Արթուր Ալեքսանյանը հրաժարվել է աշխարհի առաջնության եզրափակչին մասնակցելուց

Օլիմպիական չեմպիոն, աշխարհի եռակի, Եվրոպայի քառակի չեմպիոն Արթուր Ալեքսանյանը (97 կգ) հրաժարվել է աշխարհի 2019թ. առաջնության եզրափակչին մասնակցելուց: Այս մասին հայտնում է Հայաստանի ըմբշամարտի ֆեդերացիայի մամուլի ծառայությունը: Նշվում է, որ պատճառն այն է, որ երեկ՝ սեպտեմբերի 15-ին, նա մրցման հետ անհամատեղելի վնասվածք է ստացել՝ կոտրել է կողոսկրը: Այսօր նա եզրափակչում պետք է աշխարհի առաջնություններում իր 4-րդ ոսկու համար պայքարեր Ռուսաստանը ներկայացնող Մուսա Եվլոեւի դեմ:

Այսպիսով՝ Ալեքսանյանը բավարարվեց արծաթե մեդալով: Ամեն դեպքում նա Տոկիո 2020-ի ուղեգիր նվաճեց:

Մարզիկի վնասվածքի մասին հայտնի էր դարձել մինչեւ եզրափակիչը: «Հայկական ժամանակ»-ի հետ զրույցում հավաքականի մարզիչ Սամվել Գեւորգյանը նշել էր, որ կողն է ցավեցրել, սակայն անհանգստանալու կարիք չկա: Նշում էր նաեւ, որ Ալեքսանյանը շատ է ցանկանում մասնակցել:

Այս մրցաշարից հետո նա բավական ժամանակ կունենա վերականգնվելու համար, քանի որ թեեւ 2020թ. Եվրոպայի առաջնություն դեռեւս կա, սակայն հաջորդ խոշոր մրցումը միեւնույն է օլիմպիական խաղերն են:

Աշխարհի առաջնություններում Ալեքսանյանն իր 3-րդ չեմպիոնությունը նվաճել էր 2017թ.՝ եզրափակչում հաղթելով նույն Եվլոեւին: 2018թ. աշխարհի առաջնությունում նա կիսաեզրափակչում պարտվել է նույնպես Եվլոեւին, որը հետագայում չեմպիոն դարձավ: Ինքն էլ բրոնզի համար գոտեմարտին չմասնակցեց վնասվածքի պատճառով:

Վաղը ՀՀ հունահռոմեական ոճի ըմբշամարտի հավաքականի կազմում բրոնզի համար կպայքարի Կարապետ Չալյանը (77 կգ): Նա նույնպես Տոկիո 2020-ի ուղեգիր է նվաճել:

Աշխարհի առաջնությունը մեկնարկել է սեպտեմբերի 14-ին: Ավարտվել է 22-ին:

^{Արթուր Ալեքսանյանը եզրափակչից առաջ: Նա պատրաստվել է վճռորոշ գոտեմարտին, նախավարժանք է արել (տեսանյութը՝ ՀՀ Ըմբշամարտի ֆեդերացիայի մամուլի ծառայության)}