոր­ված անձի կարգավիճակում սպասում են դատարանի դատավճռին, եւ հաշվի առնելով, որ նախնական կալանքի տակ գտնվող անձի կարգավիճակը ենթադրում է ավելի խիստ մե­կուսացում եւ պահման ավելի խիստ պայմաններ՝ գործող քրեական օրենսգրքի՝ պա­տիժների հաշվակցման մոտեցումն անթույլատրելի է եւ մարդասիրական չէ»,-նշված է նախագծում:

Նախագծի ընդունման արդյունքում կալանքի տակ պահելու ժամկետն ազա­տա­զրկման եւ կարգապահական գումարտակում պահելու ձեւով նշանակված պատժի՝ մեկ օրը կհաշվվեր մեկ ու կես օրվա դիմաց, ինչպես նաեւ կսահմանվեր օրենքի հետադարձ ուժի ժամկետը, որը կտարածվեր 2004թ-ից առ այսօր հարուցված քրեական գործերով մեղա­դրյալների (ամբաստանյալների) եւ դատապարտյալների վրա:

Նույնաբովանդակ առաջարկ ներկայացրել էր նաեւ «Լուսավոր Հայաստան» խմբակցությունը, որը եւս մերժվեց:

Կառավարության եզրակացության համաձայն՝ նախագծով առաջարկվող փոփոխությունը կրում է հատվածական բնույթ, ինչը կարող է հանգեցնել խնդրահարույց իրավիճակների: Ըստ այդմ՝ հարցին անհրաժեշտ է ցուցաբերել առավել համապարփակ մոտեցում՝ լուծումներ նախատեսելով Հայաստանի Հանրապետության քրեական եւ քրեակատարողական օրենսգրքերի նախագծերի համակարգային բարեփոխումների շրջանակներում:

ՀՀ վարչապետ Նիկոլ Փաշինյանն ասաց, որ հանցավորության մակարդակի առումով որոշակի խնդիրներ կան, եւ պետք է դրանց մակարդակը իջեցվի: Փաշինյանը նշեց, որ կա տրամաբանություն, ըստ որի համաներմամբ ազատ արձակված անձինք նորից ձերբակալվում են նույնատիպ հանցանք կատարելու համար․

«Կարծում եմ՝ այս ոլորտում համահարթեցնող տրամաբանությամբ գործողություն պետք է չարվի, սրա փոխարեն այն խնդիրը, որը մենք անում ենք համաներումների միջոցով, մենք պետք է լուծենք պայմանական վաղակետ ազատ արձակման մեխանիզմն ի վերջո գործարկելու միջոցով»,- ասաց վարչապետը: