«Միկան» կարող են տալ ՀՖՖ-ին. բասկետբոլի ֆեդերացիայում մտահոգ են

Հայաստանի բասկետբոլի ֆեդերացիայում մտահոգ են, թե ինչ է լինելու «Միկա» մարզահամալիրի հետ եւ ինչպես դա կանդրադառնա իրենց մարզաձեւի վրա: Այս մասին այսօր՝ փետրվարի 18-ին, լրագրողների հետ հանդիպման ժամանակ ասաց Ա եւ Բ լիգաների նախագահ՝ Արա Պողոսյանը: Մարզահամալիրը պատկանում է սպորտի նախարարությանը, որը միացվելու է կրթության նախարարությանը: Ըստ Պողոսյանի՝ խոսակցություններ կան, որ «Միկան» կարող է տրվել Հայաստանի ֆուտբոլի ֆեդերացիային:

««Միկայից» բացի՝ Հայաստանում ոչ մի կառուց չկա, որը կարող է ընդունել այսպիսի մրցաշար (խմբ. նկատի ունի Երեւանում կայանալիք ԵԱՏՄ գավաթը) ոչ միայն բասկետբոլի: Անհանգստություն կա իմ եւ բասկետբոլային ողջ հասարակության մոտ, որ «Միկա» մարզադահլիճը կարող է փոխանցվել մեկ ուրիշ կազմակերպության, եւ բասկետբոլը կկորցնի այս մարզադահլիճը: Սպորտի նախարարությունը լուծարվում է, անցնելու է ուրիշ նախարարության: Թե ինչ կանի պետությունը այս կառույցի հետ, ինձ համար անձամբ մտահոգիչ է: Վախենում ենք, որ... խոսակցություններ կան, որ ֆուտբոլին են տալու: Եթե ֆուտբոլն ունի բազմաթիվ կառույցներ... մենք շատ հարգում ենք ֆուտբոլը, բայց բազմաթիվ կառույցներ ունի մրցումներ անցկացնելու համար, բասկետբոլը չունի: Այսօր Երեւանում կա 2 մարզադահլիճ, որոնք կարող են բասկետբոլ ընդունել՝ «Օլիմպավանը» եւ «Միկան»: 1 րոպե ազատ չկա այդ դահլիճներում, որ կարողանանք ինչ-որ ավելի բան անցկացնել»,- ասաց նա:

Պողոսյանը նշում է, որ շատ ուրախ է, որ նման մարզադահլիճ կա, որը տարբեր մարզաձեւերը կարող են օգտագործել: Իսկ ինչ վերաբերվում է սպորտի նախարարության հետ կապված փոփոխությունների արդյունքում առաջացած այս խնդրին, իր տեսակետն ունի լուծման վերբերյալ: Նա պատասխանեց հարցին՝ արդյոք բասկետբոլի ֆեդերացիան չի կարող համագործակցել ՀՖՖ-ի հետ, եթե ի վերջո «Միկան» հանձնվի ՀՖՖ-ին եւ ընդհանրապես լուծման ինչ տարբերակներ է տեսնում:

«Հնարավոր է (խմբ. համագործակցել), բայց իմ ձեռքում չէ: Այդ որոշումները պետք է լինեն կոլեգիալ, բայց մերը չէ մարզադահլիճը: Մենք շատ ուրախ ենք, որ այդպիսի մարզադահլիճ կա, որ ժամանակին ՀՀ նախկին ղեկավարությունը, մեր խնդրանքով, վերանորոգեց մենք կարողացանք միջազգային մի շարք խաղեր անցկացնել: Այսօր ես չգիտեմ՝ ինչ կարգավիճակ է լինելու: Իմ կարծիքը կարող եմ հայտնել, բայց դա շատ քիչ է, ես գործընթացներին չեմ մսնակցում: Իմ կարծիքն այն է, որ ինչքան շատ բասկետբոլին, բասկետբոլի ֆեդերացիային կամ A լիգային դահլիճ տան, զարգացումը բասկետբոլի լավ կլինի: Բայց ունիկալ կառույցներ են, ամեմ մեկի աչքն էլ դրա վրա է, որովհետեւ չունենք....»,- ասաց նա:

Պողոսյանը նաեւ խոսեց մարզադահլիճների պայմանների մասին: Մասնավորապես «Օլիմպավանում», նրա խոսքով, թեեւ կարելի է խաղ կազմակերպել, այլ հարցերում, այն թերանում է: Օրինակ, կարող է ընդունել ընդամնեը 300 հանդիսատես ու հարմար չէ հեռարձակումներ կազմակերպելու, մեծ միջոցառումներ անցկացնելու համար: «Դինամոյի» հատակը լավը չէ, օղակներն էլ հանված են: Կարեն Դեմիրճյանի անվան մարզահամերգային համալիրում չկա հատակ եւ այն շատ թանկ է վարձակալելու համար, պետության տարբեր շրջաններում դահլիճներ չկան կամ շատ վատ վիճակում են: Բասկետբոլի ֆեդերացիան ինքն է փորձում հովանավորներ գտնել դրանք վերանորոգելու համար: Նշում են, որ, օրինակ, Արթիկի մարզադպրոցի դահլիճի վերանորոգման համար ֆեդերացիայի գտած հովանավորը 70 հազար դոլար է ծախսել:

«Ամեն ինչ անում ենք, որ մարզերում հնարավորություն ստեղծենք թիմերի համար: Օրինակ, վերջերս, մեր նախաձեռնությամբ, հովանավոր գտանք եւ Արթիկի սպորտդպրոցի մասզադահլիճը վերանորոգեցինք, ժամանակակից հատակ դրեցինք, ոչ մի ծախս չեղավ ո՛չ պետության, ո՛չ Արթիկի կողմից, եւ տվեցինք մարզադպրոցին: Ուզում ենք զարգացնել թիմերի ու հովանավորների հետ համագործակցության այդ բանաձեւը, բայց դա միայն մեր կողմից չպետք է լինի, պետության կողմից էլ պետք է լինի, մենք ամեն ինչով օգնենք»,- ասաց նա:

Առաջիկայում Հայաստանի կանոնավոր առաջնությունը՝ A լիգայի նախաձեռնությամբ՝ Հայաստանում աննախադեպ մրցաշար է անցկացվելու ԵԱՏՄ երկրների թիմերի մասնացկությամբ: Մինչեւ հիմա ԵԱՏՄ երկրների մասնակցությամբ օլիմպիական մարզաձեւերից ոչ մի նման մրցաշար չի եղել: Խաղալու են «Ուրարտուն» Բելառուսի «Ցոռ Բորիսոֆենը», Ղազախստանի «Բարսի Ատիրաուն», Ռուսաստանի Սուպերլիգան ներկայացնող Տուլայի «Արսենալը»: