ՀՀ-ում բասկետբոլի միջազգային աննախադեպ մրցաշար կանցկացվի

Հայաստանում ԵԱՏՄ երկրների թիմերի մասնակցությամբ աննախադեպ մրցաշար է տեղի ունենալու՝ ԵԱՏՄ գավաթի խաղարկություն: Այն անց է կացվելու Հայաստանի կանոնավոր առաջնության՝ A լիգայի նախաձեռնությամբ: Մասնակցելու են Բելառուսի «Ցոռ Բորիսոֆենը», Ղազախստանի «Բարսի Ատիրաուն», Ռուսաստանի Սուպերլիգան ներկայացնող Տուլայի «Արսենալը» եւ Հայաստանի «Ուրարտուն»: Այսօր՝ փետրվարի 18-ին, լրագրողների հետ հանդիպման ժամանակ A լիգայի նախագահ Արա Պողոսյանը խոսեց մրցաշարի կարեւորության մասին (լուսանկարում ձախից առաջինը):

«Նպատակ կա, որ ԵԱՏՄ երկրների ինտեգրացիան կայանա ոչ միայն տնտեսական ոլորտում, այլեւ սպորտում, որում ես շատ մեծ քաղաքական ապագա եմ տեսնում: Կա բասկետբոլում ВТБ միացյալ լիգա, որտեղ խաղում են նախկին ԽՍՀՄ երկրների թիմեր, բայց որպես ԵԱՏՄ մրցակցություն թե՛ բասկետբոլում, թե՛ ցանկացած այլ մարզաձեւում չկա: Սա մի նախաձեռնություն է մեր կողմից, որն առաջին անգամ թույլ է տալու պրոֆեսիոնալ թիմերին մրցակցել՝ ներակայացնելով ԵԱՏՄ երկրները: Դուք գիտեք, որ ԵԱՏՄ-ն 5 երկիր է ներկայացնում, բայց մենք Ղրղզստանից թիմ չհրավիրեցինք, որովհետեւ Ղրղզստանը չունի կանոնավոր պրոֆեսիոնալ առաջնություն, եւ մրցակցության մասին խոսք չէր լինի, եթե այնտեղից թիմ գար»,- ասաց նա:

«Ուրարտուն», որը ՀՀ առաջնությունում՝ A լիգայում,  2-րդն է, իր խնդիրներն է լուծելու այս մրցաշարով: A լիգան շուտով թեւակոխելու է մրցաշրջանի վճորոշ փուլ: Նրանք պատրաստվում են համալրել կազմը ուժեղ խաղացողներով ու ստուգել իրենց հնարավորությունները: Ցանկանում են հասկանալ՝ ինչ կարող են անել Հայաստանում, եւ եթե եվրագավաթներին մասնակցելու հնարավորություն ստեղծվի, արդյոք կկարողանան արժանի ելույթներ ունենալ դրսում: Ակումբի նախագահ Կարեն Գիլոյանը խոսեց այդ մասին եւ անդրադարձավ ԵԱՏՄ գավաթի խաղարկությունում մրցակիցների հնարավորություններին:

«Մասնակցելու է «Ցոռ Բորիսոֆենը», որն այս պահին առաջատարն է եւ առաջ է անցել նույնիսկ ВТБ միացյալ լիգայում հանդես եկող «Ցմոկիից»: Խաղում է Ատիրաուի «Բարսին» Ղազախստանից, որն այս պահին իրենց առաջնությունում 2-րդն է, հետ է մնում միայն «Աստանայից», որը նույնպես խաղում է ВТБ միացյալ լիգայում: Ռուսաստանը ներկայացնում է Տուլայի «Արսենալը», որը Սուպերլիգայի ուժեղագույններից է: Ինձ թվում է՝ մրցակիցների անուններն ու այս պահին իրենց առաջնություններում զբաղեցրած դիրքերը հիմք են տալու հետագայում եզրահանգման գալ՝ կկարողանանք ապագայում Եվրոպայում չպարտվել ու եթե պարտվել էլ, ապա հավասարը հավասարի պայքարում, թե՞ մեզ դեռ վաղ է մտածել Եվրոպայի մասին: Հիմնական նպատակը սա է»,- ասաց նա Գիլոյանը:

Ուժերը փորձելու տեսանկյունից ԵԱՏՄ գավաթի խաղարկությունը կարեւորում է նաեւ «Բարսի Ատիրաուի» 2-րդ մարզիչ Պետե Բորիսը: Նա նշում է, որ իրենք ունեն բազմաթիվ երիտասարդ խաղացողներ: Ընդգծում է, որ նրանց համար կարեւոր փորձ կլինի միջազգային մրցաշարում հանդես գալը, նման մրցակիցների դեմ խաղալը:

«Առաջին անգամ եմ ՀՀ-ում: Մեծ սպասելիքներ ունեմ: Մեր թիմում շատ են երիտասարդները: Կարծում ենք՝ շատ կարեւոր է, որ նրանք փորձ ձեռք բերեն միջազգային մրցաշարում: Իրենց դրսեւորելու հնարվորություն կստանան, օգտակար կլինի»,- ասաց նա:

Ղազախական թիմում է հանդես գալիս ՀՀ հավաքականի կենտրոնական Արկադի Մկրտչյանը: Պետե Բորիսն Արա Պողոսյանին գովեստի խոսքեր է ասել մարզիկի մասին: Նշել է, որ իրենց թիմի համար շատ կարեւոր խաղացող է: Արա Պողոսյանը մանրամասներ ներկայացրեց հայ բասկետբոլիստի մասին իրենց զրույցից:

«Թիմի առաջատարներից է: Հարցեցի Բորիսին՝ արդյոք գոհ են մարզիչները նրանից, ասաց՝ այո, նա մեր հիմնական կազմի խաղացող է,- ասաց Պողոսյանն ու կատակեց,- իմ սանիկն է, հետը կխոսեմ խաղից առաջ»:

Մրցաշարն անցկացվելու է փետրվարի 22-26-ը: «Ուրարտուի» խաղերն ուղիղ հեռարձակմամբ ցուցադրվելու են Հանրային հեռուստաընկերության եթերում: Մյուս խաղերը կլինեն Հանրայինի արբանյակային հեռարձակմամբ, ինչպես նաեւ ՀՀ Բասկետբոլի ֆեդերացիայի ֆեյսբուքյան պաշտոնական էջում: Բոլոր հանդիպումներն անց են կացվելու «Միկա» մարզահամալիրում՝ բացառությամբ մեկի՝ «Արսենալ» - «Բորիսֆեն» խաղի: Այն տեղի կունենա «Օլիմպավանում», քանի որ փետրգվարի 24-ին «Միկայում» մարզական այլ միջոցառում է նախատեսված: Մուտքը հրավիրատոմսերով է, սակայն ցանկացողներին մուտք գործելու հնարավորություն կտրվի: Այդ մասին ֆեդերացիան լրացուցիչ տեղեկություններ կհաղորդի:

Խաղացանկը

23.02 «Ուրարտու» - «Բարսի» («Միկա») կմեկնարկի ժամը 19:00-ին

24.02 «Արսենալ» - «Բորիսֆեն» («Օլիմպավան») 13:00

25.02 «Բարսի» - «Արսենալ» («Միկա») 13:00

25.02 «Ուրարտու» - «Բորիսֆեն» («Միկա») 19:00

26.02 «Բորիսֆեն» - «Բարսի» («Միկա») 13:00

26.02 «Ուրարտու» - «Արսենալ» («Միկա») 19:00