Ըմբշամարտի ֆեդերացիան Միհրան Հարությունյանին հորդորում է չափերը չանցնել

Հայաստանի ըմբշամարտի ֆեդերացիան վրդովված է օլիմպիական արծաթեմեդալակիր, հունահռոմեական ոճի ըմբիշ Միհրան Հարությունյանի պահվածքից: Ռիո 2016-ին մասնակցելուց եւ վնասվածքից ապաքինվելուց հետո նա հավաքականի կազմում մրցումների ու հավաքների չի մասնակցել, հետագայում էլ սկսել է հանդես գալ խառը մենարատերում: Վերջերս էլ աղմկահարույց հայտարարություն է արել՝ ասելով, որ հավաքականի գլխավոր մարզիչը Լեւոն Ջուլֆալակյանը չէ, որ պետք է որոշի՝ ինքը կլինի հավաքականում, թե՝ ոչ: Ասել է, որ ինքը կարող է վաստակել իր տեղը եւ որ այդ թեմայով պայմանավորվածություն ունի ՀԱՕԿ նախագահ Գագիկ Ծառուկյանի հետ: Այսօր՝ մայիսի 14-ին, լրագրողների հետ հանդիպեցին ֆեդերացիայի ղեկավարները, ազատ եւ հունահռոմեական ոճի ընտրանիների գլխավոր մարզիչները եւ մարզիկները: Նրանք մեկնաբանեցին մարզիկի խոսքերը: Լեւոն Ջուլֆալակյանը կետ առ կետ անդրադարձավ դրանց:

«Մի քանի ամիս առաջ ասում էր. «Օլիմպիական խաղերից հետո գումար չեմ ստացել»: Համար առաջին սուտ: Օլիմպիական խաղերից հետո նա մինչեւ 2017 թ. մայիս վարձատրվել է առանց մասնակցելու հավաքների ու մրցումների եւ հայտարարել է, որ ես պետք է գնամ MMA:

Ասում է. «Ինձ չգնահատեցին»: Իրեն դիմավորեցին, ինչպես օլիմպիական չեմպիոնի, բայց փաստը մնում է փաստ, որ նա չեմպիոն չէ, արծաթեմեդալակիր է:

Ասում է. «Կարող եմ գալ մասնակցել, պարապել, եթե ինձ վճարում են 3 հազար դոլար եւ ավելի, նոր ես կմտածեմ՝ ոնց եմ մասնակցելու հավաքների, կմասնակցեմ, թե՝ չէ»: 3 տարի ոչինչ չի արել, նախապայման է դնում:

Ասում է. «Ինձ Ռուսաստանում չէին ընդունում, դրա համար եկան Հայաստան: Դրանից հետո էլ Լեւոն Ջուլֆալակյանն ինձ չէր ուզում ընդունում»: Հարց է ծագում՝ ինչն է պատճառը, որ դու Ռուսաստանի հավաքականում չէիր կարող տեղ գտնել:

Նշում է, որ միայն Ռիոյից առաջ է ՀՀ հավաքականի հետ մարզումներ անցկացրել: Եվս մեկ սուտ: 2016 թ. շատ խնդրեց, ընդառաջեցինք, որ Ռիգայի Եվրոպայի առաջնությունից առաջ անձնական մարզիչներից հետ մարզվի, եւ Ռիգայի մասնակցությունը տեսանք՝ ինչ եղավ. 1 գոտեմարտ, պարտություն:

Նրա լավագույն արդյունքը մինչեւ օլիմպիական խաղերը եղել է Եվրոպական խաղերի 2-րդ մրցնակակիր: 2015 թ. ՀՀ առաջնության մրցումների կշեքին չի կարողացել իր քաշին կանգնել: Բոլոր ժամանակներում այսպիսի մոտեցում է, եւ ճիշտ հավաքականներում դա պահպանվում է. այն մարզիկը, որը չի կարողանում իր քաշը ապահովել, պարտությունից էլ ավելի վատ, խայտառակ մոտեցում է:

Այս ամենից հետո հայտարարում է. «Ես մեկնեցի Բաքու»: Հավաքականի առջեւ հարցը դրված է եղել, որ մեկին չի պարտադրվել: Նա գիտեր, որ անելանելի վիճակ է, ինքը պետք է օգտվի առիթի, եւ գնաց: Բայց Բաքու առաջին անգամ մեկնել է մեր հավաքականը 2007 թ.: Այնպես որ դա հերոսություն չի համարվում: Ապրես, գնահատեցին, բայց չի կարելի մատի փաթաթան անել:

Ի՞նչ է նշանակում՝ ես հավաքներին ընդհանրապես չեմ մասնակցել: Եվս մի սուտ: Մեր բոլոր փաստաթղթերի մեջ կա՝ որ հավաքներին է եղել, ինչ մրցումների է մասնակցել: Օրինակը պատահական չբերեցի. երբ Ռիգայի առաջնությունից առաջ չմասնակցեց ոչ մի հավաքի, արդյունքը տեսանք: Ռիոյից առաջ բոլոր հավաքներին մասնացկեց, եւ ցույց տվեց, որ իրոք պատրաստ է:

Նշել է, թե ես պարոն Ծառուկյանի հետ համաձայնեցրել եմ: Ծառուկյանն առ այսօր երբեք չի խառնվել գլխավոր մարզիչների՝ հավաքականների կազմը որոշելուն: Նա միայն կողմնակից է ուժեղներին եւ արդար պայքարին:

Նշեմ, որ նա շատ տաղանդավոր ըմբիշ է, բայց տաղանդը միայն կարելի է աշխատանքի շնորհիվ հղկել: Այլ պարագայում իրենից շատ տաղանդավորներ էլ կան: Ոչ մեկ իրավունք չունի առանց հավաքների, մրցումների մասնացկելու ասել՝ ես եկել եմ, գնում եմ աշխարհի առաջնություն, ես ամենաուժեղն եմ: Նման մարզիկներ մեր հավաքականում երբեք չեն եղել ու չեն լինի, թող ականջին օղ անի»,- ասաց Ջուլֆալակյանը՝ ավելացնելով, որ այլեւս Հարությունյանի հայտարարություններին չի պատասխանելու:

Հավաքականի մարզիկների անունից խոսեց օլիմպիական արծաթեմեդալակիր, Եվրոպայի, աշխարհի չեմպիոն Արսեն Ջուլֆալակյանը: Նա ընդգծեց, որ այն ընթացքում, ինչ Հարությունյանը հավաքականում է եղել, ոչ ոքի հետ խնդիրներ չի ունեցել, եղել են լավ հարաբերություններ: Ինչ վերաբերում է ստեղծված իրավիճակին, ապա, սա ըստ, նրա շոու է: Ֆեդերացիայի նախագահ Ռոբերտ Խաչատրյանն իր հերթին անթույլատրելի է համարում Հարությունյանի պահվածքը: Շեշտում է, որ ֆեդերացիայի բոլոր մարզիկները, անկախ իրենց նվաճումներից, աչքի են ընկնում համեստությամբ ու հորդորեց չանցնել սահմաները:

«Մեր հավաքականներում ունենք օլիմպիական չեմպիոն, բարձրակարգ մարզիկներ, որոնք միշտ հանդես են գալիս խելոք ու համեստ դիրքորոշումով: Խնդրում ու պահանջում եմ բոլոր մարզիկներից, որ հանկարծ իրենց չափի զգացողություն չկորցնեն»,- ասաց նա:

Խաչատրյանը եւ ՀԱՕԿ-ը ներկայացնող ՀՀ հունահռոմեական ոճի ըմբշամարտի հավաքականի նախկին անդամ, Եվրոպայի չեմպիոն Ռոման Ամոյանը նաեւ պարզաբանեցին Հարությունյանի հայտարարությունը, թե Ծառուկյանի հետ պայմանավորվածություն ունի: Նրանք նշեցին, որ Ծառուկյանը երբեք չի խառնվում մարզիչների որոշումներին, իսկ նրան ասել է, որ պետք է հետեւի կանոններին:

«Ծառուկյանը միշտ կողմնակից է եղել արդար մրցակցության: Նա արտահայտություն է արել հետեւյալ ձեւով, որ տվյալ մարզիկը պետք է մանակցի երկրի առաջնությանը, հաղթողին ոչ ոք ոչինչ չի ասում, նա պետք է մասնակցի հետագա մրցաշարերին: Ծառուկյանի հետ այդպիսի ընդհանուր հայտարարի են եկել, բայց ուրիշ կերպ են ձեւակերպել»,- ասաց Ամոյանը:

Ամեն դեպքում, Հարությունյանը ցանկության դեպքում կարող է վերադառնալ հավաքական: Թե ֆեդերացիան, եւ թե Լեւոն Ջուլֆալակյանը հավաքականի դռները չեն փակում նրա առաջ: Մարզիչը նշեց, որ ցանկացած ըմբիշ, որը պատրաստ է հետեւել կարգուկանոնին, կարող է իր տեղն ունենալ ընտրանու կազմում:

«Եթե մարզիկը պատրաստ է անցնելու այն ճանապարհը, որը պահանջվում է իրենից, ուրեմն բոլոր մարզիկներն էլ իավունք ունեն, եթե մարզիկը պատրաստ չէ անցնելու այդ ճանապարհը, ուրեմն իրավունքն չունի»,- ասաց Ջուլֆալակյանը:

Հարությունյանն առաջիկայում մասնակցելու է ըմբշամարտի մրցման, սակայն դա հավաքականների մակարդակով չէ: Ըմբշամարտի երեկո է, ըստ էության շոու: Տեղի է ունենալու մայիսի 17-ին Կրասնոդարում: