ՖԱՖ-ը ՀՖՖ-ի հետ համաձայնության է եկել նախապայմանների հարցում, որոնցից «Red Eagles»-ը դժգոհ էր

ՀՀ ֆուտբոլի հավաքականի ՖԱՖ ֆան-ակումբը համաձայնության է եկել ՀՀ ֆուտբոլի ֆեդերացիայի ներկայացրած պահանջների շուրջ: Վերջերս ՀՖՖ-ն հրապարակել էր տոմսային նոր քաղաքականությունը, որում առանձին մաս նվիրված էր ֆան-ակումբներին: Նշված էր նրանց հատկացված տեղերը, արժեքները, մարզադաշտ գնալու մի շարք այլ նախապայմաններ: Ըստ նոր կարգի՝ Ֆան-ակումբներինն են արեւելյան տրիբունայի I եւ II սեկցիաների կենտրոնական 2 սեկտորների 1-7 կարգերը, որոնք Եվրո 2020-ի որակավորման փուլի Ֆինլանդիայի դեմ խաղում 5000 դրամ են (մյուս խաղերում կարող են տատանվել 4-6 հազար): Ֆան-ակումբներին, ըստ նոր քաղաքականության, կորպորատիվ զեղչեր չեն տրամադրվում, ու նրանք պետք է գնեն հենց այս գնով: «Հայկական ժամանակ»-ի հետ զրույցում ՖԱՖ-ի հիմնադիր-անդամ Սերգեյ Ջանջոյանն ասաց՝ ինչու են իրենք համակերպվել այդ գնի հետ:

«Ճիշտ է՝ 5000 դրամը ֆան-ակումբի համար մի քիչ, կարելի է ասել, շռայլություն է, բայց այդ տեղերը շատ սկզբունքային են մեզ համար, քանի որ մենք ակամա էին այդ տեղերը թողել: Թողել էինք Ռուբեն Հայրապետյանի ստեղծած խոչընդոտների հետեւանքով: Այժմ վերադարձել ենք մեր տրիբունա: Կարծում ենք՝ թեկուզ գներն էժան չեն, բայց մնալու ենք այդ հատվածում»,- ասաց նա՝ ավելացնելով, որ գիտակցում են, որ ՀՖՖ-ն այդպես գումար է աշխատում, եւ իրենք փորձելու են ֆան-ակումբի ներսում՝ իրենց բյուջեով, զեղչեր անել անդամների համար:  

ՀՖՖ քաղաքականությունը նաեւ սահմանում է, որ ֆան-ակումբները պետք է գնեն իրենցից վերեւ գտնվող՝ 8-10-րդ, շարքերի տոմսերը եւ դրանք թողնեն ազատ ավելի վերեւ նստող երկրպագուներին չխանգարելու համար: Հավաքականի մյուս ֆան-ակումբը՝ «Red Eagles»-ը, այս առիթով իր դժգոհությունն էր արտահայտել: ՖԱՖ-ը լուծում է առաջարկել, ու ՀՖՖ-ն ընդունել է:

«Ինչպես շատերը գիտեն՝ արեւելյան տրիբունայում մենք խոչըդոտել ենք հետեւում նստած երկրպագուներին: Դրա համար, կարծում եմ, բավական նորմալ պահանջ է ՀՖՖ-ի կողմից: Մենք պատասխան առաջարկ ենք արել՝ 1 շարք. 8-րդ շարքը լրիվ բավական է: ՀՖՖ-ն այդ մասով փոխըմբռնման է գնացել: Այդ տոմսերը չեն կորում, քանի որ մենք ֆան-ակումբ ենք եւ ոտքի վրա ենք աջակցում, վերեւի տոմսերը ձեռք բերած մարդիկ կգան ներքեւ, մեզ հետ կաջակցեն»,- ասաց նա:

Ֆան-ակումբները նաեւ պետք է ՀՖՖ-ի ստորագրեն ՈՒԵՖԱ-ի ու ՖԻՖԱ-ի կանոններով համաձայնեցված պարտավորագիր, որում կան նաեւ մի շարք այլ պահանջներ: ՖԱՖ-ը որոշ կետերով պատասխան առաջարկներ է արել, ՀՖՖ-ն ընդունել է, ու նրանց միջեւ համաձայնագիրը ստորագրվել է: «Red Eagles»-ը չի ստորագրել: Վերջինիս անդամներն ավելի վաղ բարձրաձայնել էին համաձայնագրի որոշ կետեր ու դգոհել: Մեկը վերաբերում էր նրան, որ ֆան-ակումբները ֆեդերացիային նախապես պետք է տեղյակ պահեն ակցիաների ու պաստառների վրայի գրությունների մասին: Ջանջոյանը նշում է, որ այդպիսին է ՈՒԵՖԱ-ի պահանջը, եւ իրենց միշտ էլ ֆեդերացիայից զանգել ու տեղեկացել են՝ ակցիա լինելու է, թե՝ ոչ, կամ ինչ է լինելու: Մյուս կողմից նա նշեց, որ, ամեն ինչ չէ, որ ՀՖՖ-ին ասելու են, օրինակ, բողոքի ակցիայի դեպքում չեն զգուշացնելու:

«Բնականաբար ո՛չ, եթե ակցիա ենք անելու ֆեդերացիայի դեմ բնականաբար չենք տեղեկացնելու, անելու ենք: Միշտ էլ այդպես է եղել, միշտ էլ չենք ասել, դա նորություն չէ»,- ասաց նա:

Ֆեդերացիան համաձայնագրով նաեւ ֆինասական պահանջ էր ներկայացրել ֆան-ակումբներին: Ըստ դրա՝ եթե անդամները հանդիպումների ընթացքում որեւէ անկարգություն թույլ տան, որի պատճառով ՀՖՖ-ն կտուգանվի, գումարը պետք է ֆան-ակումբը վճարի: Ջանջոյանը նշում է, որ սրան էլ չեն համաձայնել ու այլ առաջարկ են ներկայացրել, որը ՀՖՖ-ն նույնպես ընդունել է:

«Եթե ինչ-որ կողմ խախտում են, մյուս կողմն իրավուքն ունի չեղարկելու հուշագիրը»,- ասաց նա՝ ավելացնելով, որ տոմսերի վրա գրված են լինում վարքի կանոններ ու, եթե որեւէ մեկը խախտում է, պետք պատժվի ըստ դրա, ու այդ հարցով պետք է զբաղվի ֆեդերացիան:

Ի տարբերություն ՖԱՖ-ի՝ «Red Eagles»-ը չի կարողանում ընդհանուր եզրեր գտնել ֆեդերացիայի հետ: Բացի այն, որ նրանց չեն բավարարում համաձայնագրի կետերը, վերջին շրջանում նրանք ՀՖՖ-ի հետ նաեւ այլ տարաձայնություններ են ունեն: Մեկը կապված է այսօր՝ մարտի 26-ին, կայանալիք Եվրո 2020-ի ընտրական 2-րդ տուրի Հայաստան-Ֆինլանդիա տնային խաղին: Նրանք չէին կարողացել տոմսեր ձեռք բերել: Ջանջոյանը չցանակացավ անդրադառնալ կողմերի միջեւ առաջացած խնդիրներին ու մեկնաբանություն չտվեց:

Ինչ վերեւաբերում է ընդհանուր տոմսային քաղաքականությանը, Ջանջոյանն այն դրական գնահատեց: Նա նշեց, որ նախկինում, երբ ակցիաներ էին իրականացնում ՀՖՖ նախկին նախագահ Ռուբեն Հայրապետյանի դեմ, իրենց պահանջներից մեկն այն էր, որ ամենաէժան տոմսերը, որոնք 4000 դրամ էին, գոնե կրկնակի էժանանան: Հիմա ամենաէժան տոմսերը, որոնք նախատեսված են հյուսիսային եւ հարավային տրիբունաների համար, 1000 դրամ են, ինչը, Ջանջոյանի խոսքով, մատչելի է քաղաքացիների համար: