Ի՞նչ եք խոսում, մի հատ էլ քֆուր դնեիք քվեարկելու վրա․ Պետրոսյանի հարցադրումը վրդովեցրեց Միրզոյանին (տեսանյութ)

Խորհրդարանը շարունակում է քննարկել գլխադասային հանձնաժողովներում բացասական եզրակացություն ստացած նախագծերը։ Դրանցից երկուսը ԲՀԿ-ական Գեւորգ Պետրոսյանի այն նախագծերն են, որոնցով առաջարկվում է փոփոխություն կատարել «Ընտանեկան օրենսդրության մասին» նախագծում, որպեսզի արգելվի միասեռական եւ սեռափոխված անձանց ամուսնությունն ու նրանց կողմից երեխա որդեգրելը:

Քանի որ երկու նախագծերն էլ ստացել էին գլխադասային հանձնաժողովի բացասական եզրակացությունը, Գեւորգ Պետրոսյանը դժգոհությամբ ասաց, որ այդ դեպքում թող նախագծերը ներկայացնի միայն կառավարությունը, իրենք էլ ընդունեն։

Պետական-իրավական հարցերի մշտական հանձնաժողովի անդամ, հարցի հարակից զեկուցող Տարոն Սիմոնյանը, թեպետ գործուղման պատճառով ներկա չէր եղել հանձնաժողովի նիստերին, սակայն ներկայացրեց, որ նախագիծը բացասական եզրակացություն է ստացել: Սիմոնյանն ընդգծեց, որ օրենսդրությամբ արդեն իսկ ամրագրված է նման արգելք, սակայն ինքը կողմ է, եթե Գեւորգ Պետրոսյանը կարողանա հիմնավորել իր ներկայացրած փոփոխությունների անհրաժեշտությունը:

Գեւորգ Պետրոսյանն էլ, խոսելով նախագծերի մասին, ասաց, որ եթե նույնասեռականները եւ սեռափոխվածները ցանկանան երեխա որդեգրել, ի՞նչը պետք է ստուգեն։ Եթե ամուսնության ժամանակ կասկած կա, որ նույնասեռական է, թե նույնասեռական չէ, ըստ Պետրոսյանի, էլի մի բան կարելի է ստուգել․

«Բայց կատակը մի կողմ, արժեքները պետք է պահենք։ Մենք նահապետական ժողովուրդ ենք, ավանդապաշտ ազգ ենք։ Մենք չենք ասում՝ էդ մարդկանց սպանենք, մենք ասում ենք՝ նման մարդկանց կողմից երեխա որդեգրելու արգելք սահմանենք։ Դա ազգային անվտանգության նկատառում ունի։ Ի՞նչ է նշանակում՝ երկու համասեռամոլ երեխա որդեգրեն։ Այդ երեխան ինչպե՞ս է մեծանալու, ինչքանո՞վ է ծառայելու մեր ազգային անվտանգության խնդիրներին։ Եկեք պաշտպանենք մեր ազգային ավանդույթները»,- հարց ուղղեց պատգամավորը։

Պետրոսյանն իր ելույթում ասաց, որ իրենք խմբակցությունով դեմ են, որ ավանդական արժեհամակարգը գնդակահարվի․

«Եկեք պաշտպանենք ավանդական արժեքները, ով որ դեմ է քվեարկելու այս նախագծին, կուզենա՞ր, որ իր հետ նման դեպք լիներ»,- հնչեցրեց Պետրոսյանը:

Այս հարցադրումը խիստ վրդովեցրեց ԱԺ նախագահ Արարատ Միրզոյանին․

«Պարո՛ն Պետրոսյան, ի՞նչ եք խոսում։ Դուք կուզենա՞ք ձեր ընտանիքում... Էդ ի՞նչ անձնավորված բաներ ա, մի հատ էլ քֆուր դնեիք քվեարկելու վրա։ Ձեր ձեւը արդեն չափ ու սահման չունի»,- ասաց նա՝ քարտուղարությանը խնդրելով իրեն ներկայացնել պատգամավորին ձայնից զրկելու դրույթը։

Գեւորգ Պետրոսյանի երկու նախագծերն էլ մերժվեցին, չընդգրկվեցին լիագումար նիստերի օրակարգ։

Մանրամասները՝ տեսանյութում․