«Ոչ լեգիտիմ» նախագահի կողմից առաջադրված, ապա ընտրված Վահե Գրիգորյանը աշխարհացունց հայտարարություններով է հանդես գալիս

Վահե Գրիգորյանի հայտատարությանը եթե փորձենք որոշակի բովանդակություն հաղորդել՝ նախկինում հայտարարվում է, իր ձեւակերպմամբ, ոչ լեգիտիմ նախագահի գոյության մասին, հետո ոչ լեգիտիմ նախագահի կողմից առաջադրվում է թեկնածու, ընտրվում է ՍԴ դատավոր, հետո էլ նման աշխարհացունց հայտարարություններով է հանդես գալիս։ Մենք այս հարցի հետ կապված ունենք օրենսդրական կոնկրետ կարգավորումներ, դրանից դուրս որեւէ բան չենք դիտարկում։ Այս մասին այսօր ԱԺ ճեպազրույցների ժամանակ հայտարարեց ԲՀԿ խմբակցության պատգամավոր Իվետա Տոնոյանը՝ անդրադառնալով ՍԴ դատավոր Վահե Գրիգորյանի հայտարարությանը, որ ինքը ստանձնում է ՍԴ նախագահի լիազորությունների կատարումը։

Տոնոյանն ասաց, որ իրենք այս հարցը դիտարկում են ոչ թե քաղաքական, այլ միայն իրավական հարթության մեջ։

Լրագրողը հարց հնչեցրեց՝ ԲՀԿ խմբակցության պատգամավորներ Իվետա Տոնոյանն ու Վահե Էնֆիաջյանը, որոնք եւ անցկացնում էին ճեպազրույցը, համաձա՞յն են Ռոբերտ Քոչարյանի երեկ հնչեցրած այն կարծիքի հետ, թե երկրում «ոչ օրենք կա, ոչ օրինականություն»։

Էնֆիաջյանը արձագանքեց, որ կապ չունի՝ Քոչարյանն է ինչ-որ բան ասում, առաջին նախագահը, երրորդ, թե վարչապետը, ինքը չի պատրաստվում մեկնաբանել իրենց ասածները․

«Օրենքի գերակայության կամ օրինականության վերաբերյալ մեր դիրքորոշումն այն է, որ օրենքի առաջ բոլորն են հավասար։ Պետք է բոլոր մեղավորները, եթե այդպիսիք կան, բացահայտվեն»,-ասաց պատգամավորը՝ հավելելով, որ իրենք Մարտի մեկի գործի վերաբերյալ կարող են հստակ դիրքորոշում հայտնել, երբ պատկերն ամբողջական կլինի, փաստերն ու որոշումները կլինեն։

Անդրադառնալով ԲՀԿ խմբակցության պատգամավոր Տիգրան Ուրիխանյանի ֆեյսբուքյան գրառմանը, որ ինքը դադարեցնում է աշխատանքային պարտավորությունները, ըստ երեւույթին՝ նկատի ունենալով, որ պատրաստվում է մանդատը վայր դնել, պատգամավորներն ասացին, որ իրենք պաշտոնապես նման դիմում չեն տեսել եւ միայն Ուրիխանյանը կարող է մեկնաբանել այս հարցը։