Հարությունյանը պայմանավորվածից ավելի գումար է պահանջել. կազմակերպիչը՝ մենամարտի չեղարկման մասին

Օլիմպիական արծաթեմեդալակիր, հունահռոմեական ոճի ըմբիշ Միհրան Հարությունյանի երեւանյան մենամարտը MMA-ում չի կայանա, քանի որ նա պայմանավորվածից ավելի շատ գումար է պահանջել: Այս մասին այսօր՝ հունիսի 21-ին, «Հայկական ժամանակ»-ին ասաց շոուի՝ MIX Fight 42 մրցաշարի կազմակերպիչ Վարդան Մնացականյանը: Իր ելույթի չեղարկման մասին մարզիկը հայտնել էր սոցցանցերում՝ նշելով, որ անհամաձայնություններ են եղել կազմակերպիչների հետ: Մնացականյանն ասում է, որ հուլիսի 6-ին Կարեն Դեմիրճյանի անվան մարզահամերգային համալիրում նախատեսված մենամարտի վերաբերյալ Հարությունյանի մենեջերի հետ վերջնական համաձայնություն ու պայմանագիր են ունեցել:

«Նրա հետ պայմանագիր կնքեցի: Մենեջերի հետ եմ խոսել: Նա ինձանից մեծ գումար ուզեց, որ մասնակցի ՀՀ-ում: Ասում էր, որ վերջին մենամարտից 20-24 հազար դոլար է ստացել: Ասացի՝ այս երկրում չենք կարող այդքան գումար տալ: Եկանք պայմանի, որ վճարեմ 1000 եվրո մենամարտի համար, եւս 1000 եվրո, եթե հաղթի, գումարած դրան, նրա ու մարզչի տոմսերն եմ առնում Մոսկվա-Երեւան եւ հյուրանոց՝ 2 գիշեր: Պայմանագիր սարքեցինք, ուղարկեցինք, Միհրանը ստորագրեց»,- ասաց Մնացականյանը (լուսանկարում՝ աջից):

Նա պատմում է, որ ընթացքում իրեն միացել է ռուսական մեկ այլ պրոմոութերական ընկերություն: Ինքը համաձայնել է համագործակցել ավելի լավ շոու ունենալու ու Հայաստանում նման երեկոների վարկանշը բարձրացնելու համար: Նրա խոսքով՝ դրանից հետո Հարությունյանը որոշել է ավելի գումար պահաջել:

«Նրա մենեջերը զանգել է ինձ, ասում է՝ 4 հազար դոլար ավելի պետք է տաք, եթե չէ՛, չի կպնում, ես էլ ասում եմ՝ չի կպնում, թող չկպնի, ինչո՞ւ 4 հազար ավելի տամ, պայմանագիրն ունեմ»,- ասաց Մնացականյանը:

Նա նշում է, որ փորձել է համաձայնության գալ Հարությունյանի հետ: Զանգահարել է: Ասել է, որ լավ կլինի ինչ-որ որոշում կայացնել, որպեսզի մենամարտն ամեն դեպքում կայանա: Նրա խոսքով՝ ի պատասխան՝ Հարությունյանն էլ ավելի մեծ պահանջ է ներկայացրել:

«Երեկ նորից զանգել եմ իր պրոմոութերին, ասել եմ, որ լավ չի լինում, նրա մրցակցի նկատմամբ էլ պետք է հարգանք լինի: Ինձ այսօր նամակ եկավ, որ հիմա էլ 8 հազար դոլար ավելի են ուզում՝ ինչ պայմանագրում կա, գումարած 8 հազար դոլար: Ես էլ ասացի՝ հաջողություն իրեն, բարի ճանապարհ, Աստված իրեն բարձր հաղթանակներ բերի»,- ասաց նա:

Այսպիսով Միհրան Հարությունյանի մենամարտը Mix Fight 42-ից հանվել է: Նրա մրցակիցը պետք է լիներ բրազիլացի Ուեսլի դե Ժեզուսը, որը MMA-ում նրանից ավելի փորձառու է: Մնացականյանը նշում է, որ իրենք ստիպված են լինելու փոխահատուցել բրազիլացուն:  

«Բրազիլացին էլ շիվար կանգնել է, չգիտի՝ ինչ անի: Հիմա պետք է չեղարկեմ մենամարտը, բայց պրոմոուշենի վրա գումար է ծախսվել ահագին, տոմսերն են գնված, բայց ի՞նչ արած: Իմ կարծիքով՝ իր երկրում պետք է նման բան չաներ»,- ասաց նա՝ ավելացնելով, որ, երբ այս տարվա սկզբին ՀՀ-ում նման երեկո էր կազմակերպել, իրեն աջակցել են նույնիսկ արտասահմանցիները. ոմանք մենամարտել են քիչ գումարով, որոշ հայազգի մարզիկներ էլ համաձայնել են մասնակցել անվճար:

Ամեն դեպքում երեկոն կկայանա: 20-ի փոխարեն կլինի 19 մենամարտ: Կվիճարկվեն գոտիներ: Կլինեն նաեւ Ռուսաստանը ներկայացնող հայազգի մարտիկներ, օրինակ Արմեն Գուլյանը: Շոուն, ըստ Մնացականյանի, ցուցադրվելու է իսպանական Լալիգա, ռուսական Բոքս, հայկական Կենտրոն հեռուստաալիքներով:

«Այնպես որ Միհրանի դուրս գալն ինձ վնաս չի տալիս, ուղղակի նա այստեղ լսարան ուներ, որ կգային կնայեին: Հիմա չգիտեմ՝ նրա հանդիսատեսն ինչպես կնայի հարցին»,- ասաց նա:

Մնացականյանի խոսքով՝ Հարությունյանի հետ պայմանագրում կա կետ, ըստ որի, նա կարող էր չեղարկել, եթե վնասվածքի կամ առողջական խնդրի վերաբերյալ բժշկական տեղեկանք ունենար: Քանի որ նման խնդիրներ չունի, ըստ Մնացականյանի, պետք է փոխհատուցեր, սակայն ինքը չի պատրաստվում որեւէ պահանջ ներկայացնել կամ դատարան դիմել:

«Որ հայ մարզիկ է, չեմ ուզում դատական հարցեր լինեն, ինձ հետաքրքիր չէ, բայց, եթե իմ փոխարեն ուրիշը լիներ, հնարավոր է՝ խնդիրներ ունենար: Որ հայ է, դրա համար իրեն բարի ճանապարհ, իր գործերին հաջողություն, բայց մյուս անգամ դժվար մեր պրոմոուշենի մեջ մասնակցի»,- ասաց Մնացականյանը:

Հուլիսի 6-ին կայանալիք Mix Fight 42 մրցաշարի տոմսերն արժեն 1000-ից 200 000 դրամ: Ինչ վերաբերում է Հարությունյանի առաջիկա պլաններին, ապա նա սոցցանցերում խոստացել է MMA-ում իր 3-րդ մենամարտի մասին տեղեկացնել առաջիկայում: Այն, ըստ նրա, տեղի կունենա մինչեւ հուլիսի վերջ: