V Sport-ը պատրաստում է հայկական առաջին մարզական հեռուստաալիքը

V Sport հեռարձակող ընկերությունն աշխատում է հայկական առաջին մարզական հեռուստաալիքի վրա: Նախագծի մասին «Հայկական ժամանակ»-ի հետ զրուցեց պրոդյուսեր Վլադ Սահակյանը, որն ավելի հայտնի է որպես «Վիտամին ակումբի», «Վիտամին ակումբի» անդամների մասնակցությամբ նախագծերի, ինչպես նաեւ «Women's Club»-ի պրոդյուսեր: Նա պատմեց աշխատանքներից ու խոսեց հնարավոր ժամկետների մասին:

«Հիմա ավարտին ենք հասցնում տաղավարների հարդարման աշխատանքները: Կարծում ենք՝ եթե ամեն ինչ նորմալ ընթանա, աշնանը՝ նոր մրցաշրջանում, կունենաք հնարավորություն անխտիր բոլոր հանդիպումները հեռարձակելու, ու խոսքը միայն ֆուտբոլի մասին չէ. օրինակ, հիմա բասկետբոլի 2 լիգա ենք սպասարկում»,- ասաց նա:

Հեռուստաալիքը կոչվելու է V Sport: Լինելու է համացանցում, սակայն Սահակյանը չի բացառում, որ այն կարող է հայտնվել տարբեր հեռուսաալիքների փաթեթներում: Սովորաբար հեռուստաալիքների 1 օրվա եթերի թարմ հատվածը լինում է 8 ժամ: V Sport-ի հեղինակները կարծում են, որ կհասցնեն այդքան, նույնիսկ երբեմն իրենց բովանդակությունը կարող է գերազանցել դա: Եթերը հիմնված է լինելու հայկական սպորտի վրա: Հնարավոր են վերահեռարձակումներ այն դեպքում, եթե նպատակը լինի հայ մարզիկներին ցուցադրելը: 

Այս շրջանում V Sport-ի թիմը նաեւ մշակում է հաղորդումները, որոնք, բացի ուղիղ հեռարձակումներից, լինելու են եթերում: Արդեն 17 նախագիծ ունեն: Շատ են կարեւորում մասսայական սպորտը եւ մեծ շեշտադրում են կատարելու դրա վրա: Հաղորդումները լինելու են ինչպես մեծ սպորտի, այնպես էլ մասսայականի վերաբերյալ: Որոշ փակագծեր Սահակյանը բացեց:

«Օրինակ, եթե երեկոյան սպորտային շոու լինի, որում հայտնի արտիստները եւ մարզիկները միասին բասկետբոլի գնդակը նետում են զամբյուղի մեջ, նման հաղորդումների դիտողականությունն ավելի բարձր է, քան մեր բասկետբոլի A լիգայի խաղերը: Բայց մեկը մյուսին կօգնի, ու այնտեղի մասսայականությունը կբարձրանա: Մեծ ուշադրություն ենք դարձնելու պատանեկան միջոցառումներին: Նախատեսում ենք շաբաթ, կիրակի օրերին առավոտյան միջդպրոցական մրցումներ կազմակերպել, այդ ամենը հեռարձակել ամենաբարձր որակով: Պատկերացրեք՝ թիվ 183 դպրոցի 8-րդ դասարանի վոլեյբոի թիմը խաղում է Սեւանի թիվ 2 դպրոցի վոլեյբոլի թիմի դեմ, ու դա ոչ թե փլատակ դահլիճում, անմխիթար կադրով, այլ ամենաբարձր մակարդակով: Ինչ վերաբերում է դահլիճներին, ապա դրանց համար էլ ունենք ռեալիթի-շոուի գաղափար: Պետք է վերանորոգենք դահլիճները ու դրանից սարքենք շոու: Հովանավորներ գտնենք, ընտրենք լքված մարզադահլիճ, վերանորոգենք, հանձնենք համայնքին»,- պատմեց նա՝ ավելացնելով, որ սպորտը գրավիչ դարձնելու համար դրան վերաբերող նախագծերում պետք է կիրառել շոու բիզնեսին հատուկ հնարքներ:

Հեռուսաալիքի հիմքը ներկայիս V Sport հեռարձակման նախագիծն է, որը սկսվել է 2015 թ.: Թիմի անդամներն ուղիղ եթերով ցուցադրում են հասյատանյան ֆուտբոլային, բասկետբոլային հանդիպումներ, ըմբշամարտի, բռնցքամարտի մրցաշարեր: Վերջերս իրենք են կազմակերպել բասկետբոլի միջազգային մրցաշարի՝ ԵԱՏՄ գավաթի խաղարկության հեռարձակումը: Տարիների ընթացքում հասել են նրան, որ հիմա կարող են բազմատեսախցիկանոց հեռարձակումներ իրականացնել մարզադաշտերից, եթե առաջարկ լինի: Հեռարձակումներ կազմակերպելու գաղափարը Սահակյանի մոտ ծվել է 2012 թ. օլիմպիական խաղերի ընթացքում, որից նրա քեռու որդին՝ օլիմպիական չեմպիոն ըմբիշ Արթուր Ալեքսանյանը, վերադարձավ բրոնզով:

«Ինձ բռնացրեցի այն մտքի վրա, որ հայերս հետեւում ենք մեր այն մարզիկներին, որոնք արդեն բարձունքների են հասել: Օրինակ, Հենրիխ Մխիթարյանին սկսում ենք ճանաչել Դորտմունդի «Բորուսիայից», բայց, երբ խաղում էր «Փյունիկում», շատ քիչ էին նրան ճանաչում: Ֆիքսեցի խնդիրը, որ մեր մարզիկներին չենք ճանաչում նրանց՝ աճելու ընթացքում, հայրենիքում եղած ժամանակ: Այն մարդկանցից չեմ, որ մտածում եմ՝ նստենք թախտին, սպասենք բախտին: Ուղղակի մի քիչ դադաղ եղավ, քանի որ օգնություն չկար ոչ մի կողմից: Ունեինք որոշակի տեխնիկական միջոցներ, եւ ես անձամբ իմ հետագա աշխատանքից ինչ կարողանում էի առանձնացնել, ներդնում էի այս ուղղությամբ: Վերազինվեցինք ու 2015 թվականից պատրաստ եղանք հեռարձակումներ անել»,- պատմեց նա:

Թիմում 10-12 հոգի են, բոլորը, ինչպես Սահակյանն ընդգծում է, էնտուզիաստներ են ու իրենց մասնակցությունը ցուցաբերում են սիմվոլիկ վարձատրության դիմաց: Նույնիսկ կան մարդիկ, որոնք նոր մասնագիտություն են ձեռք բերել V Sport-ում ներգրավվելու համար: Սահակյանը նշում է, որ ինքը ոչ պետությունից, ոչ էլ կառավարությունից գումար չի սպասում, քանի որ կիսում է գաղափարը, որ ամեն մեկն իր աշխատասիրության հաշվին պետք է առաջ գնա: Սակայն խոստովանում է, որ այսպես էլ դժվարությունների են բախվում. նախագծերը դանդաղ են առաջ գնում: Բացի այդ՝ աշխատանքը նաեւ ծանրաբեռնված է ու ֆիզիկապես հոգնեցնող: Այնուամենայնիվ գաղափարը, որին նվիրված են, փոխհատուցում է ամեն ինչ:

«Ես կուզենայի՝ մեր սերնդին՝ մանավանդ դպրոցականներին, վարակենք առողջ ապրելակերպով: Մեր թիմի առաջ ունենք դրած լավ նպատակ եւ բավարարվածություն ենք ստանում դրանից: Արդեն 4-րդ տարին է, ու բավականին աճ ենք գրանցել մասնագիտական առումով: Որ դիտում եմ մեր առաջին հեռարձակումներն ու հիմա, սարերի-ձորերի տարբերություն է: Բայց ամենկարեւորն այն է, որ ամբողջ անձնակազմը հաճույք է ստանում իր կատարած աշխատանքից»,- ասաց նա:

V Sport-ը, սակայն, ինչպես Սահակյանը նշում է, շահույթ չունի: Հեռարձակումներից ունեցած մուտքերը չեն բավականացնում նույնիսկ ծախսերը հոգալու համար: Ստիպված այլ աղբյուրներից են ներդրումներ անում: Շահույթի ակնկալիք չունեն նաեւ հեռուստաալիքից: Սահակյանը նշում է, որ պետք է գիտակցել, որ նման նախագծերն անմիջապես շահութաբեր չեն դառնում. տարիներ են պետք մանավանդ այս պարագայում, քանի որ Հայաստանում շուկա չկա, եւ այն դեռ պետք է ձեւավորել: