ՈՒԵՖԱ-ի մրցաշարերում «Արսենալն» անգլիական թիմերի չի հաղթել. փաստեր ԵԼ եզրափակչից առաջ

Եվրոպա լիգայի 2018-19 մրցաշրջանի չեմպիոն դառնալու համար «Արսենալը» պետք է կարողանա իր պատմության մեջ առաջին անգամ ՈՒԵՖԱ-ի մրցաշարերում հաղթանակի հասնել անգլիական թիմի՝ տվյալ դեպքում «Չելսիի» նկատմամբ: ՈՒԵՖԱ-ի պաշտոնական կայքը հայտնում է, որ իր հովանու ներքո անցկացված մրցշարերում դա «զինագործներին» երբեք չի հաջողվել: Նախորդ 6 դեպքում նրանք 2 անգամ ոչ-ոքի են խաղացել եւ 4 անգամ պարտվել են:

Մյուս կողմից «Արսենալը» գլխավորում է Եվրոպա լիգայում ամենահաջողակ մարզիչներից մեկը: Ունաի Էմերին «Սեւիլիայի» հետ 3 անգամ անընդմեջ նվաճել է տիտղոսը: Դա տեղի է ունեցել 2013-14, 2014-15 եւ 2015-16 մրցաշրջաններում:

«Չելսիի» հետ «Արսենալն» ՈՒԵՖԱ-ի մրցաշարերում նախկինում հանդիպել է 2 անգամ: Դա տեղի է ունեցել Չեմպիոնների լիգայի 2003-04 մրցաշրջանի քառորդ եզրափակչում: «Չելսիի» հարկի տակ հանդիպումն ավարտվել է 1:1, իսկ «Արսենալի» դաշտում «ազնվականները» հաղթել են (2:1) ու հաջորդ փուլ անցել:

Մինչեւ Եվրոպա լիգայի ընթացիկ մրցաշրջանի եզրափակիչ հասնելն «Արսենալն» առաջինն է եղել խմբային փուլում: E խմբում առաջ է անցել «Սպորտինգից», «Վորսկլայից» ու «Քարաբագից»: Փյել-օֆի առաջին 2 փուլերում «զինագործները» մի փոքր վախեցրել են երկրպագուներին: 1/16 եզրափակչում առաջին խաղում պարտվել են ԲԱՏԷ-ին, իսկ 1/8 եզրափակչում՝ «Ռենին», սակայն 2 դեպքում էլ 2 խաղերի արդյունքում շրջանցել են մրցակիցներին: Քառորդ եզրափակչում դուրս են թողել «Նապոլիին», իսկ կիսաեզրափակչում՝ «Վալենսիային»:

«Չելսին» խմբային փուլում նույնպես առաջինն է եղել: Գլխավորել է L խումբը՝ առաջ անցնելով ԲԱՏԷ-ից, «Վիդիից» ու ՊԱՕԿ-ից: 1/16 եզրափակչում պայքարից դուրս է թողել «Մալմյոյին», 1/8 եզրափակչում՝ Կիեւի «Դինամոյին», քառորդ եզրափակչում՝ «Սլավիա Պրահային», կիսաեզրափակչում՝ «Այնթրախտին»:

«Չելսիի» համար սա 2-րդ անգամն է, որ հայտնվում է Եվրոպա լիգայի եզրափակչում: Նախորդը եղել է 2013 թ.: Լոնդոնցիներն այն ժամանակ հաղթել են «Բենֆիկային» (2:1): Այն ժամանակվանից ի վեր, ինչ մրցաշարն այսպես է կոչվում, «Արսենալը» եզրափակչում չի խաղացել: Մեկ անգամ եղել է եզրափակչում, երբ մրցաշարը կոչվում էր ՈՒԵՖԱ-ի Գավաթ: Դա տեղի է ունեցել 1999-2000 մրցաշրջանում: 11-մետրանոցներով պարտվել է «Գալաթասարային»:

Այս եզրափակիչը 2 թիմերի կազմերում որոշ խաղացողների համար յուրահատուկ է լինելու: Եթե «Արսենալի» հիմնական կազմում խաղադաշտ դուրս գա դարապսապահ Պետր Չեխը, նա իր կարիերայի վերջին հանդիպումը կանցկացնի նախկին թիմի դեմ: Չեխը «Չելսիում» է խաղացել 2004-15 թթ.: «Ազնվականների» կազմում էլ խաղադաշտ դուրս  գալու դեպքում իր նախկին թիմի դեմ դուրս կգա հարձակվող Օլիվյե Ժիրուն: Ֆրանսիացին կարեւոր խաղացող է եղել «Արսենալի» համար: Այնտեղ հանդես է եկել 2012-18 թթ., ու «ազնվականների» կազմը համալրել է 2018-ի հունվարին:

2 թիմերն էլ կարեւոր խաղից առաջ կորուստներ ունեն: «Արսենալը» Բաքու է գնացել առանց Հենրիխ Մխիթարյանի: Ինչպես հայտնի է, ֆուտբոլիստը հանդիպմանը չի մասնակցում՝ անվտանգության նկատառումներով: «Չելսիի» կազմում հարցականի տակ է Ն՛Գոլո Կանտեի մասնակցությունը. նա վնասվածք ունի:

Անգլիայի Պրեմիեր լիգայի 2018-19 մրցաշրջանում, որն ավարտվել է մի քանի շաբաթ առաջ, թիմերից յուրաքանչյուրը սեփական հարկի տակ հաղթել է՝ «Չելսին» օգոստոսին (3:2), «Արսենալը»՝ հունվարին (2:0): Ընդհանուր առմամբ թիմերը հանդիպել են 197 անգամ, «զինագործները» հաղթել են 76, «ազնվականները»՝ 63 անգամ:

Այս եզրափակիչն «Արսենալի» համար կարեւոր է ոչ միայն տիտղոս նվաճելու առումով: Եթե «Չելսի» ԱՊԼ-ում 3-րդ տեղը զբաղեցնելով ապահովել է տեղը Չեմպիոնների լիգայի 2019-20 մրցաշրջանում, ապա «զինագործների» համար սա ուղեգիր ստանալու վերջին հնարավորությունն է: Թիմն առաջնության արդյունքներով գրավել է 5-րդ տեղը ու հայտնվել Եվրոպա լիգայում:

Մինչեւ հիմա Եվրոպա լիգայի եզրափակիչներում 3 անգամ է անգլիական թիմ եղել: Վերջինը «Մանչեստեր Յունայթեդն» է, որը 2017 թ. եզրափակչում առավելության հասավ «Այաքսի» նկատմամաբ (2:0): Գոլերից մեկը հեղինակեց այն ժամանակ ՄՅՈՒ-ում հանդես եկող Հերիխ Մխիթարյանը:

Եվրոպա լիգայի ընթացիկ մրցաշրջանի եզրափակիչը, որում տանտերը համարվելու է «Չելսին», կայանալու է վաղը՝ մայիսի 29-ին Բաքվի «Օլիմպիական» մարզադաշտում: Սկսվելու է, Երեւանի ժամանակով, 23:00-ին: