Տարվա սպորտային կարեւորագույն մրցանակաբաշխություններից մեկը. հայտնի են «Լաուրեուսի» հաթողները

«Լաուրեուս 2019» մարզական մրցանակաբաշխության ընթացքում հայտնի են դարձել 2018 թ. օրացուցային տարվա լավագույնները: Միջոցառումը կայացել է երեկ՝ փետրվարի 18-ին, Մոնակոյում: Հաղորդավարներն են եղել հայտնի դերասան Ջեյմս Մարսդենը եւ երգչուհի Ջորջա Սմիթը: Մասնակցել են մարզական աշխարհի մի շարք աշխարհահռչակ ներկայացուցիչներ:

«Տարվա լավագույն մարզիկ» անվանակարգում հաղթել է թենիսիստ Նովակ Ջոկովիչը: Սերբը, որը 2018-ին արմունկի վնասվածքից վերականգնվելուց հետո հաղթել է «Ումբլդոնում» ու ԱՄՆ Բաց առաջնությունում, արդեն չորրորդ անգամ է արժանանում այս մրցանակին:

^{Նովակ Ջոկովիչ}

««Լաուրեուսն» այն մրցանակն է, որին յուրաքանչյուր մարզիկ ցանկանում է արժանանալ, եւ սա ինձ համար մեծ պատիվ է: Սպորտային աշխարհի այսպիսի մեծերի կողքին այսօր այստեղ գտնվելը եւ «Լաուրեուսի» կողմից ողջ աշխարհում կատարվող ոգեւորիչ գործունեության մասին լսելն այս մրցանակին հատուկ նշանակություն են հաղորդում»,- ասել է նա:

^Բայլզ

«Տարվա լավագույն կին մարզիկ» է ճանաչվել ամերիկացի հայտնի մարմնամարզիկ Սիմոնե Բայլզը: Աշխարհի նախորդ առաջնության ընթացքում նա 4 ոսկե, 1-ական  արծաթե ու բրոնզե մեդալ է նվաճել: Նա «Լաուրեուսի» կողմից նույն մրցանակին էր արժանացել նաեւ 2017-ին: Ընդամենը 21 տարեկան Բայլզն աշխարհի առաջնությունների 14 ոսկե մեդալ ունի:

^{Դեշամը (մեջտեղում) տարվա լավագույն թիմի մրցանակը վերցնելուց հետո}

«Տարվա լավագույն թիմ» է ճանաչվել Ֆրանսիայի ֆուտբոլի ազգային հավաքականը: Անցած տարի այն հաղթեց աշխարհի 2018 թ. առաջնությունում: Երեկ մրցանակը թիմի անունից ստացել է գլխավոր մարզիչը՝ Դիդյե Դեշամը:

^{Արսեն Վենգեր}

«Կյանքի մեծագույն ձեռքբերում» անվանակարգում հաղթել է «Արսենալի» նախկին գլխավոր մարզիչ Արսեն Վենգերը լոնդոնյան թիմը 22 տարի գլխավորելու ընթացքում ֆուտբոլում ունեցած մեծ ներդրման համար: Նրա գլխավորությամբ «զինագործներն» անպարտելի մրցաշրջան են անցկացրել: Բացի այդ՝ նա մեծ ներդրում է ունեցել անգլիական ֆուտբոլում սկաութինգի, մարզումների, դիետաների վերաբերյալ իր մոտեցմամբ, ինչպես նաեւ շեշտը հարձակվողական ֆուտբոլի վրա դնելով:

Մյուս անվանակարգերում հաղթել են հետեւյալ մարզիկները.

^{Թայգեր Վուդզ}

«Տարվա վերադարձ» - գոլֆիստ Թայգեր Վուդզ

«Տարվա առաջխաղացում» - թենիսիստուհի Նաոմի Օսակա

«Տարվա՝ հաշմանդամություն ունեցող մարզիկ» - լեռնադահուկորդ Հենրիետա Ֆարկաշովա

«Տարվա սպորատյին անձ» - սնոուբորդիստ Քլոե Քիմ

^{Սիաո Բոյու}

«Տարվա գլխավոր սպորտային պահ» -  Սիաո Բոյու (որպես պատմության մեջ 2 վերջույթներն անդամահատված 2-րդ մարդը, որը մագլցել է Էվերեստը)

«Տարվա հատուկ նվաճում» - վազորդ Էլիուդ Քիփոչե

^{Լինդսի Վոն}

«Տարվա սպորտային ոգի» - լեռնադահուկորդ Լինդսի Վոն

^{«Յուվա»}

«Սպորտը բարի նպատակների համար» - Հնդկաստանում աղջիկների ֆուտբոլի թիմ «Յուվա»